Tlang hriat Theology (Khawnge Isua a pian?)

Mizo Kristiante hian Lal Isua a lo pian dawn khan a nu Mari leh a pa Josefa te kha Bethlehem-ah khualbuk room-ah lut lovin, khualbuk vengtuin a lo hnar a. Bawng Inah innghat ta ang leh bawng inah chuan Lal Isua kha lo piang ta niin kan ngai deuh ber a. Hnam dang Kristiante hian engtin tak ngai ve ang maw!

Mahse Paula te rawngbawl hun laia Beroia khuaa mite bakah tunlai ringtu fel ṭhenkhatte tih danin Bible-ah en ta ila engtin nge a inziah? Luka 2:7-ah chuan hetiang hian a inziak, "Tin, fa tirah mipa a hring a; puanin a tuam a, khualbuka an len ve tak loh avangin ran chaw pekna thlengah a muttir a". Puana tuam fel vek hnua 'an len tak loh avangin' tih lai tak mai hi ka sawi fiah dawn a ni.

Bible ka chhiar thiam tirh laia he lai thu ka chhiar hi mi sawi ka hriat dan nen a inkalh tlat. Khualbuk vengtu khan room a khah vek tawh avanga luhtir ve ta lo tawp angin kan ngai a. Sermon-ah te, drama-ah te hlaahte nen lam kan tarlang a.

"Khualbuk vengtu suihlung mawlin, Van Lal Renpui ka lung damna; Puan ang a hnawl ta e" kan ti dup dup a. "Khualbuk vengtu ang mai ka ni, Sualin min bawm reng e" kan la ti ta deuh deuh va. Khualbuk vengtu kha a tihsual ni miah lovah kan puh sual let derin ka hria.

Khualbukah khan an leng lo hrim hrim a, an len loh chhan pawh Bible vekin a sawi fiah vek. Khualbuk vengtuin room a pe lo hrim hrim pawh a ni lo e. Lalpa'n Israel-te tana thianghlimna dan a siam avangin an leng ta lo a ni zawk. Lalpa dan siam chu eng nge ni? Lev. 12:4-ah "A inthen ni a kim hma loh chuan thil thianghlim reng reng a khawih tur a ni lo va" tiin. Tlang hran khaw hran, hmun tin hmun tang aṭanga mikhual lo thleng khawm, a ṭhente phei chu tenchhe tak te pawh an ni ang, chutiang zinga Mari nau nei hlim bawlhhlawh khan mi thil engmah a tawk hlek tur a ni lo. Chuvangin, naute nei a, puana tuam fel vek hnuah khan khualbukah khan an leng ve ta lo a ni. Luka 2:7 thu nen khan a inmil ta zan mai le. Kan pawm em?

Kan Pathian chuan a dan siamah chuan a fapa neih chhun ngei chu a inpal awhtir ta a ni. Lal Isua kha mihringte angin a lo piang tlat a lawm. Phil 2:7-ah khan Mihringte Pathian, chatuan thil ruahmanah khan a tel sa vek. Tute rorelna emaw angin inthlei hranna te, dan chunga leng theite an awm lo. Sam 89:34-ah, "Ka thuthlung chu ka bawhchhe lo vang" a ti a ni. Eph. 1:4-ah, "Leilung pian hmain Kristaah min thlan ang khan" tiin min hrilh bawk.

He Pathian thuthlung ropui tak hi an lo hriat avangin a ni ang chu Pu R.L. Kamlala'n thlarau aṭangin hlim takin - "Leilung pian laia talh tawh beram no. A thisenin khawvel chhandam rawh se" tia an lo au.

Khatia Pathian fapa mal pawh khualbuka a len lohna tura Pathian dan siam nghehzia leh rinawmzia chu chhut chian dawl si, chhut phak rual a nih si lohzia kan hre tawh awm e. Pathian chuan a chatuan thil ruahman chu a tinghet zel a ni. Zawlnei Isaia pawhin "Kan Pathian thu erawh chu chatuanin a awm reng ang" a ti a ni. (Isaia 40:8)

Pathian thil rel dan chu a vak em! Hriat phak rual loh a ni...

- F.Aihnuna, Keiṭum