Development kalsiam dan khaw nge?

Development (hmasawnna) kan tih ṭhin hi a nihna tak (awmzia) leh neih theih dan kawng dik chu Mizo mipuite hian kan la hre fuh lo tlang hle niin a lang.

Hmasawnna ruhrel (development infrastructure)-te a awm nual a; chung zinga hmuh theih mai - a) transport system te, b) power and energy lamte leh c) water supply Ssystem te hi an pawimawh em em a. Chutiangte kan neih chuan hmasawn ta (developed) em ema kan inngai hi a dik tawk lo va. Institutional infrasturcture (human/social development) an tih maite kan neih ṭhat loh chuan hmasawnna dik a neih theih ngai loh a ni. Chungte chu - 1) political institution, 2) educational institution, 3) health and nursing institution, 4) recreational institution 5) NGO institution leh a dangte an ni tlangpui a. Heng institutional infrastructure-te chhawr ṭangkai ṭhat chuan development hi a kal dik fo va. Khawvela ram rethei zawkte chu hmasawn tawh zawk rama NGO leh kohhrante’n education leh health system te an zirtira an kaihhruai avangin hmate an sawn phah ve ṭhin (Mizoramah pawh) tih kan hria.

Economic subject lam zirmite chuan ‘sum leh pai’ (hmuh theih material thil) neih belh ṭeuh hi chu development tih aiin ‘growth’ (thil neih lama ṭhang) a ni a, development chuan mihring leh khawtlang nun peng hrang hrang human/social development-in a huam (moral, health, education, eizawnna, culture etc.) te an ṭhan tlan zel theihna a huam vek an ti a. Bible thuin a sawi (I Kor.12), taksa pumkhata peng hrang hrang awmte chu a tuartu bik awm lo va, a tuartu tur pawh inṭanpui tawn leh a ṭul huna inchawimawi thei an nih thu a sawi ang hi development kawng dik zawh a lo ni reng mai a; human development leh sustainable development te hi a huam tel vek a ni.

A ṭhang duang bik awm vanga tuar lai bik an awm phah chuan hmasawnna dik a ni thei lo fo mai. Switzerland ram chu khawvel puma ram hausa ber (per capita income) an nih hun lai chuan an nawmchen nasat avangin mitthi an neih tam ber hun a ni e an ti a. “Miin khawvel hi a pumin nei se la, a nun chan si se la, a tan eng nge sawt ang?” Bible-in a tih ang hian sum leh pai (materialism) neih bakah thil ṭul dang neih leh nihna tur pawimawh dangte neia ni thei tur chuan institutional infrastructure (eg. kohhran, education, health) te chhawr ṭangkai an ṭul ṭhin. Tin, mi ṭhenkhat phei chuan ram develop tehna atan sum lak luh tam dan bakah longevity (damr ei dan) te, literacy (lehkkha thiam dan) te, happiness (mipuite hlimna) te thlengin an telh hial a ni.

Tunlai khawvel ṭhang chho zelah hian Mizoramah pawh hian ram changkanna hmanraw hrang hrangte kan neih belh ve zel a. Kawngpui lian ṭha takte pawh kan neih belh zel bakah rail road pawhin kan khawpui daifem a rawn chhun thleng ta hial mai a. Company lian leh hausa tak takte pawh an rawn inbun zung zung mai thei. Tin, mi tam tak chuan sum hmuhna leh eizawnna remchangte kan neih chuan a lawmawm hle ang.

Chutih rualin, kan Zo nun ze mawi (tlawmngaihna, aia upa zahna, Kristian nun)-te kan malmak phah a hlauawm thei ngei mai thei. Hetiang hunah tak hian hmasawnna ruhrel ṭhenkhat a ṭhan nasat hle lai hian, hmasawnna institution ṭhenkhat dang (NGO, kohhran etc.) te leh political institution (sorkar) ten ṭan kan lak nasat a ṭul dawn tak meuh mai a ni. Kan Zo nun ze mawi, kan identity-te min assimilate (eichhe) thei laka inven leh inkaihhruaina ṭha hman nghal a pawimawh dawn. ruihhlo do te, ILP leh illegal trade ang chite ngaihthah chi a ni hauh lo mai. Heng institution-te hi lungrual leh inthurual a thawh a ṭul hle ang. Ram leh hnam tana pawi tur (sustainable development tichhe thei) thil ti - mimal/company-te an awm palh chuan chutiang chu hnawl tur leh titawp tura ṭan lakho a nih zel chuan development ze dik kawng kan zawh thei dawn a ni si a.

Tunah chuan hmasawnna tluantling (development) hmanraw pawimawh (infrastructure)-te kan hre ta a. Heng zinga political institution (sorkar) ṭha neih hmasak phawt a ṭul kan tih chuan a dik thui thei viau a. Chutianga political institution ṭha/sorkar ṭha nei tur erawh chuan finna, hriatna, remhriatna leh tumruhna te neih leh chhawr dik ngei a pawimawh thung a ni. Human & natural resource-te dapchhuah leh rorelna dik neih te a ṭul si a. Mizoram pawh hian kawng dik leh dik lo kan thliar thiam theih nan ram rorelna kawng lo zawh tawhtute rorel dan tlem tarlang ila.

1) Lal Rehoboama chuan mipuite chunga rorelna a kenkawh dan tur atan a pa (Solomona) dam laia a upate thurawn (thu ṭha sawi turin) te aiin a bul hnaia tlangval hote thurawn (phur tihrih belh turin) chu a pawm zawk avangin Israel hnamte chu an inṭhen ta phawk a ni tih kan hria. Hriatna leh finna kawnga tawnhriat nei leh miril zawk (upate) thu a pawm duh lo kha ram mipui tan a pawi tak meuh a ni.

2) Kum 1990 vela India ram economy tluchhe nasa em em chu siamṭha turin Prime Minister PV Narasimha Rao-a (Ministry) chuan economist ropui tak Dr. Manmohan Singh-a chu kum 1991 khan Finance Minister ni turin an sawm lut a. Tichuan, ani chuan kum 3 vel chhungin India ram economy tlusawp tawh chu a din thar leh ta a. Kum 1994 aṭang phei kha chuan Manmohan Singh-a chu India Prime Minister a ni ta tih kan hria.

Tichuan, Mizoram hian kan ram hruaitu atan lal Rehoboama ang nge kan duh Pu PV Narasimha Rao-a/Dr. Manmohan Singh-a ang hi le? Kan hruaitu ni tawh leh ni mekte hian a tu hi nge an an zawk le?

Aw le, kan sawi tak angin khawvel inher danglam zelah hian Mizoram pawh hi kawng ṭhenkhatah changkanna ‘growth’ chuan min chim chho ve mek a. Communication vhannel (social media, road/railway transport ang chite) lamah kan ṭhang nasa zual ni pawhin a lang. Hetianga kawng ṭhenkhata kan ṭhan duan bik hle chuan kan ram leh hnam nun dan ṭha leh nihphung ṭhate a ei chhiat (assimilate) theih avangin inven uluk a pawimawh ta a. Hetiang hunah hian development ruhrel zinga institutional infrastructure, a bikin political (sorkar) leh NGO hote ṭanho a ṭul tak meuh mai. Chuti lo chuan hnam ralna tur (leh chimralna) kawng kan zawh thei dawn si a. “Mi rawnin i thil tumte buk la, fel taka relin hmelma bei rawh,” Bible-in a sawite leh, ‘Ṭanrual hi chakna a ni’ (ram leh hnam himna kulhpui a ni) tih thute hi Mizoram hian, a bikin ram hruaitute hian kan zawm a va ṭha dawn em!

- H. Lalhmachhuana, Zobawm In