Biological clock

Mak tak mai chu, Pathian hian a thilsiam nunna nei zawng zawngah ngawi renga hunbi nei taka taksa peng thununtu sana rinawm tak Biological Clock a dah a. Tuma hrilh leh thupek miah lohvin khawvar dawnah ar a khuang a, lo sûl haw hunah thereng a hram ṭhin. Nipui emaw, thlasik inher chhuah dawn apiangin ransate an pem ṭhin. Tui takin zanah kan muhil a, zing khua a lo var a, kan lo harh leh mai ṭhin.

Eng nge Biological Clock chu?

Biological Clock chu thil siam nunna nei, taksa peng hrang hrang hnathawh dan hunbi thliah (timing system) fel tak nena thununtu a ni. Mihringte hian Biological Clock angkhat kan nei vek a, kum azir te, chenna environment leh ni tin nunphungte hian a hnathawh dan a tidanglam ṭhin. Biological clock hi chi hrang tam tak kan nei a, chi thumah ṭhen a ni.

1. Master Clock: Pakhat kan nei. Thluak chhunga chhia leh ṭha hriatna thununtu ber Suprachiasmatic Nucleus (SCN)-ah a awm. Kan taksaa clock zawng zawng a thunun.

2. Peripheral Clocks: 12 vel kan nei. Kan taksa peng (liver, heart, pancreas, kidney, etc.)-ah a awm vek a, an hnathawh dan an thunun.

3. Cellular Clocks: Maktaduai tam tak kan nei. Kan tisa mur (cell) tinah an awm a, cell siamrem leh ṭhan dan an thunun.

Biological Clock hnathawh dan leh ṭangkai

Biological clock hrang hrangte hian rualkhai taka anmahni timing ṭheuha kan taksa ṭha taka an thunun chuan muttuina, rilru sâwrbingna, rilru zângkhaina, ṭhan ṭhatna leh hriselna ṭha kan nei thei.A hun leh hmun azirin rang takin kan taksa a insiamrem thei bawk. Clock timing inher chhuah (cycle) rei zawng leh kan taksa an thunun dan zirin chi 4-ah an ṭhen a.

1. Circadian Rhythms: Kan biological clock pui ber (master clock) a ni. Darkar 24 dan zelah kan chenna lei vir dan (day–night cycle) milin mut leh thawh hun (sleep–wake cycle), taksa temparature leh taksa harhvanna leh tuanrang zawng, taksa chhe lai siamṭhat, ṭhantir leh kan rilru puthmang (hlimna, lungngaihna, thinrimna) thununtu ber a ni.

2. Infradian Rhythms: Zawi muang raihin weekly, monthly, seasonally-in a inher chhuak thin. Hunbi fel tak nen inthlah chhawnna lam (menstrual cycle) thununtu leh sik leh sa (nipui, thlasik, fûr) mila mihring rilru puthmang thununtu a ni.

3. Ultradian Rhythms: Kan taksa hnathawh dan hrang hrang lungphu leh thawk ran zawng, rilṭam leh chaw pai ṭawih hun, leh mut hun englai pawhin thunun. Taksa peng hnathawh short-term balance enkawltu a ni. Ni khat chhung lek pawhin vawi tam tak a inher chhuak.

4. Circannual Rhythms: Kum khatah vawi khat a inher chhuak. Sik leh sa inthlak leh awmna hmun (time zone) inthlak azir zela kan taksa dan leh rilru puthmang (mood) thununtu a ni.

Biological Clock zingah Circadian Rhythms hi kan hriat lar ber leh kan taksa clock dang zawng zawng thununtu ber a ni. Kan mit (eye) aṭangin eng leh thim signal a dawng a, hemi mil hian kan taksa a thunun ṭhin. Khua a lo thim hian sleep hormone a tipung a, mut a chhuak a, kan muhil ṭhin. Khua a lo var hian eng (light) signal a lo dawng a, mutchhuahna (sleep hormone) titlem tur turin thluak a hrilh a, kan thluak a lo harhvâng a, kaihthawh chawp ngai lovin kan tho mai ṭhin. ‘Mi pangngai chu Biological Clock-in a kaitho va, mi thatchhia leh mâwl erawh chu chhungte’n an kaitho ṭhin,’ an ti.

Kan tunlai nun danin Biological Clock a chawk buai

Thiamna a pung chho zel a, hmanraw ṭha zawk a rawn chhuak a. Hengte hian kan nunphung leh hnathawh dan leh chaw ei hun nasa takin a her danglam a. Information Technology (IT), social media leh artificial intelligence (AI)-in min chîm hnuah phei chuan kan biological clock pawhin mumal takin hna a thawk thei meuh ta lo. Zing ni chhuakin min kaitho zo tawh lo a, zan thimin kan mut a tichhuak hek lo. Smartphone leh tablet screen hmangin naupang kan awm tlei a, ṭhalaite’n zan rei tak thlengin phone leh computer kan khawih a, puitlingte pawh WhatsApp message vangin zan rei tak thlengin kan meng. Kum upate pawh TV leh mobile vangin hma takah an muhil thei bik tawh lo a, zan reiah phone call-in a kai harh fo bawk. Ngawi renga chhungril lam aṭanga hunbi awmze nei taka min thununtu Biological Clock hian thil tih theihna a nei tlem tial tial ta.

Harsatna a thlente

Taksa thunun thei lo khawpa Biological Clock tihbuai a nih chuan rilu leh taksaah harsatna tam tak thlen thei. Zan hmut hun leh zing thawh a tibuai a, zing kan tho tlai a, nilengin kan nguai. Zirlaite class-ah an harhvang thei lo a, uluk takin an ngaihtuah thei lo. Taksa a ṭhang ṭha thei lo a, taksa chak lohna leh hrisel lohna hrang hrang an nei ṭhin. High school leh college-a zirlaite dam loh vanga casual leave dil tamzia aṭang hian kan hrethiam mai awm e. Harhvang tak tura ngaihte pawh an nguai a, an inthlahdah viau ṭhin bawk. Kan thatchhe tulh tulh a, kan nih tur ang kan ni phak ta lo a ni ber e.

Inven dan

A pawimawh ber chu hunbi mumal taka mut leh thawh a ni a; zan men rei loh leh thawh hma a ṭul. Zan dar 10 aia tlai lova mut leh zing dar 6 aia tlai lova thawh te, hunbi mumal taka mut leh thawh te, tui in leh chaw ei hi kan Biological Clock mila khawsak dan pawimawh tak a ni. Darkar 24 chhunga kan taksa êng leh thim balance taka dawntir a ṭul. Zan lama phone/computer-te hi night mode dah a ṭha. Mut dawna bedroom light off hi taksa tan a ṭha hle. Chhunah room chhunga inkhung reng lo va, boruak ṭha leh ni êng taksa dawntir. Zingkara zing ni chhuak hmu hmana thawha regular taka exercise lak.

Naupang leh ṭhalai nun chhiatna tam ber hi Biological Clock nena inmil lo lutuka technology hmanrua kan hman vang leh zan rei thleng awh tur programme kan siam hnem lutuk vang a ni fo. Naupang awm tlei nan smartphone kan hmang nasa hi a ṭha lo hle. An mit hian ni êng (natural Light) aia screen êng a hmuh hnem lutuk chuan an Biological Clock a buai a, taksa hrisel lohna leh rilru buaina an nei thei. Screen timing hi fel taka ni tin control a pawimawh.

Tunlaiah ṭhalai tan internet, social media leh mobile apps bakah, entertainment, sport leh kohhran hnuaia rawngbawlna peng hrang hrangte hi thil ṭha tak angin a lang a. Mahse, Biological Clock nen kan her mil loh chuan kan mut leh thawh hun tibuaitu, kan hriselna tichhetu, chhungkaw lungrualna tichhetu leh kan future career thlenga tichhetu a ni thei. Mimal, chhungkua leh khawtlang siamṭhatna hi kan Biological Clock mila kan khawsak leh khawsak lohah a innghat thui hle. Pathianin mihringte hnena a chhia leh ṭha hriatna thununtu min pek hlu tak Biological Clock hi kan hriselna leh damr eina hnukpui a nih miau avangin hlamchhiah lo va, kan taksa ṭha taka a thunun theih tura kan insiamrem a ṭul hle.

- Er. Chhungpuia Renthlei, Senior Technical Officer, NIELIT Aizawl