Assam Rifles chhuahsan ram hmang ṭangkai thuai ang u

Hman tuk zing ka bazar kal tur chu mi pakhat, tun hma deuha Aizawl tlaklam veng pakhata VCP pawh lo ni tawh chuan mi lo tiding a, "Chanchinbua i thu ziahte ka lo chhiar ṭhin a, thil pakhat hrilh duh che ka nei. Assam Riffle chhuahsan ram hman dan tur chungchanga ram awl hmun hring, green area tur zuah kha a zau lutuk. ZPM rilru aṭang chuan a ṭha lutuk ang a, mahse, ngaihtuah teh, tun hmain Pu Ṭhena PC sawrkarin Aizawl tihthawlna tur New Capital Complex Luangmual a lo buatsaih pawh a hnua Congress leh MNF sawrkarin an tihkhawloh vek tawh hi. Nakinah ZPM sawrkar loh huna buaina mai a la ni ang tih a hlauhawm. Chuvangin, mipui mamawh thil atan tunah tikhat vek zawk rawh se," tiin, kei, engmah nihna leh tih theih nei hauh lo chu mi lo hrilh ve tlat a.

A hnuah chanchinbua Dr. C. Lalrampana'n he lai ram master plan chungchang a rawn sawi zauna tawp lamah khitiang hlauhthawnna khi a rawn sawi tel zauh bawk nen, AR ram chungchang hi ka'n sawi ve mai mai ang e.

AR ram hlui kan hman dan turah hian duhthusam leh rawtna hrang hrang ṭha tak tak vek, mi chi hrang hrangin an sawi hnem tawh. A ṭha em em vek a, ṭha ber leh thlan ber tur a vang duh khawp ang. Thutlukna siam thei turtu tan pawh a harsa hle ang a, mawhphurhna a sang si, tu mahin nakin hi a dik takin kan hmu lawk thei bawk si lo. Nakin kum tam tak lo kal turah hian mipui dem an hlawh reng mai ang tih an hlau ve hle ngei ang a, a ṭha ber tur dawnin, chawl lovin an ngaihtuahna pawh an hman reng a rinawm.

Tute’n emaw an hlawkpui bik ang tih kan inîtsîk tawn ṭheuh vang leh kan hlauhthawn vek vang pawh ni chuang lovin, tute pawh hian he lai hmun remchang ṭha lutuk mai, tlai khawhnua kan lo nei ta hi nakin zel atan pawha kan vaia tana ṭha thei ang ber tura hman ṭangkai theih turin awm se kan tih ṭheuh vang a ni. Mahse, nakin hla tak chu sawi loh, tun atan mai pawha ṭha ber tluantling hi chiang tak leh dik takin kan hre lawk vek thei si lo. Thil ṭha zawng zawng leh kan duhthusam ṭheuhte hi he AR chhuahsan ram ruakah hian kan dah leng vek hek lo. Chuvangin, helai ram hman dan tur thutlukna siam theite hian rilru fim tak pu chunga an thutlukna siam chu kaltlangpui mai rawh se. Rawtna leh thu hrang hrang sawi hian tawpintai a nei dawn chuang lo.

Helai ram hman dan tur ngaihtuahtu Committee sangin ni 16 October 2025-a helai ram master plan an tihchhuah kha a chipchiarin hre ve lo mah ila, ka hriat chinah khan kei chuan ṭha tawk ka lo ti thawkhat ve ngawt a. ipui mamawh, kawng siam, tui dahna siam, electric transformer bun, police out post leh thil dang ṭhenkhat, in sak lam atan a ram pumpui aṭanga 39.33% leh hmun awl hring nuam tur 60.67% an ruahman kha tawk ka lo ti ve hle a ni. Mahse, kha kha thu tawpna, final a ni chiah em tih chu ka hre lo a, hna erawh thawh ṭan a la nih hma hian eng emaw han sawi ve hrim hrim duh ka nei a ni. Mahse, thutlukna erawh Committee thu thu a ni.

Pu Rampana sawi ang deuh khan, convention center kha mipui leng zat tur hisap mi 2,000 kha a tlem mah mah ka ti deuh a. Tin, open air theatre kha khawilaiah nge, engtin nge an sak dawn tih chu keini ang tan chuan lo mitthla thiam a har hle nâ a, a lian thei ang ber siam ni se. VVIP lo kal chang emaw, international event emaw a awm pawha mihring tam tak dâwl zo tur ngei ni bawk se. Tin, Babutlanga mipui tana hmun hring, green park siam tih kha ṭha ka ti lutuk. Khawpui boruak ri luih luih kara hmun hahdam lo awm tur kha a va ṭha em.

Police out post dah tih kha ngei ngei turah ka ngai a. Mahse, AR Hospital hmun hluia dah kha chu chhimlam a hlat mah mah ka ti a, a piah lawkah Aizawl Police Station a awm tho si a. Treasury lam hnaih deuhah hian awm thei se ka ti deuh a ni. He lamah hian boruak chi hrang hrang a tam thei si a. Chumi a nih loh pawhin, Police OP hi hmun hnihah tal dah ni se.

Chu bakah, vantlang kawngpui aṭanga hmuh phak loh AR ram chhuahlam, Venghlui leh Bethlehem dep lam ram ruak leh reh deuh lam vel hi hman aṭanga vawiin thlenga mi awm ṭha duh lo leh rukrute zalenna hmun a ni a; zan chu sawi loh, chhun engah pawh mahnia kal chu a nuam chiah lo a ni. AR an chhuah hnu phei kha chuan henglai vela building-a ruk theih zawng zawng ru ṭhin leh riak ṭhinte hi hmuh an hreawm hle a, veng hnaivai tan an hlauhawmin inven reng a ngai bawk. Chuvangin, he lam ram ruakah hian a hranpaa vengtu lam dah theih a nih loh pawhin, hmun hnih khatah building pawimawh, chhun zana mihring chettlat rengna tur lam chi awm thei ngei se tihte hi ka han rawt ve a ni e.

Aw le, duh tawk ang, duhthu sam dawn chuan sam tur a tam lutuk, kan sam seng dawn chuang lo. Assam Riffle chhuahsan ram hman dan tur Committee sang kokim taka ruatte khan mi zawng zawng duhthusam leh lungawina, ṭha famkim chatuan tur kha engtikah mah an rel chhuak thei dawn chuang lo. Huaisen takin thutlukna siam thuai thuai ula, helai ram hi a khawloh tam hma hian sawrkarin hma la vat zawk rawh se, tih hi ka rawn tawng ve chhan mah chu a ni e.

- K. Hmingthankaia