MIZORAM LEH SUMDAWNNA Eizawnna Nghet leh Sumdawnna Hlawk ber
Khawvel ram ropui zawkte leh India ramah ngei pawh eizawn nana sumdawnna an kalpui dante hi kan varpawh ve a hun tawh hle. Chuvangin, mahni tapchhak zawl aṭanga thil changkang chi hrang hrang kan sawi-rawtui em em thei ang hian, eizawnna leh sumdawnna hi a tak ram leh hmuh theih, deh theih reng tura kalpui a ngai a, thu chauh, hla chauh a ni ve lo.
Mizoram mipui tam berte’n sumdawnna kan varpawh dan ber chu company thil siam bungrua (product goods) aṭanga hralhna (market sales) kalpui hi a ni deuh mai a. Bungruate lo hralhsaktu nihna (company agent & seller) leh a hlawkna tlemte te (fixed share %) hmu ve tura dawr siam hi sumdawnna changtlung ber leh hlawk berah kan ngai; a dik reng mai.
Nimahsela, kan sawi tum ber zawk chu eizawnna nghet leh sumdawnna hlâwk ber a ni thung. Mizoram chhunga kan kutkawih ve theih loh chi chu thuhran, mi dangte bungraw zawrh hawhsak a, hralhsaktu satliah mai mai ni lo, eng item pawh chu ni se, company bungrua leh market bungrua ni tura kan seng luh dan tur luhchilh vena lam zawk hi kan sawi ber chu a ni.
Khawvel thiamna (technology) hrang hrang hmanga eizawnna tura sumdawnna nghet ber leh hlawk ber innghahna chu ram leilung (agri-land) aṭanga thil dehchhuah a ni. A kalpui dan tur kawng hnih a awm; agri-business leh agri-clinic a ni. Agri-business chuan leilunga thil dehchhuahte chu eizawnna tur leh sumdawnna hlawk ber ni turin a kalpui a; agri-clinic chuan chung thil dehchhuahte chu enkawl puitlin zuina a kalpui bawk.
Hetiang aṭang hian tualchhung mamawh, ram chhung mamawh leh ram pawn mamawh a inthliar fel vek. Chutiang zelin, khawvela eizawnna tlak sumdawnna hlawk ber inṭan dan pawh mahni leilung ngeia thar chhuah aṭanga tualchhunga mamawh hralh chi (local demand direct market) te, ram chhunga mamawh hralh chi (national demand indirect market) te leh ram pawn lama mamawh hralh chi (international demand indirect market) kalpui theih item neih a ngai. Hei hi company tam berte inelna chu a ni. Hetiang kawng zawh tur hian thar chhuah tur item aṭanga suar tluan vekna, agri-business leh agri-clinic system (planting materials to cultivation, products processing to marketing) dik taka kalpui a ngai.
Tunah hian Mizorama ni tin mamawh lian tak pathum chauh aṭanga ram dang hnena sum kan pek chhuah tarlang ila. Tel–hriak (oils seed product refined oil) lamah thla tin cheng vbch. 70 aia tam, bawnghnute (dairy milk) lamah thla tin cheng vbch. 40 aia tam leh, kan ran vulh vawk, ar leh sangha chaw (animal feed) lamah cheng vbch 30 aia tam; a vaiin cheng vbch. 140 kan theh chhuak hiau hiau mai!
Eizawnna tlak sumdawnna hlawk ber kan tih, a hlawkna pumhmawm vek theih chi, tualchhunga mamawh hralh chi (local demand direct market) pakhat, ran chaw atana ṭha ber (natural readymade feed) an tih erawh chu tunah hian Mizoram district hrang hrangah mimal sumdawng ṭhenkhatin an kalpui ve ta der mai; a lawmawm hle. Thil ṭha zawn chhuah hi kan zavaia tan a pawimawh hle.
- F Vanlalpeka, IMCS, Aizawl. 8837056218