THE BIBLE SAYS SO!

Mi thianghlim lawr hi kan Lal Isua hian A sawi chiang em em mai a. A Pa vana mi hnenah A kal chho dawn a. Tah chuan kan awmna tur hmun A han siam ang a. Chumi zawhah chuan A hnena min hruai chho turin A lo chhuk dawn a. Min la chho ang a, A hnenah kan awm dawn a ni tih min hrilh a (Johana 14:1-4).

Chu thu vek chu tehkhin thuin A sawi leh a, nula thianghlim sawm tehkhin thu tih a nih hi (Math 25:1-13). He tehkhin thu hi Judate inneih dan nena inmila sawi a ni a. Ringtute hi Lal Isua mo turte kan ni tih Bible-in min hrilh ngei bawk a. Tirhkoh Paula chuan Lal Isua hi kan pasal tura min hualsak a ni tih min hrilh bawk a ni (2 Kor 11:2). Beramno Lal Isua nena kan inneih hun tur chu vanah, Lal Isua leia rorel tura A lo chhuk hmain a ni dawn tih Apostol Johana'n min hrilh kha (Thupuan 19:7,8).

He tehkhin thu hi Mathaia chuan vanram tehkhin thu a nih a sawi a (Math 25:1). Chuvangin Lal Isua mo, A mi dik takte nih leh nih loh fiahna pawimawh tak a ni. Nula sawmte hi Lal Isua ta nia inchhal zawng zawngte min huap ang. Judate thil sawi dan chuan sawm hi thil famkim leh a nih tur ang ni famkim sawina a ni ṭhin a. Moneitu kha Lal Isua sawina a ni. Lal Isua Moneitu chu khawvela ringtu zawng zawngte chuan kan nghak ta ṭhup mai a ni.

Moneitu chuan A mo turte chu Ama in vanah A hruai chhoh dawn avangin he tehkhin thu hi mi thianghlim lawr tehkhin thu fiah tak a ni. Nula thiaghlim tih ve thote Lal Isua'n A hruai ve tak lohte kha a zatve lai an ni a, Moneitu Lal Isua'n A hruai chhoh tak Nula thianghlimte pawh a zat ve lai an ni. Hei hian min zirtir chu tihtak meuha Lal Isua zuitu nia insawi zinga a zatve hlawk hi chu chhawk an ni dawn tihna a ni! Piangthara inngai Lal Isua lalna pawm chuang lote hi chu an che sual dawn.

Nula thianghlim, lo inringsa diamte chu Moneitu chuan A rawn hruai a, mo lawmna in chu an khar ta! Kristian tak tak lote chu lawr ve loh an ni dawn! (Math 7:21-23; 7:13-14). Kawngka chu va kik sa teh mah se Moneitu Lal Isua chhanna chu a na hle ngawih ngawih mai le! “Tik tak meuhin ka hrilh a che u, Ka hre lo che u a ni,” A ti (Math 25:12).

He tehkhin thu hi ‘Second Coming’ kan tih ṭhin hi a ni lo tih a lanna chu Lal Isua'n A mote A hruai chhohte kha lei aṭangin, nula thianghlim ate awmna aṭangin vana lak chhoh an ni a. A tehkhin thu pawh hi vanram tehkhin thu tih a nih hi. Hetia piangthar tak takte lak chhoh an nih hnu hian Krista Ni Paulan A tih ṭhin khan a rawn zui dawn a ni. Chu hun chu Krista Rorelna Ṭhutphaha rorelna (Bema) an ti ṭhin. Chu Bema chuan kum 7 lai a awh ang a. Ringtute rawngbawlna zawng zawngte enfiaha lawmman pek vek an ni ang a. Chumi tihfel a nih hnuah chuan Beramno nupui neihna lo thleng tur tlangau au ri kan hre tawh ang (Thupuan 19:7,8).

- F. Lalthanzuala, 9436141242