Car changkâng, a neitu changkâng si lo
Mizoramah hian car changkang tak tak a tam ta hle mai, a bik takin Aizawl khawpuiah a tam lehzual. Mahse, car changkang, man to tak tak nei zingah hian rilru changkang tel si lo erawh an va tam si em!
Aizawl khawpuiah hian ka neih phak ve tawk bike leh scooty hmangin ka tlan kual ve nasa ṭhin a. Tun hma deuh aṭanga tunlai thleng hian motor chhung aṭanga khawlai kawngpuia bawlhhlawh paih chhuak ta mai zel leh chil pik chhuak ta mai ṭhin hi ka va hmu tam tawh tak.
Motor/car chhung aṭanga bawlhhlawh paih chhuak mai ṭhin leh chil pik chhuak mai ṭhin zingah chuan car changkang tak tak khalhtute leh a chuangte pawh an bâng bik lo. Car changkang, man to em em, cheng nuai sawm têl man chhung aṭanga khawlai leh kawngpuia bawlhhlawh paih chhuah mai zel hi a inhmeh lo lehzual. Car a changkan viau laiin, a neitu leh khalhtute erawh an changkang tel si lo a ni ber awm e.
Car changkang tak tak neitute hi an rilru changkang tel ve tawh se, chutiang bawkin motor changkang vak lo neitute pawh; motor/car chhung aṭangin khawpui kawngpuiah bawlhhlawh paih tawh lul lo teh u. Motor chhung aṭanga khawpui chhung kawngpuia bawlh-hlawh paih leh chil chhâk hi a ṭhing.
- Vanlalsanga