Art-te hi 'Art'-in buaipui tawh se
'Art' chungchang, sawrkar anga a enkawltu department hi ka lo ngaihtuah ve rauh ruah ṭhin a. Art kan tih huang chhunga awm thlalak (still & video) lam te, lemchan (film) lam te, lemziak lam te, thil ker mawi (sculpture) lamte hi Information & Public Relations Department-in an enkawl tlat a. Art & Culture Department enkawl awm tak a niin ka hria.
Art hian a huam zau em em a, a chunga kan sawi tawh–thlalak, lemchan, lemziak leh kermawi te hi art vek a ni a; rimawi, zai leh lâm, thuziak lamte pawh a huam. Heng kan sawi bakah hian thil dangte pawh a huam thei mai thei e. Hengte hi 'art' vek a nih laiin, thlalak, lemchan, lemziak leh kermawi lamte hi IPR Department-in an buaipui a; rimawi, zai leh lâm, thuziak lam erawh chu Art & Culture Department-in an enkawl niin a lang.
Information & Public Relations Department hmingah hian a chunga 'art' kan sawi chi hrang hrangte nena inkungkaih âwm a awm lo khawp mai a. Tunah chuan Printing & Stationery Department nen department khatah dah an ni tawh a, chumi hnuah pawh 'art' kan sawite nena inzawmna leh inkungkaihna an nei teh chiam chuang lo.
Art & Culture Department erawh chu a hmingah 'Art' a awm miau mai a. Hei vang hian 'art' chi hrang hrangte hi Art & Culture Department department enkawl tur ni awm tak a ni. 'Art' zinga eng emaw zat Art & Culture Department-in an enkawl lo tlat hi a mak viau mai.
Art & Culture Department hian 'culture' lam ringawt an ngaihsak a, hma an la a, 'art' chi hrang hrang zingah–rimawi, zai leh lâm leh thuziak lamte chauh hi an ngaihsak a, 'art' ve tho–thlalak, lemchan, lemziak leh kermawi lamte hi an ngaihthah lutuk a ni ang em? Chuvang chuan thlalak, lemchan, lemziak leh kermawi lam hi IPR Department enkawl turah dah a ni ta mai a ni thei ang em?
Thlalak, lemchan, lemziak leh kermawi te hi 'Information & Public Relations' tihte nen sawi zawm luih tum ṭâlh chuan sawi zawm theih chi a ni mai thei a. 'Art & Culture' nen erawh chuan sawi zawm luih pawh ngai lovin a inzawm sa a, a inkungkaih sa a, 'Art' hi a nihna tak zawk a ni.
Kan sawi department pahnihte hi an lian lo ve ve a. An hming ang tak hian an khawih awm tak ni chin hi chu ṭha taka khawihin enkawl se a duhawm. Art & Culture Department buaipui tur ni âwm tak IPR Department-in an buaipui daih hi department lian lo tak an nih si avangin an buai phah hlein a rinawm.
Chuvangin, thlalak (photography, videography & cinematography), lemchan (film & decumentary), lemziak (painting) leh kermawi (sculpture) te hi enkawla buaipuitu tur tak ni âwm tak Art & Culture Department hian buaipui tawh se. Chutiang tur chuan sawrkar hian hma la se a ṭha hle ang le.
- Zoramchhana