Party Vice President thlakin a nghawng theih a awm em?

Rin dan sawi a thiang an tih angin Mizoram Political party liana Vice President thlak leh a nghawng bakah zeldin thubawl i han puak chhuah pui ve pawp pawp dawn teh ang. Congress Vice President Pu R Lalzirliana a chhuah khan Congress kha nghing thei lo angin ngaih la ni mahse an lo nghing thei tih MLA inthlanah khan a lang tawh. 

MNF-a Vice President pahnih, thil tihsual an neih vang leh President laka an lungawi loh vang pawh ni lem lova an thlak hi, Pu Tlanghmingthanga leh Dr R Lalthangliana te hian vuivai zawngin an la lem lovin lang mahse tun aṭanga kum thum kum li velah hlet a chhuah lohna turin MNF Party hi an inven lawk a ṭha a ni. 

MNF hi Political Party dang aia an ngheh chhan tak a awm ve a, chu chu thihchilh ngam hruaitu an nei hi a ni. Tuna MNF hruaitu lian President Pu Zoramthanga, Senior Vice President Pu Tawnluia-te hi mahni nunna thapa ramhnuaia lo lut ngam khawpa ram tana inpe tawh an ni a, tuna OBaṭanga an ruat thar pahnih Pu Lalthlengliana, Vice President leh Pu K Vanlalauva, Treasurer te pawh hi ramhnuaia lo pen chhuak tawh an ni. Hetia inrem khawm nghet an nih avang hian Pu Zira chhuakin Congress a tih nghin ang kha chuan an nghing ve mai mai lovang. 

WhatsApp thu darh tihte hi chu um zui tlak a ni lova, hetia an thehdarhah hi chuan Pu Zorama’n MLA chuti zat a nei a, Pu Thangtea’n MLA chuti zat a nei a, MNF dan puia inziak anga MNF inthlan leh hun hi MLA inthlan hma a nih dawn avangin Pu Thangtea pawlte hian chuh turin an nawr dawn, tihte pawh kan lo chhiar ve a. Tun dinhmunah hian Party president nihna hi Pu Zorama hi tumahin an chuhpui ngam lovang tih hi ka kutphah tlukin ka chiang. MNF Party hnehna chan leh theihna tura SEDP hi Pu Thangtea’n a tlang au pui nasa a, a duan chhuah an han tihte pawh hi President uapna hnuaiah lo chuan engmah a thleng thei lova, chuvangin mimal ngaihdan kan lak chuan hetiang thuthang hi ka awih lova, MNF hi a tichhe pha eih lovang tih ka ring. 

Titi leng velah Pu Tlang­hmingthanga phei chu a lawm lova, a vua leh vang sorkar hnathawkte pawh transfer velah an dim lova, Pu Tlanga fate pawh facebook-ah an âng chhuak hial tihte pawh a awm. Hei hi MNF buai phahna tur a nih loh bakah amah Pu Tlanga ngei pawh a la nghet tlat a, politics inbeihna mai mai a niin ka hria. MNF hi tunah hian an la nghet tih hi kan zavaia pawm a ni a, an MLA neih zat, an sorkar hun chhung la rei loh dan te hi chhut chiang ila, an la nghing lova, an inven ngaihna chu Chief Minister in Minister duat bik a neih leh CM tlawn bik an awm chuan Hnam Runa ṭhangkhat lian aia rei lo rinawm tawh Secretary rual leh Block president rual hi lungawi lo thei hi an Vice President thlak te ai chuan a hlauhawm zawkin a lang. 

Congress-in Pu Lal Than­hawla an thlak duh lo leh thlak phal lo ang tho hian MNF tan pawh President hi thlak phal chi a ni lo. Congress-a Pu Zira chhuak angin an Vice President an thlak tak te hian party an chhuahsan lo mai ni lovin an la rinawm em em a, MNF Party hi a la nghing lo a ni. 

- Lallianmawia