Thingtlangah bazarpui
Krismas bazar hun kan hnaih leh tawh a, thingtlang aṭangin Aizawlah bazar turin a sang tel an kal leh dawn a, Aizawlah mai pawh ni loin, District khawpui hrang hrang bazar te chu an lûn leh hle ang. Aizawlah phei chuan bazarah kal hleih theih loh khawpin mipui kan pungkhawm leh dawn a, a kal pawh kal loin, a nekin kan innek tawlh leh dawn a ni.
Hetiang hi kum tina Aizawl bazara kan bazar dan a ni a, a hahthlak hle. Thingtlang mite Aizawla bazar tura an rawn kal hian sumo chuan manah pawisa tam tak an chawi phawt a, kal kawnga chaw ei manah te, thil dang neuh neuhte nen Aizawl pana an kalna chauhah pawh pawisa tam tak an seng phawt a. Aizawl an thleng a, bazar pan turin taxi chuan manah sum an sên leh fe a ngai. Mipui an lo tam avangin an duhna hmun dawr an pan hlei thei lo a, an hmuh hmasak leh kal awlsam an pan fur bawk. Thawmhnaw leh Krismas atana an mamawh lei tura an kalkawngah ringawt pawh hian sum leh tha tam tak an seng a ni.
He harsatna hi kan dawrkai liante tan hian malsawmna ṭha zawk leh, sumdawnna kawnga hlawk zawka hman theih a ni a, kan dawrkai liante hian an ngaihtuah thiam phawt chuan kum dang aiin an thil zawrh an hralh
ṭha thei dawn. Chutiang a nih theihna tur chuan thingtlang tana awlsam, dawrkai liante tana ṭha ka rawt dawn a ni.
Thingtlang mite tana khawpuia bazar tura senso dang tamzia tlem kan tarlang. Aizawla rawn bazar kher ngai lo hian, kan dawrkai liante hian awlsamna an thlen thei. Dawrkai liante hian motor lian hmangin an bungrua hi thingtlangah phur ta se. Thingtlang khaw hrang hrang kalpui erawh a ngai kher lo ang. Thingtlang khuate hian an khaw bul hnaiah pan khawm bik hmun an nei ṭhin a, chungah te chuan an bungrua hi phurin, Aizawl rate ang tho emaw, Aizawl rate aia tlema to pawhin zuar ta se, thingtlang mite tan chuan Aizawl kalna senso nena chhut chuan a tlawm zawk tho tho.
Dawrkai pakhat tan an thil zawrh chauh kha a tawk lo ang, pheikhawk zuar leh thawmhnaw zuar te, naupang inawmlemna zuarte kha inthurualin, motor pakhat hmang ho ta se, thingtlang mite tan chuan a ṭha lehzual hle ang a, sumdawngte tan tak pawh a ṭha zawkin a awlsam ang. Mimala insên ngai loin, inthawh ṭawmin a kalna chu a tih mai theih dawn.
District khawpui ang chinah emaw, sub-division khawpuiah emaw chuan tualchhung sumdawng an lo tam tham ve deuh tawh a, Aizawl aṭanga han inphurh chhuah hluai kha a ṭha kher lo ang. Hmun tam takah, tlema hmun chengker deuh zawkah emaw, dawrkai awm mumal lutuk lohna, a bikin incheina leh thawmhnaw lam zawrh vak lohna hmun-ah te a kal chi ang.
Chutiang hmunah chuan kal dawnin an khaw YMA chanchinbu velah emaw han chhuah lawk ila, an tana awlsam-na, dawrkaite tan inhralh tamna a ni dawn a ni.
- Lalropuia Haijang