NI RUK CHHUNG HNA THAWH NAN

Engkim siamtu chuan lei leh vana thil awm zawng zawng siam zawh nan ni ruk chhung chawl hauh lovin hun a hmang a. Kan pi leh pute pawh khan hna thawh nuam an tiin an tui em em a. Kar khata ni ruk chhung hi hna thawh nan an hmang ṭhin. 

Chutiang ang taka hna thawh an uar avang chuan ruahpui leh ni sensa pawh an pawisa lova, hna thawk chungin an do han mai ṭhin. Khuarel chhiatna leh zuvate an tawh loh chuan a kum leh ei khawp an thar chhuak ziah ṭhin. 

Hnathawh nuam ti em em, thawk loa awm thiam lo, kan pi leh pute kha lo tho lehin tunlai kan nun leh kan hun hman liam dante hi min rawn hmuh pui ta se la, an rilru a dam thei mawlh lo ang. Kan pi leh pute nun hlu, mual liam tawh hnu leh lo tlu chhe mek hi thlir kir lehin tungding leh ila, a ṭha lai entawn tur awm te la chhuak ila, ṭhangtharte entawn turin i din thar leh ang u. 

Ni ruk chhung nitin lo lamah an feh a, chuvangin ‘Kawla ni chhuak chhiarin’ tiin an lo sawi kher thin. Ram changkangah chuan a ni bi chu sawi loh, a darkar biin miten hna an thawk suau suau a, an ram pawhin hma a sawn hle. 

Keini ramah chuan kar tir lamah ṭhahnemngai inti takin hna kan thawk a, kar tawp lamah chuan kan chawlhsan loh leh thil dang kan tih san leh daih zel. Chumi avang chuan kan hna thawhna chuan kan tan rah ṭha a chhuah tam thei lo a ni. 

Vai mistirite hi hna hautak ber in sa-in kar tluanin an thawk thei a, an rilru an pek nasat vang a ni. Mizo ka nih avangin engahnge ka tih theih loh bik ang? Kan pi pute ang khan kan rilru hi hnathawh nan siam thar leh ila, kan hunawl apiang chu hna thawh nan hmang ila, a va ṭha dawn em! Kan hna thawhna chuan hlimna min thlen ang a, kan lo hrisel sawt bawk ang. Hna thawk nasa tak tak sawi tur an awm nual ta mai. Chung mi taimate kutah chuan Lalpan a malsawmna  a dah ang ngeiin kham khawp an hmuh bak­ah midangte tan an pe chhuak thei hial ṭhin a ni. Chung mite chu mi vannei, mi awhawm an ni a, thil dang zawng aiin an hnathawhna chuan an tan hlimna a thlen tam ber ṭhin. Mi taima chu mite awm danah an buai ve lo a, anmahni thiltihah an innghat ṭhin. An ngaihtuahna a zalen a, mi hlim thei tak an ni zel. 

Mi taima chu kan Lalpa pawhin hmuh nuam a tih ngei a rinawm. Chawlh hi ngaina lo ang u. Kum tawpah kan thawh hah rah hlawhtling takin kan seng thei ang. Hawh u, tun aiin hna thawk uar ila, chu chuan hlimna min pe ang a, intodelhnaah min hruai thleng bawk ang. 

- H. Neihchungnunga, Durtlang North