MNF-in kawngzawh an uar ber? Congress-in tharum an ngaina ber?
Mizorama political party lian pahnih, tuna opposition ni mek Congress leh MNF ka hmuh dan ka'n sawi ve lawk teh ang. Ka hmuh danin, MNF hi Mizorama political party zingah kawngzawh leh bandh huaihawt ching ber an ni a, Congress party hi tharum hmang hreh lo ber an ni thung.
Tuna sawrkar mek ZPM party leh opposition party lian ber dawttu (MLA neih tam dana chhûtin) BJP erawh chuan lian tham taka kawngzawh leh total bandh huaihawt an la nei lo niin ka hria.
Dawrpui hi ṭhang khat/hnih lian zet chu ka hnathawhna hmun a ni a, kawngzawng reng rengin an paltlang ngei ngei hmun a ni. Kawngzawh an tih chhante hre kilh kelh lo mah ila, kawngzawhtute chu hriat loh theih a ni lo. Kawngzawh tih hian mi tlemte kawngzawh ni lo a, lian tham taka kawngzawh, nasa taka traffic ti jam ṭhin ang chi hi.
Tun hma aṭanga tawhin MNF-in kawngzawh an hrât ber tih hi ka ngaihdan a ni. Tun hma khan Congress sawrkara hotu lam aṭangin (CM ni tak maw?) 'An pheikhawk ral ṭhak thlengin zawh rawh se' tih ang deuh ṭawngkam te pawh sawi a awmin ka hria. Sawi mai theihah chuan MNF-te hian kawng chhia siam tura sawrkar nawn nan October ni 13, 2015 khan Aizawl, Lunglei leh Saihaah kawng an zawh; hei lo pawh hi kawngzawh an nei fo awm e.
Total bandh pawh MNF hi huaihawt ching ber an niiin ka hria. September ni 14, 2017 khan zing dar 5 aṭangin Mizoram pumah 'Kawng chhe lutuk vanga mipuite thlavâng hauhna total bandh' an buatsaih. Hei lo pawh hi bandh an huaihawt tawh ṭhinin ka hria a, a fik a faka sawi mai tur erawh ka hre tawh lo. Tunah pawh FCAA 2023 avangin October ni 29, 2025-ah Mizoram pum huapin total bandh tih leh an tum mek a nih hi.
Kawngzawh leh total bandh huaihawt hi chu sawrkar beihna atana MNF-in hmanrua an leklam ber a tih ngamin ka hria; tharum han thawh rum rum te, police nena han innawr chiam te erawh an ching lo. An hmanraw hman thiamte hi mipui nunphung tibuaitu leh ni tina inhlawh ṭhinte harsatna lian tak thlentu a ni ṭhin.
Congress ve thung hi, kawngzawh leh total bandh an uar lovin ka hria; tharum thawh lam an ngaina deuh. Congress party mite tharum thawhna hi chu sawi tur a awm neuh neuh mai thei. Kum eng emaw zat kal taah Revenue (Director?) office luhchihin, bungrua an tihchhe nuala sawi kha a langsar ber pakhat a ni ang.
Congress party mite'n punkhawm an han nei a, police-in kal phal chin an siam sut tlang luih an han tum ngei a; anmahni lo dangtu police-te nen an innawr leh nge nge ṭhin. Kuminah pawh Assembly House chhak deuhah an innawr chiam a, lu (head)-a hliamte pawh an awm phah nghe nghe kha.
An opposition laia Congress ho chet ṭhin dan hi thil ṭha duh vang lam aiin, sawrkar tihbuai hrim hrim leh tihmualpho tumna leh, media-a lansarh tumna a ang zawk mahin ka hre ṭhin.
Ka sawi kual deuh duah a. Ka sawi tum ber chu–political party-in sawrkar nawrna atana total bandh te, mipui nunphung tibuai zawnga kawngzawh, punkhawm huaihawtte hi an hlâwkpui chiah em, tih hi a ni. Ngun takin lo ngaihtuah ve se ka ti hle mai.
- Lalduhmawia