THE BIBLE SAYS SO!
Rinna thu te, Isua lala pawm thu te, piantharna hi Isua lal atana pawm, a lalna rama luhna a nih thu te, piantharna chu Lal Isua lalna ram (kingdom)-a luhna a nih avangin mahni thu leh duh dana nung tawh lo tura Lal Isua kuta in-surrender-na a nih thute kan sawi ta nual a. Simna kan tih hi Eden huana Evi leh Adama ten Setana bumna avanga Pathian thuhnuaia awm an duh lohna thinlung paih thlakna, mahni thu ni tawh lova Pathian thu thua nung tawh tura fapa tlanbo, tlawm tak maia a pa a pan anga Pathian hnena hawn lehna a ni kan tihte kha Pathian thubul, Zoram mipui tam takin kan tluksan tak thute an ni.
Thuhriltu pawh hian heng thubulte hi kan tluksan nasa ta lutuk a, paih thlak tur bera kha kan chawi vawng ta mah mah a. Mahni lam inpaihthlakna awm lovin, Lal Isua lalna hnuaia inphah chuang lovin, man awm lova chhandamna thu-ah eawh chuan “Keimah avanga nun chan chuan (chatuan nunna) a hmu ang” (Math 10:39) tih a ni a. Johana pawhin “Mahni nun thlahleltu chuan chatuan nunna a neih dawn loh thu” (Johana 12:25)a sawi kha. Mahni (self) pian tanna chu Genesis bung 3:6 kha a ni a, an chhiat phah nghal ta reng a. Pathian lalna hnawla anmahni thu (it’s my life) an lek kawh taka vang khan Pathian awmna hmun ata chu hnawhchhuah an ni ta. Tichuan Pathian awmna hmun vanrama lut leh tur chuan, Pathian hnen ata paih chhuah kan nihna chhan, mahni thua nun kan duhna tak kha paih a ngai! Kha kha Setana nun chiah chiah a ni (Johana 8:44; Math 23:33). Kha kha paih rawh, hei ngei hi a ni simna dik tak chu. Pianthar chu mahni thua nung tawh lohva Pathian lalna hnuaia tluk luh hi a ni.
Chhandamna thuhriltu hna hmasa ber chu, kha piangthar lova khan mahni nun, mahni duh zawng, mahni thu paiha Pathian thu thua nung tawh turin a inpe thei em tih kha a ni. Chhandamna hi thil tha tak pakhat neih kan duh ve mai ang ngawt rilru atangin a neih theih loh. A lova awm thei tawh lo, chatuan nunna a neih theih nana daltu nei tawh lo, a thil duh ber, a tel lova a awm theih tawh loh, chatuan nunna ka neih loh chuan ka eng tih mah a tui tawh lo tih rilru put a ngai. Tawngkam thiama invalh awha Lal Isua inpawmtir mai mai chi a ni lo.
Lal Isuan simna awmze dik tak, chatuan nunna phur chhuak min hrilh chu fapa tlanbo kir leh thu kha a ni (Luka 15:17). Fapa tlan bo khan thih mai a hmabak tih a inhria “Kei lah chu hetah riltamin ka thi dawn si a” tiin a thih loh nan, a dam theih nan engkim huamin, mi azawnga hnuaihnung ber nih pawh huamin, a Pain a tih tiha a lo tih atan, chaw ei tur a neih dawn phawt chuan, tumruhna thuk tak nen simna ke a pen a nih kha.
Chhandamna hna Lal Isuan A siam dan inhrilfiah mai ni lovin, kha pianthar duhtu khan thih ngam khawpin a duh em? Mahni inthihsana Pathian lalna rama A thu thua nun chu a huam tak meuh em? Simna thinlung neitu chuan Rom 12:1 hi harsa an ti ngai lo!
- F. Lal Thanzuala, 9436141242