YMA, ṭang fan fan

November 14 Vanglaini chan-chinbu kan chhiar chuan, Chhinga Veng, Dawrpui, Electric Veng, Saron Veng leh Zarkawt branch YMA-te thawh-hona, YMA Joint Duty-ten Dawrpui School kawtah an hâl a; ruihlo an hâlte chu October 4 leh November 11 inkara an man a ni a, tualchhunga an hralh ṭhinna ang chuan, Rs. 4,94,790 hû a ni.

A inziah zel dan chuan YMA Joint Duty hian New Market leh a chhehvel veng pangaa ruihhlo ti
ṭhin te, rûkrute leh awm ṭha duh lote chu insaseng turin a chah a; kohhran leh mimal tinte chu ṭawngṭaipui tur leh YMA duty-te ṭawiawm turin an ngen bawk. October 4 leh November 11 chhung hian mi 399 an khâwm a; chung zinga mi 58 chu home-ah danin, mi pathum chu police hnenah an hlan.

Excise & Narco-tics hnena hlan mi pahnih leh Child Welfare Committee hnena pek mi pathum an awm bawk.

YMA hi kan chhut chiang ngai em, ram leh hnam taka a taka hlawh nei lova hnathawktu an ni. Hlawh bei lova patling zan khaw tairek thlenga an han duty ṭhin leh ruihhlo dapa chhun pachanga hah taka an thawk ṭhinte hi i hre reng ang u khai.

Hetiang hna hi mipui tam zawkte hi chuan hlawh nei pawha kan thawh duh loh leh kan peih loh tur hna a ni tlat. YMA hi ṭhenkhat chuan an sel a, an
ṭhat loh thute an sawi a, mahse tuna ka YMA sawi hi chu Central YMA ang ni lo, inthlan dawna campaign ve ngai lo Branch YMA intel-khawm ngat an ni.

YMA hi sawichhe ṭhin mahse a aia ṭha pawl a la ding lo a, he pawl aia ṭha hi Mizote hian kan nei leh tawh pawhin ka ring lo a, Mizo hnam tam hian a ṭangkai em em a ni. Tun Krismas lo thleng turah pawh hian kei chuan YMA hi khawng deuh ṭhakin duty se ka duh a, “Its my life” tia midang tana hnawksaka che chi hi chu hmanlai deuha an vaw pawp pawp ang khan vaw leh deuh mai zel mahse pawi ka ti der lo. Mipui tam zawk hlim taka awmtir hi YMA duty te tum a ni a, 100% in ka support.

Hman deuha MTV leh SRS-te kha tute lo sawisel kha? Kha kha awm lo se Mizoram dinhmun chhiat turzia hi kan ngaihtuah ve ngai em le aw? ka ti ṭhin. Mizote hi inti changkang, sapram anga freedom leh liberty tih vel sawia mob rule tia siam
ṭhat duhtu sawisel ching klan ni a, YMA hmalakna hi Mizoram tan chuan a ṭha ber a ni.

- Zosangliana