Inthlan dawna inhêkah fimkhur ila
Dampa bialah MLA bye-election neih a ni dawn tih kan hre tlang a, political party-te leh an candidate-te chu mawngvawmba ang maiin an phe suau suau mek a ni. Political party hrang hrangte an ṭang bawk a, dan lova chea inpuha Election lam hotute hnena zualko thawm pawh a awm leh ṭan ta. ZPM campaign-naah Chief Minister Pu Lalduhoma leh Adviser to CM Dr. Lorrain Lalpekliana chu MNF-te chuan inthlannaa dan Model Code of Conduct bawhchhiaa che niin an hria a, October ni 24, 2025 khan Election hotute hnenah an hêk tih media-ah kan hmu a ni.
Hei lo pawh hi Election hotute hnena complaint lut a awm nual tawh thu Vanglaini chanchinbuah kan hmu bawk a. Mahse, tute nge an hêk, tute nge a hêktu tih erawh ziah lan a ni lo. Hêktu leh an hêk ka hriat chhun, MNF hovin Chief Minister an hekna chungchang hi i han sawi zui teh ang.
MNF hovin CM Pu Lalduhoma an hêkna chhan nia sawi chu, Reiek khuaa a campaign-naah Dampa bial tan cheng vaibelchhe 700 man tui lakna tur project ruahman a nih thu a sawi leh aieng sawngbawlna tur khawl pek tum a nih thu a sawi tih vel a ni. Hei hi MNF chuan MCC bawhchhiatnaah an ngai a ni ngei ang, complaint an thehluh phah tlat.
Mahse, kei chuan CM thusawi (verbal) hi MCC bawhchhiatna a ni thei dawn em ni, ka ti thung. Inthlan dawnah chuan political party hrang hrangte leh candidate ten thlan tlin an niha an tih tur an sawi ṭhin a, an intiam, te pawh kan ti ṭhin. An intiamnate chu sum sem te, thlai lei te, eng eng emaw pek, siamsak leh tihsakte a ni ang. Chungte chu inthlan campaign laia thil thleng ṭhin pangngai, a sawia sawi a ni a, MCC bawhchhiatnaah ngaih a ni ngai lo.
Dampa biala MLA thlan turah pawh Chief Minister-in eng eng emaw a zuk sawi a, a zuk tiam (?) ve a ni ang. Amah ang bawkin political party dang hruaitute leh candidate-te pawhin thlan tlin an niha an tih turte an sawi ve tho a, candidate leh party ṭhenkhat chuan central lam aṭangin Dampa bial tan project hai luh an tum thute pawh an sawi ve bawk. Tih tur an sawi hlawm a, an sawi erawh a inang kher lo.
Inthlan dawna tih tur sawi te, mipui leh bial tana tih tur an sawite hi MCC bawhchhiatnaah ngaih a ni lem lo. MCC bawhchhiatna chu–hnathawh tur official order chhuah te, work order chhuahte leh chutiang thilte chu a ni zawk. CM-in Dampa bial tan cheng vaibelchhe 700 man tui lakna tur project ruahman a nih thu a sawi hi MCC bawhchhiatna a la tling lo a, official order tihchhuah ni se chuan MCC bawhchhiatna a ni thung ang, mahse, chutiang chu a awm lo.
Dampa bialah inthlan a hnai tial tial a, party-te leh candidate-te an ṭang em em tawh. Party dangte chet dan a dik lo ang leh dan bawhchhia anga mipuiin an ngaih theih nan thu dik tawk lova inhêk a awm ṭhin. Hetiang lakah hian party-te an fimkhur a ngai a, mipui kan fimkhur a ngai em em bawk.
– Zodinsanga