Kawng siamna atan sum pek chhuah belh a ṭul

October 21, 2025-a Vanglaini chhuakah Finance Department hotute hnen aṭanga thu an dawn an tarlanah khan, Road Maintenance Cess-ah hian kum 2024-25 chhung khan cheng vaibelchhia 15 hmu tura an inbeisei chungin an hmu hman lo va. Chuti chung chuan kum 2025-26 budget-ah cheng vaibelchhia 15 dah tho a nih thu leh, um 2025-26 ah hian Road Maintenance Cess atan vaibelchhia 25 hmuh tura beisei a nih thu an chhuah a.

RTI Act hmanga zawhna aṭanga chhanna dawn aṭangin Road Maintenance Cess hmanga sorkarin chiah a khawn ṭan ni September 3, 2025 aṭanga March 31, 2025 thlengin Road Maintenance aṭanga chhiah an khawn zat cheng vaibelchhia 13.31 a ni a. Heti chunga sorkarin kum 2025-26 atan Road Maintenance atan vaibelchhia 15 a dah thei hi a lawmawm hle.

RTI zawhna min chhanna aṭang leh Taxation -in an tarlan danin, kum 2025-26 chhung hian September 2025 thleng khan Road Maintenance Cess aṭangin sorkarah chhiah cheng vaibelchhia 24.51 a lut tawh a, a vaiin chhiah khawn tirh September 3, 2024 aṭangin vaibelchhia 37.82 chuang zet zawt a lut tawh tih a lang. Chhiah khawn chak kawngah hian sorkar an fakawm hle a ni.

Tunlai Mizoram kawng a chhe hle a, kawng siamna atan sorkarin sum a dah hian kawng siamna tur atan a indaih lo hle tih a lang chiang reng mai. Kawng chhia hi Mizoram khaw mipui hian kan tuar tawh hle, kan mangang tawh tak zet. Kawng siamna atan pawisa awm tawh reng laiin nakum innghahtir tlat hi a kalhmang lo hle a, bakah a chhuanmang rorel tak zet a. Mipuiin kawng ṭha kan mamawh tawh a, kan mamawh phuhhrûkna turin tuna pawisa awm sa hmang hian Mizoram sorkar hian tuna awm ang ang hi kawng siam nan a hman mai hi a tih tur awm reng, a tihmakmawh a ni.

- Lalhruaitluanga Bawitlung