ṬHALAIIN HNA THAWK SE

Ṭhalaite awm dan chuan ram a ṭha zawng leh a chhe zawngin a kaihruai ṭhin a, ram mipuite enthlak leh innghahna ber an ni. 

Kum upate hna thawk lai hmuh ai chuan ṭhalaite hnathawk hmuh chu a nuam bawk. Kan ramah hian ṭhalai hnathawk aiin kum upa lam hnathawk hmuh tur an tam zawk tlat thung. Hei hian hmasawnna lamah ke kan pen chak lo tih a entir. Ṭhalaiin hna an thawh suau suau hunah Zoram hian hma a sawn dawn a ni. 

Ṭhalai tam zawkten hnathawh tur an hmuhna turin tunge hma la dawn? Tute nge a mawhphurtu? Ṭhalai tam tak chuan chhungkua, khawtlang leh ram hmasawnna te chuan mahni koah a innghat tih pawh an hre pha lo. Anmahni siamtu chu hre duh lo ang maiin mahni duh thu leh nun hlimna an dah lian hle a, khawlaiah an vak chhuak a, ṭhian ṭha lo an va kawp a, chuta ṭang chuan ruihtheih thil an ti a, reiloteah an lo addict ta ṭhin a ni. Chutiang mi chuan hnathawh ai chuaṭhiante nena lenho te, kawtthler leh mi inahte nun hlimna zawnga vah nilen te an thlang zawk a. 

Ṭhalai ṭhenkhat hna thawk peih lo ve hrim hrim an awm a, chhiatni ṭhatniah ṭhahnemngai taka va thawk a, in lamah hnathawh peih leh miah si lo an awm bawk. Chutiang ang chu kan sawi laiiṭhalai tam tak chu kut hna thawh leh lehkha zir peih tak te, sports lama thleng sak tak tak an awm, chungho chu dinhmun sang tak takah an awm a, khawtlang leh ram hmel an timawi em em a ni. 

Nu leh pate thurawn ngaithla peih lote chuan KṬP leh YMA ah chauh rilru pe an awm a, chung hmunah te chuan pawl thiltih ringawta tlingtla lovin, nun dan ṭha in zirtirna atan hman tel ni ta hlauh se ṭhalaite tan a hlu hle dawn a ni. 

Nu leh paten an fate an tetlaia awmze nei loa duat miah lova hnathawka tir bawrh bawrh ṭhinte chuan fa chhuanawm tak tak an nei ṭhin. Kan fate kan duat luatah kan dahawl lutuk ṭhin a, chu chuan zelthelna a hring ṭhin. Ṭhalai awmawl hna­thawk peih lo tam tak an awm phah ta a ni. 

Ṭhalaite hian hna thawk se, upate chu awl a hun ta. Nu leh pa, khawtlang leh sawrkar thuneitute pawhin ṭhalai awm awl tam lutuk hi kan vei a hun. Ram hruai­tute, khawtlang leh department hruatute, public sector leh pri­vate enterprised te pawhin ṭhalaiten hna thawh tur tam zawk an neih theih nan an in hawn zau a ngai a ni.

Zoramah hian mihring tlem kan inti a, mahse kan ram rawn kaihruaitu turte zingah lehkhathiam hna nei lo sing tel an awm tawh. Graduate thar hna mamawh mi sang tel kum tin an awm belh bawk si. Kan ṭhalai mithiamten kan ramah in tun nunna an hmuh loh avangin mi ramah hnathawkin an chhuak zo a, Mizoramin an thiamna te chu a chan nasa bawk a ni. 

Hetiang ang nuaih hi kan ṭhalai tam zawk awm dan leh an dinhmun chu a ni ta a, engtin nge kan hruai 

ṭhat ang? 

Eng hna te nge an thawh ve tak ang le? 

- H. Neihchungnunga

Durtlang North