Hla Kungpui Mual a vul zel dawn

Kum 1986-a din ‘Mizo Hla Kungpui Mual’, Khawbung hi kum sawm danah tih changtlun zel a ni a. Thawh 5-na neih tawh a ni a, tunah hian hla phuah thiam 21 leh ziak mi 15 lai seng luh tawh a ni.

Hetianga seng luh dawn hian Mizo hnahthlak pumpui huapin, Kawl ram, Manipur leh Tripura te ngaihtuahna hian a huam vek a. An kutchhuak tam leh tlem lam aiin a ṭhat leh ṭhat loh (quality) hmanga uluk taka zir chianga teh a ni. Chipui nihna te, khawchhuak nihna te, ṭhian nihnate leh hmelhriat nihnate hian a hmun a chang ngai lo.

A buatsaihtute beisei ai daihin tlawhtute an tam a, MZU, college hrang hrang te, high school leh middle school, khaw hrang hranga zirlaite’n an tlawh dûl dûl ṭhin. Kum 2013-a YMA Conference, Khawbunga nghah ṭum phei chuan tlawhtu an tam em em a, hruaitute chuan pandala inkhawmpui neih chhung chu Mizo Hla Kungpui Mual tlawh lo turin an inkhap hial a ni awm e. Ṭhenkhat phei chuan, “Mizo Hla Kungpui Mual chu kei ka tlawh duh tawh lo, mi an tam lutuk a, thlâ pawh a lak theih si lo!” an ti hial e an ti!

Tunah hian thawh 6-na, kum 2026-ah nei tura hmalak mek a ni a. Khawbung khawchhuak hmun hrang hranga chengte inchah khawmin, ‘Khawbung haw rûnpui’ nei nghal tura ruahman mek a ni a, chhungkaw inhmuh khawm nan a remchangin a hlimawm tak meuh mai.

Thawh 6-na, April 2026-ah hian seng luh thar turte thlan fel a nih hmâ hian Selection Committee chuan mipui hnenah seng luh tur rawt turin zau takin sawmna an siam phawt a. Tichuan, mi 25 lai an chhawp chhuak phawt a, chuta ṭang chuan thli fimin, mi 10 an thlang chhuak leh a. An sulhnute an zir chiang turin Secretary chu mawhphurhna pek a ni leh rih a.

Taima taka Secretary-in an hnu-hmate a zir chuan chu Committee-ah pharh a ni a. Ngun taka zir chian leh sawiho a nih hnuin hengte hi kum 2026-a seng luh tura thlan an chhawp chhuah an ni a.

Hla phuah thiam:

1. Hrawva (1893-1956)

2. Lalmama (1901-1959)

Ziakmi:

1. Capt. L.Z. Sailo (1924-2008)

2. Rev. Zairema (1917-2008)

3. Kawlkungi (1937-2015)

4. Lalhmingliana Saiawi (1937-2016)

Hengte hi Hla Kungpui Mual Committee pui Khawbung hnenah thlen a ni a; anniho pawhin ngam taka an sawiho hnuin thutawp siamin an pawm thlap ta a ni.

Heng thlan chhuahte hi zir chiang a, paper ṭha tak ziak turin mithiam ruat an ni a. Hla Kungpui thawh 6-na lungphun hawn hma ni pui ni, kum 2026 April thla bul lamah, Khawbungah seminar hi neih tum a ni a, chung paper-te chu a bua chhuah tum a ni nghe nghe.

He hun pawimawh leh hlimawmah hian seng luh tawh leh seng luh thar chhungte chu sawm vela tam a ni a. Hmun hrang hranga cheng Khawbung khawchhuakte leh hetiang lama tui leh ngai hlu a thei apiang tel tura sawm in ni e.

- B. Lalthangliana