Ni 3 chhung Dampa bialah

Octrober ni 28 atang khan ni 3 chhung chamin 2 - Dampa (S/T), Assembly Constituency by-election lo awm tur boruak hrang hrang ka zuk chhim ve a. Dampa bial chhunga khaw awm pakhat tih loh chu ka tlawh kimin ka inhria. By-election a zawh meuh chuan Dampa bial chhung mipuite khua a har viauin ka ring. Khaw tinah party hrang hrang aiawh mikhual an inpel suau suau reng a. Lirthei vei vak a tam hle bawk. Sum leng vak pawh a tam viauin ka ring.

Ailawng lam atangin Dampa bial hi kan lut tan a; khaw tinah ding zelin, Ṭuahzawl khua aṭangin Tut lui kânin West Phaileng-ah kan lut a, West Phaileng atang hian Marpara North & Mizo veng lam panin, Marpara atang hian Hnahva leh Silsuri khua te kan tlawh bawk. Thlasik rim a nam ṭan tawh chungin duh ai chuan khua a la lum mah mah deuh a; zan mut a har ṭhin hle.

Ni 3 kan cham chhung hian ka rilrua lo awm nasa ber chu, party hrang hrang ten by-election a awm dawn avanga Dampa bial an hmangaihna au hla zawng zawng-te kha thleng dik tak tak vek se, tih hi a ni. Central Minister-te helicopter hmanga an rawn thlawh luh bakah, State thenawm atangin Minister leh MLA ten an rawn cham chilh deuh chawt bawk a. Mizoram-a sorkar lai Chief Minister atanga Minister leh MLA te thlengin khaw hrang hrangah hmuh tur an awm suau suau bawk a. Party dang MLA leh hruaitu te pawh hmuh tur an tam hle.

Hetianga party hrang hrang, sorkar lai leh eptu party ten a siruk laa vote an zawn suau suauna Dampa bial khaw hrang hrangah hian, an party candidate thlan tlin a nih chuan tia Dampa bial tana hmalak an tumna leh an thu tiam zawng zawngte kha vote chhiar a nih hma ngeiin han hlawhtling thei vek se chuan, Dampa bial chu Mizoram-a MLA bial nuam, changkang leh hmasawn ber a nih ngei ka ring. Party hrang hrang hruaitu ten Dampa bial tana an thu tiam zawng zawng zinga zaa 99 te kha chu vote chhiar zawh ruala thamral leh mai tur a nih hmel si a. Dampa bial mipuite hi ka khawngaih rual loh ni mah se, ka khawngaih lâwk khawp mai.

Dampa biala khaw tam zawk hi inkalpawhna kawng nuam tak a nih loh rualin, chhe lutuk tia sawi tur chu a ni chiah lo. Hnahva leh Silsuri khaw kawng erawh kan kal hma karah phei chuan motor-a kal hleih theih loh niin an sawi. Kan kal lai erawh chuan ruah te a sur lem loh avangin, kawng zawh hrehawm tak a ni lova; a khuk dan erawh turu tak a ni thung. By-election neih hi ngai lo ta se chuan Hnahva leh Silsuri kawng hi motor tan chuan zawh loh mai a la thlan awm zawk hial ka ring! West Phaileng leh Marpara North inkara khaw hrang hrang te hian kawng engkima hmasawnna nasa zawk an va mamawh tak em!

Mizoram khaw hrang hrang hi ka tlawh kim ve deuh thuak tawh a; MLA bial 40 kan neih zingah hian Dampa bial hi a hnufum pawl an ni rei tawh hlein ka hria. Minister hi term hnih an lo neih tawh niin ka hria a, chu bak chu MLA fâng bial an nih rei tâk deuh vang nge ka hre lo va; tin, tunah pawh hian MLA fâng bial nih hmabak bawk a ni leh hmel bawk si a. By-election a awm dawn tih an hriat tirh atang khan, party hrang hrang ten campaign au hla an neihte kha a tham ral mai mai lohna turin, a bial pumin ṭan lo lak nachang hria se tih te ka ngaihtuah naah a lo awm a. Tun ṭum by-election hian Dampa bial hi hma sawnpui ngei se ka ti hle mai.

Dampa bial-ah hian Polling Station 41 awmin, vote nei mi 20790 an awm a. ZPM, MNF, Congress, BJP leh PC Party ten candidate an nei vek a ni. Ni 3 chhung chauh cham leh khaw tin tlawh thuak thuak chauh ka nih avangin, tute party nge hniama sâng tih lam hi hriat thiam a har hle. Chu lam hriat tum a kal pawh ka ni em em lo bawk a. Party pahnih chu an hniam fâl deuh dawn niin a lang. Palina leh pangana tur hi chu a chiang sa em aw ka ti deuh a. Eng pawh nise kar khat chuang hret campaign na hun a la awm a, he hun hmang thiam ber party hi pakhatna a nih mai hmel e.

- Joseph Lnta