Cricket khelh hi intihhmuh chi a ni
Kan India ram nulate chu a vawi khatna atan Cricket World Cup 2025-ah an champion. Semi final-a India-in Australia an hneh aṭangin India ram a nghawr nghing nghal a, Mizote pawn Kristian nula Jemimah Rodrigues chanchin kan sawi zui hat a nih kha. Mizo ṭhalaite pawh hian cricket hmanga infiamna hi kan tuipui a, kan ngaihhlut deuh deuh a ṭha hlein ka hria.
Khawvel ram ṭhenkhat hian infiamna tuipui bik an nei a, India ramah pawh phat rual lohin cricket hi kan tuipui chiang a ni. Chuti chung chuan kum 1973-a Cricket Word Cup khelh a a nih aṭangin kan India nulate hi an champion hlei thei tlat lo. Kum 2005 leh 2017 te khan final chu an thleng tawh.
Mizo ṭhalaite hian he infiamna hi kan intihhmuh a, kan tuipui a hun ta hlein ka hria; a chhan chu sum a tam tlat. Mizote cricket infiamna lamah kan la hniam hle chung hian Cricket Association of Mizoram (CAM) kum khat sum che vel (budget) tamzia pawh kan sawi hluai mai chu a nih hi. Keini’n ngaisang loin lo tuipui viau lo pawh ni ila, India ram kan nih miau avangin football ai chuan cricket hian ngaihhlut a hlawh zawk tho tho dawn.
Ṭhangthar infiammi leh infiamna lam tuipuite zingah hian a ṭhen chu boxing lamah, a ṭhen chu football lamah, a ṭhen chu cricket lamah ke i’n pen suau suau mai teh ang u khai. Heng infiamna kawng peng hrang hrangah hian tun hmaa kan lo ngaihven ngai meuh loh cricket hi ngaihhlut nachang hriain, heti lamah hian ke i pen hlawm teh ang u khai.
Tunah hian Hnahthial nula Lalrinfeli, Pu Romawia (F) leh Pi Lalthianghlimi te fanu chu NE senior player niin, Nagaland lamah inkhel turin a awm mek a. Kan Mizo nula leh tlangvalte hi hetianga feh chhuak hi awm suau suau se ka va han ti em.
Sikul kan kal chhan te, dawr kan neih chhan te, pisa kan kai chhan te, lei kan laih chhan te, motor kan khalh chhante hi sum tam zawk thawh chhuah kan tum vang vek a lo ni a. Infiamna kan tuipui chhan pawh sum tam zawk thawh chhuah kan duhna vang tho a lo ni. Chuti a nih chuan, infiamna rau rauah pawh sum tamna lam hi bawh ila, kan thawhrimna leh hahpuina te pawn lukhâwng a nei nge nge zawk ngei ang le.
Mizoram khaw tin deuhthawa infiamna hmun kan neih, badminton khelh te hi a ṭha lo ni lovin, khawvel infiamna chi hrang hrang zingah hian hlawh tlemna pawl tak zu ni daih si a. Kan hun leh thâ, kan thawhrimna leh inpekna zawng zawngte aṭanga chhûta kan tana ṭha tur zawk kawng kan thlan thiam hi a pawimawh ve a nia. Mizo ṭhalaite hian hawh u, cricket hi intihhmuh ang u khai.
- Madawnga Khiangte, Rulchawm