Pathian remruat Mizo ṭawng

Mizo hnahthlak hnam chi peng hrang hrangte zingah hian ṭawng nei hrang hi kan awm nual a. Heng chi peng ṭawngte zingah hian tuna Mizo ṭawng kan tih tak hi, a hmang hmasatu leh a neitu nia an sawi Luseite hian tihlar tuma an beih nasat em avanga lar pawh niin a lang lo a. Pathianin Mizo hnahthlakte ṭawng pui ber ni turin a lo buatsaih tih mai tur hian a awm tlat a ni.

Lusei ṭawng tih ṭhin kha Mizo ṭawng tia thlak a nih dawnin sawi buaina nei miah lo a, Lusei-hoin an phal maite hi an fakawmin an rilru zauzia a hriat hle a ni. Kan hnam chi peng dang ṭawng ṭhenkhat hi Mizo ṭawng tiin i thlak ang u, ti ila, phal lo an awm mai thei asin. Tun hma aṭangin Mizo ṭawng hi kan hnam chi peng ṭawng dangte aia vanneihna a nei a; chuvangin, ‘Pathian remruat Mizo ṭawng’ tiin ka dah ta mai a ni. Pathian malsawm Mizo ṭawng ti pawhin a sawi theih awm e.

Hmanlai Sailo-ho an lal lai khan Sailo lalte khan Mizo ṭawng hi an rorelna ṭawng atan an lo hmang daih tawh a, an lalna khua leh tlangahte khan Mizo hnahthlak ṭawng chi hrang hrang hmang an awm nachungin, khang ṭawng hrang hrang zingah khan Mizo ṭawng ngatin thubuai hlabuai an rem ṭhin a ni. Hengte avang hian a ni mai thei a ni, ‘Hmar ṭawng hi hmangaihna thu sawi nan a ṭha a, Pawi ṭawng hi inhauh nan, Lusei ṭawng hi rorel nan a ṭha,’ tia an lo sawi daih tawh ni. Sailo hnam hi an thlahtute an sawi hian Lusei hnamho zinga awm pawh an ni chuang si lo a, eng vanga Lusei ṭawng, tuna Mizo ṭawng kan tih tak hi Sailo lalte khan lo hmang tlat nge an nih? Thil mak tak chu a ni awm e. Pathian remruatna mak tak chu a ni. Hetih lai hian, Mizo lalte kan tih hian Sailoho hi kan hmehbel deuh tlat bawk a nih hi. Sailo ni lo, Mizo hnam zingah lal dang an tam tho si a.

Mizoramah hian hnam peng hrang ṭawng awm nual mah se, Mizoramah Sap an rawn thlen khan Sap-ho khan tuna Mizo ṭawng kan tih hian A AW B an rawn siam leh tlat a, hei hian Mizo ṭawng hi a vanneihzia a tilang lehzual awm e. Mizo ṭawng a tilarin a tihlu ta em em a ni. Mizo hnahthlakte zingah ziak leh chhiar zir tur chuan Mizo ṭawnga zir a ngai tlat a; Lai ṭawngin emaw, Paite ṭawngin emaw a zir theih loh a ni. Chuvangin, tun hmaa ziak leh chhiar thiam hmasate khan Mizo ṭawngin an zir vek a ni; Mizo chi peng dang ṭawngin a zir theih loh vangin.

Ringtu hmasate zingah khan Pathian mi hman hla phuah thiam tak takte thusawi thiam tak takte an awm a, kha’ng Pathian mi ruatho khan an Pathian fakna hla phuahte leh an Pathian thusawite kha Mizo ṭawng vekin a ni, a tih theih awm e. Chuvangin, Pathian thu puan chhuah nan leh Pathian fakna hla sak nan Mizo ṭawng hi a pawimawh hle ṭhin a ni. Hun lo kal zelah Chanchin ṭha dak kan tihte khan nasa takin Mizo ṭawng hi a vawrh lar leh ta zel bawk.

Chuvangin, Pathian remruat Mizo ṭawng a tih loh theih loh a ni. Heng chauh pawh hi a ni lo, kan pi leh pute aṭanga kan thu leh hla ṭawngkaa an inhlan chhawn ṭhin te, kan thawnthute leh kan pasalṭha chanchinte reng reng kha ziaka dah hmasakna ber chu Mizo ṭawng vek hi a ni a. Kristian kan nih hnua kan thu leh hlate zawng zawng pawh hi Mizo ṭawnga phuah leh ziah hmasak vek a ni bawk nen, Pathian lehkhabu thianghlim Baibul pawh Mizo ṭawnga lehlin hmasa vek a ni. Tunah hian kan Mizo hnam chi pêng hrang hrang ṭawngin thu leh hla ṭha tak tak awmin, Pathian lehkhabu Baibul pawh lehlin awm tawh mah se, Mizo ṭawnga lehlin aṭanga entawna ziah deuh vek a ni kan ti thei awm e. Chuvangin, Pathianin Mizo ṭawng hi a ruat bik tih loh rual a ni lo a ni.

- Hausanga Hauzel