MNF bandh a hlawhtling em?

MNF party-in ni 29.10.2025-a FCAA duh lohna bandh an siam kha mipuiin zaidam taka kan zâwm ṭha lutuk kha bandh chhan hlawhtlinna nge, hlawhchhamna zawk ni ta ang le?

Inrinni, Chawlhni leh sawrkar holiday-ah pawh kan ram khawi lai mah, a bik takin khawpui phei chu a reh tak tak ngai lo va, tu mahin hna kan ṭhulh phah lo va, kawng hrang hranga kan ni tin duhamna chu a ngai reng tho ṭhin. Aizawl pumpuia motor ri chuah chuah leh mipui ri luih luih awm loh ni hi ni khat pawh kan tawng ngai ta lo.

Mahse, tute’n emaw eng vang pawhin bandh an siam tawh hi chuan, bandh siamtute leh an siam chhan kan thlawp vang pawh ni chuang lovin, tute mah hian chet chhuah bik tum lovin, lungawi leh rilru hahdam tak hian, rilru leh taksa tihahdam nan tiin inah kan awm hle hle mai ṭhin a ni.

Tun ṭum MNF bandh siam phei kha chu kan rama bandh siam tawh zawng zawngah a la hlawhtling berin a la hahdamthlak ber niin ka hria. Ka fanu phei chuan, "Awi, vawiin hi a nuam lutuk, a reh hahdam raih mai a, hmanlai kan veng awm dante kha a ang leh ka ti, ka lung a leng, tute emaw hian bandh siam zeuh zeuh chi a nih hi" a ti hial.

A ni tak a, MNF bandh siam ni hian tute mahin party ruih chilh vanga inrunluihna emaw, tuten emaw kei ka ni tih vanga bandh siamtute huat vang leh tham loh leh palzut tum vanga nawr buai leh tihbuai tum an awm lo. Sawrkar lahin, party indona leh inîtsîkna tih hre reng mah se, a thuneihna hmanga a hnathawk leh mipuite che chhuak turin a nawr lui duh der si lo. A hahdamthlak ta phian a nih kha.

Mipui leh sawrkar chuan tih ṭul leh tih tum pawimawh tak tak kan nei ngei ang. Mahse, innawr buai vel ngai lovin, fing takin MNF bandh siam chu kan zawm dial mai a nih kha. Sawrkar leh mipui kha kan fing, changkang ka ti.

Mahse, khati taka mipuiin bandh kan zâwm ṭha kha bandh siamtute tan khan a ngaihṭhatthlak ang em le? An bandh siam chhan ber leh an tum ber, sawrkar leh mipui tihmangan a, harsatna tam tak siam a, rîk luih luih leh innawr buai vel vak vak a, intithunei taka chet râwvâ vel an tum chu a thleng ta si lo. Mipui rilru chawh phûr a, tihzauthau va, sawrkar lai ZPM huatna leh hlauhna leh demna nasa tak mipui rilrua chawh thawh an tum pawh chu eng teh vak mah a nih hmel mang ta chuang si lo.

Ngun taka chhuttu tan chuan khati taka bandh cool siamtu nih pawh kha a zahthlak zawk mai thei. Chuvang pawh chu a ni mahna, tlai dar 4 thleng tih tum khan chhun dar 1-a an tihtawp tak ni. Engpawhnise, engmah mimal, pawl leh sawrkar leh a ram ang pawha buaina leh inhuatna awm lova bandh tlingtlak a ni kha a ṭha hrim hrim e.

Mipui hian intihbuai vel ai chuan hahdam taka chawlh hahdam kan thlan zawk avanga khatiang thil kha thleng a ni a. An bandh siam chhan FCAA chungchang hi chu mipui nawlpui hi chuan kan ngai pawimawh lutuk lo va, tun atana lo hriat thiam leh lo buai chiam theih ni pawhin kan hre meuh lo niin a lang.

Oppososition-te’n sawrkar lai beih nana remchang hmu inti a, mipui rilru chawh thawh a, tihchi-ai chiam an tum ang erawh chuan mipui tam zawk hi chu kan chi-ai vak lo niin a lang. Mipui hi kan â vak tawh lo va, India sawrkar ṭhang chak tak mek leh khawvel hmuha ropui leh lan mawi a tum mek karah hian, Indian politician fing tak tak ho hian dan an siam chu ram pum tana ṭha tur nia an hriat a ni ngei ang a, keini Mizote chauh tinzâwn a, ama ram ngeia awm Mizote hi chuti taka min huat a, min tihchhiat vek leh min diriam vak a tum hi kan ring lo a ni. Chu bakah, khawvel ram dangte laka India thil tum ril tak leh hma lam hun thui tak a thlir chu kan hriatthiampui phak loh lutuk avang hian, FCAA lo hlauh chiamna thinlung hi kan nei pha tehchiam lo a ni ang.

Bakah, FCAA hi party inbeihna a ni tih hi mi pangngai chuan an hrethiam niin a lang bawk. A boruak lum tur ang leh hawt sosantir an tum ang chuan a hawt thei tak tak lo a nih hi. Remchang hmu intia buai em emte chu a ngai tê bawk, lalna âtchilh leh inchuh party mite leh party ruih chilh an worker-te vek tho an ni. Thil thlir thiam, mifing leh mi thiam an tih, he lam rawn sawi ṭhintute pawh hi party ṭan lam nei vek vanga sawi niin an lang a, an thu sawi rawn tarlang ṭhintute aṭang pawh hian a hriat theih mai.

Chuvangin, October 29, 2025-a MNF party-in FCAA dodalna bandh an siam kha mipuiin zawm ṭha viau angin lang mah ila, an tih chhana an puh, FCAA erawh chu, party leh lalna ruih chilh ve lo mipui pangngai tam zawk rilruah chuan a tla na vak lo niin kei chuan ka hria.

Khati tak khan mipuiin bandh kan thlawp ṭhat chhan kha, bandh siamtute leh an bandh siam chhan kan thlawp vang ni kher lovin, mâwl taka intihbuai leh âtthlak taka inhuatte kan duh loh vang mai zawk a ni. Tun chinah erawh chuan hnam pum nghawng na tak tur, lang tlang tak leh chiang taka mi tê ber pawhin kan hriat theih nghal leh hmuh theih nghal thil, issue lian tling lovah chuan, a hman hman hian mahni hmasial vangin tumahin bandh rawn siam fo tawh suh se.

- K. Hmingthankaia