College zirtirtu lak dan kalphung

Kan hmuh leh hriat angin College zirtirtu lakna tur advertisement chu lo chhuakin, post 33 zet lak tur a ni hi thil lawmawm tak a ni phawt mai. College-ah hian zirtirtu indaih lohna a nasa hle a, post 100 chuang fe chu tunah hian hnawhkhah lohin a awm mek a ni. College-a zirna a tawp rup loh nan tiin kan state sarkar hian zirtirtu a nghet lo ṭhen hrang hrangin a la khawm a, college hi hna inang thawk, mahse, dinhmun inthlau tak takte awm tamna ber a ni hial awm e. Tun dinhmunah hian regular, contract, RUSA, part-time leh casual teacher te an awm mek a ni. Tichuan, regular recruitment tur advertisement chu a lo chhuak ve ta a, college zirtirtu a nghet hi eng emaw changin subject ṭhenkhatah pahnih khat lak zeuh a awm ṭhin a, hetia subject tam zawk huam a lak hi ka hriat sual loh chuan kum 10 chu a chuang tawh awm e.

College zirtirtu hna dil thei chinte hi University Grant Commission (UGC) danah chuan Master of Arts (MA) pass chin an ni a, nimahsela, National Eligibility Test (NET) exam an paltlang a ngai thung a ni. Chu bakah chuan, Doctor of Philosophy (PhD) nei chinin an dil thei bawk.

Tichuan, college zirtirtu hna dilte hi hna dang lak dan ang lo deuhvin written test an nei ve lo va, BA aṭanga an mark hmuh leh thil dang mark an hmuh theihna hrang hrang criteria siam a ni a, chutah chuan anmahniin mark (self-assessment) lo inpein, chu chu sawrkar lamin a endiktu lo siamin an mark inpekte chu a dik ngei em tih an lo ennawn leh a, a dik ngei te chu interview tura koh an ni ta ṭhin a ni.

He self-assessment score hi tun ṭuma ka sawi thui duh lai tak chu a ni. Kan sawi tawh angin college zirtirtu lak hi a khât hle a, chuvang chuan tun hun hi nghakhlel taka lo thlirtu tam tak an awm ngei ang. Chutih laiin, hna dil tumte zir dan phung (academic system) hi a inang lo ta hle a ni. Tun hma kum rei vak lovah kha chuan BA leh MA te hi year (annual) system a kal a ni a, kum khatah vawi khat exam mai ṭhin a ni. Tun hnuah chuan semester system-in thlak a ni ta a. Semester system-ah hi chuan kum khatah vawi hnih an exam tawh a, chumi bakah chuan zirlaite’n tih tur hrang hrang (assignment leh internal exam) te neiin tun hma annual system-a kalte ai kha chuan an mark hmuh pawh a lo ṭha ta zawk hle a ni.

Entir nan: tun hma deuh year system-ah chuan BA kha vawi 3 exam a ni a, semester system hman hnu chuan vawi 6 exam a ni thung. Internal test-te nen chhiar phei chuan BA hi vawi 10 chuang an exam tawh a, an zir zawh thar apiang kha an exam zel tihna a nih ber chu. Hei vang hian semester kalphung (system)-ah hi chuan a fail theih loh mai ni loin, mark a hmuh chhiat theih loh ti ila a sual tam lo hle ang.

Annual system emaw, semester system-ah pawh hian kan kalna college emaw university azirin mark an pek dan a lo inang lo leh hle bawk a. India ram state ṭhenkhatah chuan mark an lo inpek deuh ṭawk ṭawk laiin, state ṭhenkhat chu chutiang chu an ni ve lem lo bawk. Chuvangin, college zirtirtu hna diltute chuan an academic system danglam tak vang te, an chhuahna university inan loh vangte in an self-assessment score chu a lo dang ta duai duai thei a. Tun hma annual system-a kalte tan chuan tun hnaia an naute tluk chu thil awlsam lo tak a lo ni ta.

College zirtirtu lakna tur a sawrkarin an mark hmuhte lo endiktu tur (Screening Committee) a ruat a, chu mite chuan a post awmzat azirin interview tur zat chu an self-assessment score aṭanga chhutin an lo bithliah ta ṭhin a ni. Helaiah tak hian tun ṭuma college zirtirtu lak turah hian fimkhur leh ngaihtuahna zau deuh sen a ṭha hlein ka hria a. An mark hmuh zat aṭanga lak chuan khing kan sawi tak ṭhenkhatte khi chuan an lo nghah ve ngar ngar hna hi engtikah mah an dil ve thei tawh dawn lo a ni. Chuvangin, college zirtirtu lak dawna interview koh tur zat hi UGC pawh hian dan fel takin a nei lem lo mai thei a, state ṭhenkhatah chuan post khat interview tur pawhin mi 10 chuangte an lo ko ṭhin a, chutiang deuh a tih ve chu a ṭha hlein ka hria.

Interview an tam poh leh a la tute tan duh thlan tur a tam deuh dawn a ni mai. He hna hi lak a khat em avang hian subject ṭhenkhatah chuan PhD nei pawh hi an ther fur tawh awm e. Nimahsela, kan sawi tak ang khian an academic system danglam tak vang khian khing PhD neite pawh khian tunlai ṭhangtharte PhD la nei ve si lote pawh kha an self-assessment score-ah chuan an pha lo hial thei awm e.

Tin, sawi tak angina, college zirtirtu laknaah hian written test neih a nih ve lem loh avangin mi ṭhenkhat tan chuan ‘Engtin nge a thiam ber leh ṭha ber an thlan chhuah theih ang?’ tih zawhnate pawh awm thei niin a lang. Hei vang hian UGC-in college zirtirtu ni tur a thiamna neih ngai a tih nei chin hote hi chu an BA, MA, leh M.Phil mark-te chu engzat pawh ni se, interview tur a koh vek ni thei se a duhawm khawp mai. Chumi hunah chiah chuan ‘a thiam ber’ thlan chhuahna hun remchang a inhawng ang. Hei hi ram leh hnam leh zirlaite tan tak pawh thil ṭha tak leh chhenfakawm tak tur niin a lang.

Chuvang chuan, tun ṭum college zirtirtu lakah hi chuan subject tina qualify-te chu interview tura koh ni se, subject ṭhenkhatah chuan a qualify-te hi a post tlem ngaihtuahin an lo tam viau thei a. Chutiang dinhmuna an vaia koh a harsa a nih pawhin PhD nei chin talte hi chu interview tur hian koh vek ni se tiin ka ngaihdan leh ka hmuh dan ka han au chhuahpui ve a ni e. He ka ngaihdan hi kan sawrkar/Mizoram Public Service Commission pawh hian a tum tho chu ka ring a, an lo tum sa a nih leh a lawmawm a, an lo tum lem lo a nih phei chuan khawngaiha an ngaihtuahna seng nawn leh tura ka ngenna han ni nghal bawk se.

- John Remrema