Pu Zoramthanga vs Pu Lalduhoma
AN INANNA LAM:
1. Thingtlang khaw tereuhtea piang ve ve an ni. Pu Zoramthanga Samthang khua a ni a, Pu Lalduhoma chu Tualpui khua a ni.
2. Champhai-ah high school an kal ve ve.
3. Mumal takin college (BA) an zir tluan lo ve ve a, ṭha takin an hlawhtling (pass) ve ve thung.
4. Harsa tak chungin zirna kawng an zawh.
5. Kum 1961-a MNF movement tuipuitu an ni.
6. Ziaktu pawimawh Secretary hna lian an thawk ve ve. Pu Zoramthanga chu underground hotupa MNF President leh state kan nih hnua Chief Minister hmasa ber Pu Laldenga Secretary (PA) hna ramhnuai aṭangin a thawk ṭhin. Pu Lalduhoma chu Mizoram Union Territory (UT) kum 1972-a Chief Minister hmasa ber Pu Ch. Chhunga Secretary (PA) a ni.
7. Mizoram MLA pawimawh leh Chief Minister an ni.
PU ZORAMTHANGA
* 1986 (Interim Govt. Minister)
* 1987 (Minister)
* 1989 (Minister/MLA)
* 1993 (MLA)
* 1998 (Chief Minister)
* 2003 (Chief Minister)
* 2008 (tling lo)
* 2013 (tling lo)
* 2018 (Chief Minister)
* 2023 (tling lo)
Vawi sarih MLA niin, term thum Chief Minister a ni. MLA inthlan kum 1998 leh kum 2003-ahte bial hnihah thlan tlin (kawp) a ni tawh a, MLA inthlanah vawi 3 a tla tawh.
PU LALDUHOMA
* 1984 (INC- Lunglei tling lo)
* 1987 (MNU- Champhai tling lo)
* 1989 (MNU- Champhai tling lo)
* 1993 (MNF- Bilkhawthlir tling lo)
* 1998 (MNF 'N'- Aizawl South II tling lo)
* 2003 (ZNP- Ratu tling, Aizawl South II-ah a tla)
* 2008 (ZNP- Aizawl West I-ah tling, Tuivawlah a tla)
* 2013 (ZNP- Kolasib leh Aizawl West I-ah tla ve ve)
* 2018 (ZPM–Serchhip leh Aizawl West I-ah tling ve ve)
* 2023 (ZPM- Serchhip tling)
Pu Lalduhoma'n party hrang hrang paruk ticket hmangin MLA inthlanpui vawi 10 a chuh tawh a, vawi 4 a tling a, vawi 6 a tla tawh.)
8. Lehkhabu eng emaw zat an ziak ve ve.
9. Bible chhung thu an hre viau.
10. Thusawi thiam an ni, mi hneh theihna an nei ve ve.
11. MLA an nih laia an thusawi a ngaihnawm a, Chief Minister an nih hnuin an thusawi mipuiin awih harsa tih an ngah ve ve.
12. A taka chang mai thei tura ngaih loh, hmasawnna rahbi tuk an nei tam ve ve.
13. Chief Minister an nihin department chanvo 'portfollio' an chang hraw ve ve.
14. Pakhatin duhthusam a sawi nasa ṭhin a, pakhatin chu aia ûchuak leh uar zâwkin awih ngam loh tur a sawi tam.
AN INAN LOHNA LAM:
1. Pakhatin a sorkar laia a hnathawh ropui tak takte chu Pathian leh mipuite zâra thawk leh hmu thei a nih thu a sawi tam a. Pakhatin a tih ni chiah lo-ah pawh insawi luh ve mai a ching.
2. Central sorkar NDA/NEDA (BJP) kaihhruaiah Pu Zorama chuan a dintute zinga mi an nih thu leh NEDA an din chhan chu, 'India ram aṭanga Congress hnawh bo' (Congress Mukh Bharat) a nih thu a sawi a. BJP nen inthlanna chuhho (election alliance) erawh a duh lo thung. Pu Duhoma chuan BJP nen thawhho a, BJP nena la inchhunfin mai pawh a hnial loh thu a sawi a. BJP nen thawhho step khatna rah phawt a, a step hnihna a hlat loh tur thu a sawi.
3. Assam Rifles sawn chhuah chungchangah Pu Zoramthanga chuan kum 1989 aṭangin a nawr tawh. Engkim AR-te sawn chhuahna tur hmun Zokhawsangah a peih a, eng emaw zat a sawn phei hman. Pu Lalduhoma chuan khawpui laili aṭanga Assam Rifles sawn chhuahna tur a sawi ngai lo mah se, a nâwlpuia an insawn chhuahna tur hun a nang fuh.
4. Pu Zoramthanga'n khawpui thar New Capital Khatla Assam Rifles awmnaah MINECO a din a. Pu Lalduhoma chuan Thenzawlah khawpui thar din a tum.
5. Kawng (NH leh state highway) enkawl kawngah pakhatin tû mah a mawhpuh hriat tur a awm ngai lo a, pakhat chuan NHIDCL a mawhpuh ṭhin.
6. Pakhat zawk Chief Minister a nih laiin ram pum huap harsatna mautâm leh Covid-19 pandemic a thleng a. Central ṭanpuina hai lutin ram a dam khawchhuahpui leh hrâm ṭhin. Pakhat zawk chuan khuarel chhiatna ram pum huap tuar ve lo mah se, kawng, zirna, hriselna, tui leh power supply-ah mipui phunnawina a dawng tam thung.
7. Huau huau leh nawmsipbâwlna lama tel ve tura sawmnaah pakhat a kal ngai lo va. Pakhat zawk chu USA zin, India ram hausa fapa nupui neihna leh lozawh, Hnahsin kût tih velah a hmanhlel hle.
8. Pakhatin Burma hel pawl Arakan Army te ṭhianah a siam a. Pakhat chuan, Lawngtlai thlenga min rawn lâk mai a hlau!
9. Pakhatin Lengpui Airport, Zoram Medical College (ZMC) humhim tlat a duh a, pakhatin hralhna a zawng thung.
10. Pakhatin Forest Conservation Ammend-ment Act 2023 ‘kan ram hralhna dan' an tih mai chu duh lohna resolution ram rorelna khâwl sâng berah a pass a. Pakhat zawk chuan FCAA 2023 dodalna leh duh lohna hlipin a pawm (adopt) thung.
11. Pu Zorama'n sawhthing, hmarcha, aieng leh hmunphiah te a rate ṭha zawka la thei, state ṭhenawm, hnam dang mite kutah a dah mai ṭhin a. Pu Duhoma chuan, 'kan lei sak vek dawn, a man bat kan tum lo' ti chungin, kut hnathawktute thlai thar hralhna rate a buai a, tun thlengin sawhthing leina a la batsak.
12. Pakhatin kut hnathawktute bul ṭan nan SEDP hmangin ṭanpuina a pe a. Pakhatin bank Loan kal pangngaite chu Bâna Kaih (Hand Holding Policy) hming vuahin, rulh leh ngai loan chhungkaw 702 vel hnenah pek a tum mek.
13. Pu Zorama sorkarah chuan inthlan dawn kumah sokar hnathawkte'n an chanvo hauhin sorkar an nawr a. Pu Duhoma sorkarah chuan tun aṭangin sorkar hnathawk pawl hrang hrangin lungawi lohna an lantir.
- Zobiakvela (Masena)