Bus tlai vanga rel nang lo kha
Mizoram State Transport chuan mipui awlsam zawk nan Sairang rel station-ah bus a service thartir a. Hetiang ruahmanna awm hi mipui tan a ṭangkaiin chhawrtu pawh a Zo a vaiin an awm ta ṭeuh mai. A lawmawm khawp mai.
Mahse, bus a thlen tlai avangin Inrinni zan khan rel nang lo, station-a rel ûm a, ûm pha si lo tlan dawr dawr han hmuh khan an khawngaihthlak khawp mai a; an zingah vai pawh ṭhanem tak an tel. Khatiang pumpelh dan kha department hotute’n an zawn vat a ngai a ni.
Kha thil thleng kha social media-ah a darh nasa viau a, ṭhenkhat chuan driver duham vangah puhin, Chaltlanga MST bus station-a passenger a nghah rei vang niin an sawi a, bus seat a khah tawh chuan kal mai awm tihte a awm nual. Mahse, driver duhâm vang ai mahin, a kal hun (timing) a la nih loh vanga passenger seat full chunga ding mai mai ni loin, a chhuah hunbi pangngai a nghak a ni ngei ang.
Driver-in passenger a duhthawh vanga bus kha chhuak tlai a ni lo. A chhuah hun pangngai (timing) tlai dar 5-ah a chhuak a ni. A bul ber chu kan khawpui kawng zir loh a ni.
Heti khawpin Aizawl khawpui a tâwt a, a bik takin Bawngkawn phei chu engtik lai pawhin traffic a jam tih theih a ni. A jam nan fuh tak tak phei chuan darkar khat chuang kan tâng fo reng a, chumi pumpelh dan chu zawn a ngai a ni mai. Chutiang taka jam nasa tak karah pawh traffic police-te’n zir ngun lehzual se, he lai area-ah hian expert deuhte duty tir nghe nghe se a ṭha ngawt ang.
MST bus hi Chaltlang aṭanga chhuak ṭhin an ni a, Bawngkawn pumpelh theih a ni si lo. Traffic jam pumpelh nan chuan Hunthar Veng Company Pengah stand siam se a awlsam ber ang. Passenger tan pawh taxi-a pan a harsa lo. Chu chuan nasa takin Bawngkawn traffic jam a pumpelh thei ang. Department hotute’n ngaihtuahna seng rang se, Company Peng pawh Traffic Police-te nen ruahman a harsa lo turah ngai ila, a rang lama hmalak a ṭha ang.
Thlawhtheihna emaw, rel emawte hi timing nei an ni a, an chhuah hun a thlen tawh chuan an chhuak mai ṭhin a, eng emaw harsatna dang a awm erawh chuan an delay ve fo bawk. Mahse, a hun taka passenger an thlen erawh tihmamawh a ni. Relin a kalsan passenger-te pawh an thiam loh a ni lo, bus driver thiam loh pawh a ni lo; traffic jam vang liau liau a ni.
Bawngkawn traffic jam pumpelh nan hian Company Pengah stand pek mai a ṭha ang. Hotute chet vat vat a ngai a ni. Khami hunah thleng tlai passenger-te khan pawisa tam tak an seng thlawn a, an hun hlu tak an seng thlawn nasa hle tih hriatpui an ṭha.
Relin Sairang a rawn luh aṭangin kan bâwr nghal viau a, kan la chhawr ṭangkai dawn chauh. Chuvangin, rela zin tur kan la tam telh telh dawn. Phai aṭangin hnam dang pawh Mizoram rawn tlawh nan tak an la hmang dawn chauh. Taxi emaw, maxicab ai chuan MST bus chuan man a tlawm fe zawk a, hei ai hian MST pawh a service tam a la ngai dawn. Hmathlir ngaihtuahna pawh sen a hun chho ta zel a nih hi.
- Lal Rinmawia