Ruihhlo ngaite zalenna khawpui

Ruihhlo ngaite hi ka haw hran hauh lo a, puitu an ngai, chhantu an ngai tih erawh ka pawm thlap e. Chutihrual chuan ruihhlo ngaite'n rights an neih rual hian, ruihhlo ti ve lote pawhin right an nei tih kan hriat fo a ṭha awm e.

Tun dinhmunah hian Mizoram khawpui ber Aizawlah hian ruihhlo ngaite an zalen tak zet a ni. A bikin zing leh tlai lamah an zalen zual a, Aizawl khawpuia hmun lûn lai ber berah inthlahrunna nei hauh loin hun an hmang a ni. Hmeichhia leh naupangte tan phei chuan Aizawl khawpuia kea veivah hrehawm khawpin ruihhlo ngaite an zalen. Khawiah nge thuneitute hi an awm?

Ruihhlo ngaite man khawm an nih hian YMA, Police leh Excise lam tan kawl reng a buaithlak avangin a tam zawk chu home-ah dah an ni ṭhin. Mi ṭhenkhatin ruihhlo ngaite thlavang hauhin, home an sawisel a, home lamin an chhuah ta hum hum a ni. Hei hi Aizawl khawpuia ruihhlo ngaite an zalen chhanah a puh theih mai awm e. Khawiah nge an thlavang hauhtute kha an awm zawk tak? An buaipui zui dawn lo em ni?

Rel a rawn lut a, state pawn aṭangin khualzin an rawn pung nasa sâwt hle. Rawn zin tam takin kan khawpui traffic movement leh a dangte a ṭha zawngin social media lamah mi pho chhuahsak mek. Mahse, hetianga ruihhlo ngaite zalen taka Aizawla an awm reng chuan a chhe zawnga kan lansarh palh a hlauhawm a, kan lansarh hun pawh a la awm ngei ang a; chutinh hunah chuan khualzin an rawn kal ṭhat duh loh phah a hlauhawm a ni.

Ruihhlo ngaite hi hetiang em ema Aizawl khawpuia an zalen ta hi chu enliam mai chiah ka ngai lo. Ruihhlo hi an sim thei lo a nih pawhin, hetiang em ema an zalen ta mai hi chu a fuh lo a ni. Kan tu leh fate tan a him lo a, an rilru a dik lo zawngin a hruai kawi palh ang tih pawh thil hlauhawm tak a ni. Chuvangin, thuneitute hian a rang lamin hma han teh se.

- Rinsangzela