Thenzawl khawpui plan

Thenzawl khua chu khawpui lian tham tak atana ruahman mek a ni tih ka lo hre ve a. Mizoramin plan city kan neih awm chhun a ni rih dawn a, a lawmawm hle a ni. Tuna khaw chhung in leh lo awm tawhte avang hian a ruahmantute’n duh thâla ruahmanna siam harsatna an nei ang em? Ka hre lo va, an nei lo turah ngai ila. Sawrkarna inthlak palh a lo awm pawha a project a tawp mai loh nana venhimna pawh siam a nih ka beisei bawk.

Mi thiam rual, a bika zir chhuak ngatin ruahmanna an siam mek laia keini ang duang lo bauh ve chuan ngaihsak a hlawh lua lo mai thei e. An ngaihsak emaw, ngaihsak lo emaw, kan ngaihtuah dan kan lo chhak chhuah ve hian tu kawng mah a dâl lo bawk a, han inchhâk dâk ve reng reng ka duh a ni. Khawpui kawtthler leh kawng kal dan tur te, public hmun pawimawh te, lirthei parking area/house te, residential area leh market area tur te, mall, a compound chhunga lirthei dahna tur zau tawk leh restaurant awm turte leh public park te chu sawi ngai lova an ruahman ngei ngei turte an niah ka ngai a. Chung baka ka duh leh ngaih pawimawhte han sawi lang ve reng reng ila.

Lau Waterway

Thenzawl khua chauh hi khaw chhunga lui luang kual kan neihna khua niin ka hria a. Hei hi tih bawlhhlawh lohva, vawn thianghlim ngei ni se. A dung tluanin humhalh a, a kam tuakah hian reserve tlem tal awm ve vein thing leh pangpar mawi tak tak phun a, lawnglenga kal kual theiha siam ni bawk se la. Chu chu khaw chhung mite tan leh tourist-te tan pawh tlawh châk chhan tur pakhat a ni ngei dawn a ni. A tui hi a tam tawk theih nan a mawng lamah khuah a ngai a nih chuan khaw chhung tui lut lo tawk tura khuah ni se la. A khuahna atan Thenzawl khaw chhunga inhmun lai apiangin leivung an paihna tur siam nghal mai ni se. Chutiang chuan a kam tuak lei tihsan deuh nan pawh ruahman ni bawk se la. Mual pâwng nuam tak, thing phunna tur leh pangpar chinna tur lei vung paih khawmin a siam theih dawn a ni. Hei hian khawpui boruak a vawng dai bawk dawn a ni.

Upate pual park

Kum upate tan park siam ni ngei ni se, khawpui a zau dawn avangin hmun khat mai pawh ni lovin hmun hnih siam ngei ni rawh se. Park chhungah chuan lirthei wheelchair bak luh phal ni lo se, upate walk tibuai thei tur thil dang eng mah phal ni lo rawh se. An inkawm khawmna tur bahzàr leh thlipui ruahpui laka him tur bûk te pawh siam ni bawk se la. Park chhungah chuan thing par thei chi leh pangpar chinna hmunte siam ni se la, chung chuan upate nun a tihlim ang. Tui thianghlim in tur ruahmanna siam ngei ni bawk ang a. He park hi upate tan maia ṭangkai tur a ni lo va, kum upa nei chhungkuate nasa taka chhawktu a ni bawk dawn a ni.

Circular road

Khawpui hualin circular road an siam ngei turah ngai ila. Hei hi a pawimawh em em a ni. Khawpui a zau dawn si a, zin chhuak turte tan khawpui dung leh vâng tlan chhuah ngai hian hun a heh ṭhin a. Mahni zâwn ṭheuh circular road-a tlan chhuah a, khawpui luh lamah pawh mahni hnai lai laia tlan luh theih mai hian hun hman a titlem em em a ni.

Public area

Khawpui chhungah hmun eng emaw zat public pun khawm theihna hmun âwl zuah ngei ngei a ṭha; a bikin lirnghin thulhah mahni in chhuahsan a, tlan khawmna tur a pawimawh. Hei hi Aizawl khawpuia kan tlakchham em em a ni a, tlanna lam apiangah min delh ang tih hlauhawm tak tak buildingin a khat tawh. Khawpui tharah chuan emergency-a tlan khawmna tur ground siam hi ruahman hmaih hauh loh tur a ni.

Public convenience

Vantlang inthiarna hi khawpui ruahmannaah chuan hmaih hauh loh tur zinga mi a ni a; hmun eng emaw zatah, park-ah te pawh a awm ngei ngei tur a ni. Compound ṭha tawk neia siam ngei ni bawk se la. A compound chhung chu thing leh pangpar huan ni nghal bawk se.

Utility corridor

Hei hi lei hnuaiah emaw, lei chungah emaw heng - water supply, sewer, electricity, gas leh telecommunication line-te hmuh theih lohva thup vekna a ni. Thenzawlah chuan lei min a hlauhawm lo va, chuvangin hengte hi thup bo vek theih a nih ka ring. Khawpui chhunga tele-communication line inzam hnawk lutuk leh a ban zawng zawnga an hrui hman bâng an khai bâwr tuih maite hi khawpui tiṭawptu leh ti-smart lotu a ni.

Water supply

Thenzawl ram chhung hmun zâwl rem laiah tui khuah lian tham tak, water suppy support-na tur siam ni se la. Tuna sangha dil lian tham vak lo siamna hmunte hi ruahmanna ṭha siamin PHE-in project lian tham tak siam se la, a vel chu ram ngaw mawi taka siam ni bawk se. Chu chuan tuihna awm sate a tipung ang a, van ruahtui khawl nen ṭangkai takin a siam theih ang.

Hengte hi tihpuitlin vek theih a nih chuan Thenzawl khawpui thar chu smart city tak tak a ni ngei dawn a ni.

- Commissioner Lalkiamlova