Hmangaih berte lênna kawngpui hi
Ka hriat phak chinah tunlai hi hmangaih berte lênna Kolasib khawpui chhunga kawngpuite a chhiat ber lai a ni. Hei hi kum 40 râl kai tawh valin ka hmuh dan a ni.
Kan Kolasib khawpui chhung kawngpuite hi tunah hian a chhe tak zet zet. Hmun tam takah a khuar kêk kûk a, kan insawh dawt dawt a. Kan tlan khu rum rum mai bawk a; lo hâl vanglai khû ang mai a ni (kawngpui khû leh lo hâl khû inang lo mah se). Kan va khawngaihthlak tak em. Keimah ka inkhawngaih a, kan khaw mipuite hi ka khawngaih bawk a. Kan khaw mi ni lo, kan kawng chhiatzia min rawn hmuhpuitute pawhin min khawngaih ngei ka ring.
Tunlai chu Kolasib khawpui chhung kawngpui chhe lutuk hi a châng leh ka thinrim ṭûn a, a châng leh ka nuih a zâ. A chângin Mizoram sawrkar hi ka dem em em a, ka thin an tirim a; a châng leh ‘An theih tâwkin an enkawl a, hei hi an tih theih tâwk a ni, anmahni nen a inhmeh tâwk viau e,’ te ka ti leh ṭhin thûl!
Engpawhnise, Mizorama khawpui hmun rualrem ber Kolasib kawngpui chhung kawngpuite heti tak maia a chhiat chhanah hian mawhphurtu ber chu Mizoram sawrkar hi a ni. Sawrkar hian chhuanlam tur a nei lo, chhuanlam siam hlek suh se; ‘an nêp lulai lutuk vang’ tih bak a chhan dang a awm lo.
Kan Mizoram sawrkar hian kawngpui chhiat chhanah ‘fûr’ tih hi a chhuanlam dawn em? Fûr hi chhuanlam tling a ni lo. Kum tin fûr a awm, fûr hun chhung rei deuh kum leh rei loh deuh kum te pawh a awm. Fûr rei kum a ni emaw, ni lo emaw, kum kha leh chen fûr kan lo paltlang tawh chhung khan tun ang rêng rênga Kolasib khawpui chhung kawng a chhiat rualkhai hi a la awm ngai lo tih hi kan sawrkar hotute hian lo hre mawlh teh se.
Kolasib khawpui chhunga national highway bik chu Mizoram sawrkar (PWD) enkawl a ni lo ngei mai a, mahse, national highway ni lo, kawngpui tam zawk hi chu Mizoram sawrkar enkawl a ni. Chuvangin, tuna kan khawpui duh tak kawngpui hrang hrangte a chhiat em em chhan hi chu Mizoram sawrkar mawh liau liau a ni.
Kawngpui ṭha pek min tiamtu, kawng siam pawh kum 15 daih khawpa tlova siam tura insawi tuna ZPM party kaihhruai sawrkar hi zak mawlh rawh se. Kawngpui chungchanga an thutiam leh thil sawite leh kan tun dinhmun hi inpersan tak hi a ni ringawt mai; ‘chhim leh hmar ang’ kan ti dawn nge, ‘chhak leh thlang ang’ kan ti dawn? ‘Lei leh van ang’ kan ti zawk dawn em ni ang?
Ka han âng viau tak nâ a, thuhnuairawlh leh inngaitlawm tak chungin Mizoram sawrkar hi ka ngen duh: kan Kolasib khawpui chhung kawngpui chhe lutuk hi rawn siam vat teh u. In rawn siam vat loh chuan, in rawn siam lo a ni mai!
- Zothansanga