Sawi loh dana awm
Tuna ZPM party kaihhruai sawrkar ding mek kum 2023 December thlaa lak luh a nih zawh chiah khan kan Chief Minister ni ta Pu Lalduhoma hian press conference a nei nghal a. Ni 100 chhunga an tihhlawhtlin turte a puan bakah, thil dang dang a sawi ṭeuh mai. Khami ṭuma a thusawi kha Youtube-ah en tur a la awm reng a. A thusawi kha a ṭha tak zet a, 'Tun sawrkar zet chu...' tiin mipuiin kan beisei ang hle a nih kha.
Sawrkar lak luh nia press conference-a CM-in a sawi zinga pakhat chu, "Khuallianah ṭan zut kan tum lo," tih a ni a. A thu chu a mawi narawh e; mahse, a takah erawh chuan khuallianah an ṭang zut ta si a. Khualliana an ṭanna leh an thil hawn ṭhenkhat phei chu ZPM sawrkar hma, sawrkar hmasa huna mite aiin a nêpin a tenau zawk mah awm e.
"Khuallianah ṭan zut kan tum lo" tih ngat hi chu kan ram hruaitute hian an bawh pelh nasa ngang mai. A sawitu Chief Minister-in a zâwm lo a, a hnuaia minister-te'n an zâwm lo a, MLA-te pawhin an zâwm lo. Khuallian tura sawmna leh thil eng emaw hawng tura sawmna an dawnte an tihhlawhtling vek hauh lo ang a, mahse, an tihlawhtling tam mah mah a ni.
CM press conference hmasa berah khan CM Pu Duha khan khuallian atan sawm uar lo turin mipui lam a chah nghal a, a âwm viau mai. Mipui lam pawhin kan ram hruaitute hi tihbuai dan tawk kan thiam a ngai a, kan programme buatsaih zinga a tam ber hi chu an tel lova kan tih theih rengte a ni fo tlat a ni. Mahse...
Mipui emaw, pawl emaw te hian Chief Minister emaw, minister emawte khuallian atan hman an duh ṭheuh tlat a. An programme/event te tihhluta tih lan ropui lehzual nan an duh ṭhin alawm. Chu chauh ni lovin, an hnena thlen duh an neihte thlenna remchang atan an duh ṭhin bawk.
Chuti chung chung chuan, Chief Minister-in a sawi tawh miau a, eng pawl emawte'n khuallian tur leh thil hawng turin an lo sawm zut a nih pawhin, an lo hnar ngam mai tur a ni. Lo hnarna tur remchang, chhuanlam a tam thei dawn lutuk tlat.
Thuhriltu 5:5-ah chuan, "Thu tiama hlen si loh ai chuan, tiam loh law law hi i tan a ṭha zawk," tih kan hmu a. 'Khualliana ṭan zut loh' tih pawh hi kan CM leh a minister-te thutiamah ngaih theih a ni a. Thu tiama hlen si loh hi Pathian duh loh a ni. Mahse, thu an lo tiam tawh si a, an thutiam chu an bawhzuia an tihhlawhtlin a ṭul ta si a ni.
Sawrkar lak luh nia Chief Minister thusawite kha a ṭha em em vek a. Amah Chief Minister ngei leh minister-te hian lo en chhuak nawn leh vek se; inenfiah nan hmang se a ṭha viau ang. Sawi loh anga awm tlat lovin, sawi ang ngeia an awm a ngai e.
- Zoramchhana