Puan leh pangpar aiah pawisa

Mizote hian thihna kan tawh hian kan in tuarpui hle ṭhin a, tawrhpui nan puan leh pangpar kan inpe nasa ṭhin hle. A dawngtu tan a lawmawm rualin pawisa fai a hlu zawk fein a rinawm. Puan dawn hnem avanga ropuina a awm lem lo a, pangpar kan inpek ṭeuh avanga han indah san ngawt pawh a dik bik lo ang. A pawimawh ber leh kan mamawh ber chu pawisa bawk hi a ni.

Vairengte Chhim Veng Branch YMA mitthi hriattirnaah chuan puan leh pangpar aia pawisa inpek uar a ṭhat zawk thu an ziak a, ka lawm zawng tak a ni. Puan emaw pangpar emaw pe tur chin chu an awm ngei a, a hla deuhin an pe thlazen hi chu mi harsatna sutkian aiin, harsatna a thlen lek lek zawk ni pawhin a lang.

Puan an pe ṭeuh a, suma chantir ngaihna a awm lo. Chhung leh khat an sem vel mai mai a, an tan hlâwkna a awm miah lo. Pangpar pawh an pek tam lutuk chuan a hnuah buaipui ngai khawp a ni fo. Paih mai mai a uihawm si, dahṭhat dawnin a fresh te a ni a, an khawi a, an khawi zawh bak thlanah te an dah a, hnawksak tham dawng tan phei chuan a manganthlak zawk a ni.

Mitthi an awm hian ralna pawisa fai pek uar deuh deuh hi a hlu zawk fe mai. Hun rei tak damlo, damdawi ina enkawl phei chuan pawisa eng zat tak seng ang maw? An han thi leh nghal a, thih hian a senso sanzia kan hre vek. Heng an senso phuhruk hi a Mizo a, mi mangang kan chhanchhuak a ni ber e.

Mi neinung deuh tan chuan pawisa inpek aiin puan leh pangpar pek hi a lawmawm zawk pawh a ni thei a, puan leh pangpar dawn hnem hian lan ropui a awl zawk pawh a ni mai thei. Mahse, mi rethei zawkte tan chuan puan leh pangpar ai chuan pawisa hi a hlu zawk a, an tan awmzia a nei hle zawk a ni tih kan hriatpui a hun ta hle.

Pangpar leh puan inpek te, pawisa inpek te hi a ṭha vek a, mitthi leh mitthi chhungte kan ngaih pawimawhzia lantirna vek a ni. A lawmawm em em vek. Lawmawm rau rauah pawisa inpek hi mitthi chhungte tan a hlu lehzual fo a ni.

Chuvangin, chhiat tawkte kan ngai pawimawhna hi an tana awmze nei lehzual a nih theih nan pawisa fai ngei hmanga inrâl hi uar ta zawk ila an tan a lawmawm hle ṭhin a ni tih hria ila, an phurrit tam tak kan chhawk zangkhai a ni tihte hi hriatpui tlang thei ila a va ṭha dawn em.

- Lal Rinmawia