Vai pung nasa; inven a ngai

Kumin aṭangin Mizoramah hnam dang (vai) an pung nasa a, hei hian hmasawnna nge a thlen dawn, chimralna tih hriat a har viau. Hmasawnna ai chuan engkimah min chimralna hmahruai a nih a hlauhawm khawp mai.

Rêl a lo luh hma kha chuan Mizoram hi tlawhpawh harsa khawpin kan kawngpuiin a zir lo a, ei leh bar lak luh kawngah pawh kan harsa. Tunah pawh kan lifeline kawngpui chhiatzia kan hria a, hetiang kawng chhiaah chuan phai lam mikhual pawh an tlem deuh.

Rêl a lo luh takah chuan mikhual an pung nasa. Rêl rawn lut hian eng malsawmna nge min thlen dawn a la hriat loh a, bungraw hrang hrang man a tlakhniam beisei phawt ila, kan la hmang /angkai zel turah ngai phawt ang.

Inner Line Regulation hi khauh lutuk leh fîr lutuka kan kalpui chuan Central lamah ngaihmawhna a lian thei a, chuvangin, sorkar leh NGO ang pawhin kan ILP neih hi over khawpa chelek emaw, chhuan em em loh a ṭhat a rinawm. Sorkarin khawng tak si, fimkhur taka a kalpui a ṭha. Hman ni lawkah Sairang rel station tlawha endik kha thil lawmawm tak a ni.

Phai vai an pung kan tih rualin, Mizo hnam pêng eng eng emaw pawh an pung nasa hle a, Aizawl khawpui chhungah pawh Lusei ṭawng hmang lo an pung nasa viau mai. A bikin Burma unaute an rawn tla thla nasa a, hnathawh lamah lah kan tluk lo bawk si a, an taihmakna khûm tur chuan kan tawrhchhel pawh a ngai viau mai.

Burma mi, foreigner pawh hi veng tinah kan enkawl khauh deuh a ngai ta. Veng ṭhenkhatah local council leh YMA ten lehkha an siamsak duh loh laiin, LC tharte’n an pe chhuak fo niin sawi pawh a awm. Hei hi YMA ang pawha check fo a ngai a ni. Local council-te chu political party an ni a, vote zawng reng an nih vangin YMA hi kan rin ber an ni a, anni baka khawtlang leh ram tana ṭha an vâng viau a ni.

Vai sawi leh ta ṭhin ila. Hnathawka kan sponsor a nih pawhin kan chhawr zawh tawh hnuah kan sezâwl chhuak ngawt tur a ni lo. Kan hmingin Mizoramah an awm a, kan khuahkhirh tawh si loh chuan min chimraltu tur an ni.

Mizote hi hnam mâwl tak, mahni ram leh hnam hmangaih miah lo hnam kan lo ni. Mahni kan hlawk chuan ram leh hnam chhe vek mah se pawi tihna nei miah lo hnam kan ni.

Kan hmeichhe tam tak lah hi hnam dang thurualpui duha sumdawnna lama kalte an tam khawp mai. Sex hmanpui hreh lo, hotel-a pawisa hlawha vai mutpui duh an tam khawp mai. Hengho hi han zilh dawn ila, mita man chhuah a awm si loh chuan kan ṭanna a dik lo thei dawn bawk si.

MNF rammut laite kha a ngaihawm ta rum rum mai ka ti. Remna hlu tak neiin state ralmuang ber zinga mi kan ni a, a chhiat erawh phal chi a ni lo ang. Mahse, underground hlawm lian tak, chak taka kal erawh nei leh ila tih a awl rum rum mai a lawm le.

- Lal Rinmawia