THE BIBLE SAYS SO!

Khawvel hun hnuhnung thua Bible ṭawngkam hman ṭhin ṭhenkhatte leh keimahni Mizoten remchanga kan lo sawi dante hi tun ṭum chu i lo ngaihtuahho teh ang u. Lalpa lo kal lehna tih emaw Second Coming tih emaw hi a lar ber chu a ni phawt mai. Mahse hei lo hi a dang a tam hle a. Tunah sawi kim vek lo mah ila, enge maw zat chu han phawrh chhuak ta ila. Kan thu lâknate chu Bible a ni ang a. Mithiam tak takte awm mahse, kan thu lâkna chu Bible bung leh châng an ni zel ang. Hei hi a pawimawh em em a.Bible-in a sawi loh hi chu innghah nan kan hmang tur a ni lo. Hei hi vawn tlur tur a ni!

Bible thu pawimawhna hi kan man fuh a ṭûl hle. Pa Pathian chuan khawvelah A Fapa A rawn tir a. Mihringah Pathian Thlarau hmangin A lo piang a. Chhandamna thu leh thu ṭûl dang zawng zawngte A zirtir a. Zirtirte hriatna a la chak loh avangin A thu sawi duh tam takte chu Thlarau Thianghlim kutah A hnutchhiah a, Anin zirtirte A zirtir leh ang (Johana 16:12,13). Chung zirtirhote chuan Pathian Thlarau hruainain kan Bible hi min ziaksak ta zu nia. Apostol-te zirtirna thu zawng zawng kha Thlarau Thianghlim zirtirna a lo ni ta. Tichuan Kohhran pawh hian Bible thudik thutak chauh chu a zirtir tur a ni. Heng Apostol-hote hnênah hian Lal Isua chanchin leh A zirtirna thu chu khawvel zawng zawng hril darh turin thu A pe a (Math 28:18-20). Thlarau Thianghlim kaihhruaia an thuziak zawng zawngte chu hmun tinreng leh hnam tinrengte tan Pathian Thu a lo ni ta. Hetah hian thil pawimawh em em mai, kan vawn tlat tur a awm a, chu chu Apostol-te khan Pathian thu zawng zawng hi an hre vek a ni tih hi. Chanchin Ṭha Johana ziakah chuan tihian a inziak a "...thutak zawng zawngah chuan a hruai lût ang che u" tiin (Johana 16:16,17; Thutak zawng zawng tih chu all the Truth -TEV). Paula chuan Ephesi Kohhran hruaitute hnenah chuan "Pathian rêl zawng zawng a zain in hnenah hrilh ka tîm loh kha" a ti (Tirh 20:27). Apostol-te hian Pathian thu tinrêng, topic tinrêng, thupui tinrêngte hi an hre hle tih hi rin mai tur a ni. Kohhran pawh hi a kal dikna tur chu Apostolte zirtirna atang hian kan peng tur a ni lo. Pathian thu hi hmana dik tuna dik tawh lo ang deuha sawi kan awm fo hi thil pawi ber pakhat a ni.

Eng ngati nge hetiang thu hi kan sawi tâk hrep le kan tih chuan, a bikin hun hnuhnung thu-ah hian, kan Lal Isua leh A apostol-te thu sawi sâwpna kan hmu fo va, kohhran mipuite tan a pawi em em a ni.

Hun hnuhnung thu-ah chuan Lal Isuan A Mote hruai hmasa tura A lo kalna te, kan Lal Isuan hrehawm nasa tak, tun hmaa thil rapthlak lo thleng tawh tena rapthlak lama an tluk loh, rei se chuan mihring thih zawh vek theihna tur, tun hnua awm tawh lo tur A sawi te, A mi Israel-te tuna Amah ring hauh lote'n a hnam pum puia an la rin tur thu te, Jacob-a (Israel-te) mangan hun tia Jeremia'n a sawi te, Daniela tawngtaina chhanga Pathianin Israel hnam tana harh chhuah lehna hun hapta 70 A pek te, Israel mi zawng zawng chhandam an nih vek hun te, Sakawlh chungchang te, mi thianghlim lâwr lai thlenga hre si awih duh lova piangthar ve lote tan piantharna hun khâr a nih dawn thu te, Lalpa nî te, Lal Isua Krista nî te, khawvela A lalram, kum sang awh tur din tura Lal Isua lo kal lehna te, Berâmno nupui neih hun te,piangthar lo zawng zawng rorelsaka meidila paih hun leh chatuan lalram thlengin, sawisen loh ngaihnawm leh ropui takte a va tam em!

Hengte hi zawi muangin hriat fiah kan tum dawn a ni.

- F. Lal Thanzuala, 9436141242