Isua laka tláktlum leh Missionary nuai khat

Chief Minister, Pu Lal Thanhawla chuan November 11, 2016 khan an Party Office-a thu a sawinaah “Congress Party chuan Isua laka tlaktlum kan tum ber,’ tih a sawi a. Hetia kan ram hotupa berin Kristian tamna rama a sawi hi a inhmeh a. Han chhiar liam mai pawhin, a ropuiin ṭhat pawh a ṭhat hmel viau a, nunin a lan chhuahpui em tih lam chu thuhran.

Isua laka tlaktlum tum thu hi, kawng lehlama ngaihtuah chuan nuihzat thlakna lai a tam hle. Kristiante chuan Lal Isua Krista chu Eden bawhchhiatna lak ata chhandamtu, ama hnena kal apiang chu hnar lo va, a chhandamna a thâwna neitu an ni a. Hetih laia Pu Hawla’n Isua laka tlaktlum thu a sawi tlat mai hi; thu lo thlawn mai a ni em? ‘tlaktlum’ tih thumal ngat phei chu politics ṭawngkam a ni a, Isua laka tlaktlum leh tlum loh hi Kristian zirtirna nen pawh inkalh tlatin a lang. Mitin tana Chanchin Ṭha rawn thlentu hian ringtute lakah tlatlum bik a siam a rinawm hranpa lem lo.

Sorkar lai, ruling party worker-te hian an pute lakah tlâktlum tumin kawng tinrengin an bei ṭhin a, thamna angreng puanhnuai thil te pawh a awm phah hial ṭhin. NGO leh Opposition party-ah te pawh hotute laka tlatlum tura kherh pawl hi chu an awm ve reng reng. Chung mite chuan anmahni hamhaina tur an dap a, mi dang sawiselna leh dah hniam tumna nen, thu dik hrulah tlem belhin an thawhpuite an hêk chhe ṭhin. Chutiang bawkin sorkar Office-ah ngei pawh, pu te duat leh ngainat bik nih duhnain an khat hlawm a. Chuti ang leka Lal Isua laka tlaktlum theih a beisei tehreng emaw ni, kan ram lal hian!

Pu Hawla’n Isua laka tlaktlum a tum dan hi mipui hrilh thei se, a duhawm hle. Pawl angin tlaktlum dan an nei thei a nih phei chuan, dawt sawi leh an thil chín
ṭha lo te kalsanin, Lal Isua lawm zawng an tih hmasak pawh a ngaih hmel. Ringlo mite khawsak dan te, an serh leh sang khawihpui te pawh an tih loh ngam a ngai mai thei e. Congress Sorkar hun hmasa lamah khan Isua aia ṭha zawk leh, Isua chuan amah ringtute chauh a chhandam a, anni chuan Congress ni lo te pawh rangva an dawn tir a, chuvangin Isua aia ṭha zawka an insawi thute pawh hriat tur a lo awm tawh ṭhin.

Engpawh ni se, Lal Isua lakah kan ringtu puite aia tlaktlum bik viau dan hi, Bible kan en hian a awm lem lovin a lang. “Keimah hi kawng leh thutak leh nunna ka ni; keimaha kal lo chu tumah Pa hnênah an thleng ngai lo,” Joh 14:6 tih mai a nih avangin tute emaw aia tlaktlum tum niawm taka insawi hi, Poltics thila Lal Isua hming tihbawrhbanna lam pawh a hawi zawk mah mah.

Aw le, tun hnai vek, Nov. ni 10, 2016 khan MNF President Pu Zoramthanga chuan Missionary nuai khat tirh chhuah a tum thu MNF Block Aizawl South II Inkhawmah a sawi a. Pu Zoramthanga hian Missionary nuai khat tirh chhuah a tum thu hi, Chief Minister a nih lai pawh khan a lo sawi tawh ṭhin.

MNF President Pu Zoramthanga van-duaina pakhat nia lang chu Missionary nuai khat tirh chhuah a tum thu; a thawhpui tute mahin an sawipui ve ngai lo hi a ni. Mizoram chhiarpui kum 2011-a neihah khan mi 11,98,212 (nuai sawm pakhat chuang) chauh kan la awm a. Hetah hian Kristian chu 82% vel kan ni. Chuti a nih chuan Kristian chu mi nuai riat leh singhnih aia tam hret kan awm tihna a ni.

Naupang leh pitar, putar te nen, nu leh pa, kum 50 chin chunglam te han paih vek khan, mi nuai thum (3 lakhs) vel chu ṭhalaiah han chhiar leh ta ila (Missionary-a kal chhuak thei). Chung zinga a tam ber chu zirlai leh, hnathawh lai nei an ni a. Kan innawr lui fe a nih loh chuan, hisap pui thiam a harsa lam deuh. Mahse, Pu Zoramthanga chuan a sawi tlat si! Fiamthu nuihza siam nana an hman nasatzia te hi a chhut ngai lo nge, hre pha turin mipui zingah a awm tlem, tih pawh ngaihtuah tham a awm. Fiamthu pui nana hmangtute hian missionary tirh chhuah lam hi an tuipui ve lo tihna lam phei chu a nih hmel loh va, an awih sak ngang lo a nih hmel zawk.

Mahse, a Missionary tirhchhuah programme chu eng tiang chiahin nge MNF hian ‘Mission’ atan a neih? tih hriat a chakawm. An president-in ‘missionary nuai khat tirhchhuah vision’ hi, ‘fantasy’ (neih phak bâka liama duh-aísam) lek em ni? Tih hlawhtlin theih dan a awm a nih chuan, a tih dan Mizo mipuite leh Kohhrante hi a hrilh ngam tawh tur a ni. A sawi apiangin a thawhpuite ngei pawh, an inmit sir ru relh relh ṭhin, ni te’n an sawi a. America President, Donald Trump tlin anga tling ve mai tur niawma a han insawi te phei kha chu mipui hian eng barah mah an khawn lo a nih hmel.

Pa ṭawng hmang thiam leh ṭawng tuitam, Pu Zoramthanga hian ‘Switzerland of the East’-a Mizoram siam a tum thu te, ‘Sapthei’ a sawimawina lamah, ‘blue diamond of mizoram’ a han ti te, Mizoram chu Little England-a siam te a sawi tui thei em em. Ṭhangtharte hriat zui dan erawh, fiamthu thawh nan tih chauh a ni. Mau leh raw ṭha chi a sawi te pawh, Missionary nuai khat ang tho, a kaihhruai party te’n sawipui tur an hre lo.

Khaw tina mau leh raw herna khawl dah a tih te pawh, khawi siam leh khawi ram aṭanga lakluh tur nge, tih a la sawi lo a. A khawl sawi leh a raw ṭha chi sawite hi Mizoram hian a la hmelhriat ngai loh vangin, mumang ram sawi mai maiah mi tam takin an ngai tlat. Chuvangin, Mizoram aṭanga Missionary nuai khat tirh chhuah a tum thu hi chu, Kohhrante thlawpna beisei luat tuk thil mai maiah a ngaih sak loh theih ṭhin lo.

Aw le, Pu Hawla’n Isua laka tlaktlum an tum thu a sawi te, Pu Zoramthanga’n Missionary nuai khat tirh chhuah a tum thu te han en hian, kan Politician-te hian Kristianna behchhanin sorkar siamna kailawn zawh theih an inbeisei ni berin a lang a. Mahni Kohhran lawinaa rawngbawltute hian, kan Kristianna hi an sawp mah mah em? tih hi ngaihtuah tham a awm a. Ram tan thil ṭha ti turin inel se la, a takin anmahniah Kristian, ringtu ṭha nihna hmel lo lang tawh zawk rawh se.

- Lalruatzuala (Zuazuala)