Clinical Establishment Act

The Clinical Establishment (Registration and Regulation) Act, 2010 hi 18th August, 2010-ah The Gazette of India-a chhuah a ni a, hman ṭan a ni. A tirah chuan Arunachal Pradesh, Himachal Pradesh, Mizoram, Sikkim leh union territory ten kan hmang a, tunah erawh chuan state 19-ah hman mek a ni. State dang pawhin an hman ngei theihna turin sawrkar laipui chuan hma a la reng bawk.

Clinical Establishment tih chu kawng hrang hranga damlo enkawlna hmun tihna a ni. Sawrkar, mimal emaw pawl enkawl hospital, clinic, polyclinic, thisen leh khawl hmanga test hrang hrang tihna hmun (laboratory and imaging center), physiotherapy clinic, counselling center, occupational therapy leh damlo enkawlna kaihhnawih hmun reng reng chu a huam vek a. Heng hmunte hi India sawrkarin damlote enkawl nan a pawm (Indian recognized system of medicine -Allopathy leh AYUSH) hmanga inenkawlna hmun a ni tur a ni.

Clinical Establishment Act thil tumte:

1. Ram puma damlo enkawlna hmun awm zat chhinchiah

2. Doctor suak (quackery) tihbo.

3. Damlo enkawlna hmun zawng zawng tehfung mumal tak hmanga inenkawlna hmun rintlak leh belhchian dawl tak ni tura buatsaih leh, an nih leh nih loh enfiah.

Clinical Establishment Act hnuaia central leh Mizoram sawrkar rules awmte:

1. The Clinical Establishments (Central Government) Rules, 2012

2. The Mizoram Clinical Establishments (Registration and Regulation) Rules, 2014

3. The Clinical Establishments (Central Government) Amendment Rules, 2018

4. The Mizoram Clinical Establishments (Registration and Regulation) Amendment Rules, 2019

5. The Clinical Establishments (Central Government) Amendment Rules, 2020

July 16, 2014-ah Mizoram sawrkarin Notification chhuahin District Registering Authority (DRA) chu district tinte tan The Clinical Establishments (Registration and Regulation) Act, 2010 Section 10-in a sawi angin din a ni a. Hun kal zelah siam rem niin, tun thlengin Deputy Commissioner chairman-na hnuaiah ṭha taka kalpui zel a ni. DRA-te hi district tina he dan kengkawhtu turte an ni.

Clinical Establishment Act hnuaia inziah luh theih dan:

He Act hnuaiah hian damlo inenkawlna hmunte hi hlawm hrang hrangah ṭhen a ni a, registration hi chi hnih, Provisional leh Permanent registration a awm. Central lam aṭangin damlo inenkawlna hmunte tehfung mumal tak (minimum standards) tihchhuah (notified) a la nih loh avangin provisional registration chauh pek chhuah ṭhin a ni. Provisional registration hi kum khat chhung zel a ni a, Permanent registration hi kum 5 chhung a dam. District hrang hranga Chief Medical Officer office-ah tih ṭhin a ni.

Amaherawhchu, Central aṭanga lehkha kan dawn angin 12th October 2023 khan The Clinical Establishments (Central Government) Amendment Rules, 2018 behchhanin medical diagnostic (or pathological) laboratory-te chu Permanent Registration ti turin Mizoram sawrkarin notification a chhuah ta a. Laboratory din sate chu kum 2 chhung Minimum Standard phak thei tura insiamremna hun pek a ni a, October 2025-ah chuan laboratory ding sate chu Permanent Registration nei tawh tura beisei an ni. Laboratory hawng tharte tan Section 23(iii)-in a sawi angin thla 6 chhung Provisional registration neiin an kal thei ang a, chumi hnu lamah chuan Permanent registration an neih a ngai tawh.

Laboratory Permanent Registration leh a tehfung:

Kan dam loha doctor-te kan pan hian, kan natna chhan hmu chhuak tur chuan doctor-te hian test hrang hrang min tihtir ṭhin a. Chung zingah chuan thisen, zun leh ek, taksaa tuiril awm test te, biopsy lakte a ngai ṭhin. Kan test result azirin doctor-te chuan enkawlna min pe ṭhin a ni. Heng test hrang hrangte hi laboratory-a tih ṭhin a ni a; result a dik loh chuan enkawlna dik lo kan dawng palh thei a, chuvangin, laboratory-a thawktute mawhphurhna a sang hle.

Laboratory Minimum Standard hi Permanent registration pek theihna tura Ministry of Health and Family Welfare -in tehfung a rawn siam ni a. Laboratory-te hi hlawm (category) thum– Basic Composite, Medium leh Advanced level-ahte a rawn ṭhen hrang a. Tehfung hrang hrang a tarlante chu–category zira an test tih theih chin (scope of services) te, a hmunhma a awm tur leh tar tur hrang hrang te, thawktu qualification leh thawktu awm zat tur te, bungrua/hmanrua vawn thianghlim dan tur te, dan zawm ngai an zawm tur te (biomedical waste management rules, etc), damlote chhinchhiahna (record) vawn ṭhat dan chungchang te, an khawl hmante a dikin a rintlak a ni tih enfiah (calibration) leh, an test result a dik leh dik loh en nana laboratory rintlakte nena khaikhin (inter laboratory comparison) neih tur tihte a ni. Heng dan ang hian an kalpui leh kalpui loh hi kum tin sawrkar lam aṭangin vawi khat tal enfiah an ni bawk ang.

Chuvangin, Mizoramah pawh thisen leh thil dang test kan tihna hmunte a lo changtlun zawk theih nan leh a result-te a dik zawk theih nan laboratory-te’n sawrkar laipuiin a rawn beisei ang phak turin hma an la mek a, permanent registration rawn dilin kan inpe ṭan mek a ni. He danin min phut angin permanent registration ti lote chuan an hawng zui thei dawn tawh lo. Permanent registration neite chu laboratory rintlak an ni dawn a, hei hi mipui pawhin kan bengkhawn a ngai hle a ni. CEA Permanent Registration Certificate hi a neite chuan awlsam tea anmahni dawrtute’n an hmuh theihna hmunah an tar tur a ni a, chu chu mipui pawhin kan ngaihven a, permanent registration neite hnen ngeia kan test tir a pawimawh hle.

CEA National Council Meeting chuan damlo enkawlna hmun dang eng emaw zat tehfung tur a pawm tawh a, sawrkar laipui pawmpuina nghah mek a ni. Hei hi tihchhuah a nih hunah chuan inenkawlna hmun dangte pawh Permanent Registration kalpui leh an ni ang. Damlo inenkawlna hmunte rintlak leh changtlung zawk a siam hi sawrkar hmalakna kal zel a ni a, mipuite pawhin sawrkar hmalaknate min hriatpui a, min ṭawiawm zel turin kan sawm a che u.

- Dr C. Vanlalhriatchhungi, State Level Coordinator (CEA), Directorate of Hospital and Medical Education