PATHIAN THU AWIH LO

Nu pakhatin mi rawn ṭawngṭai a, "Pathian thu i awih lo," min ti a, a len pawh leng ṭhu duh loin a chhuak leh ta mai a. Hre chiang duh chuan ka Youtube channel ‘Dr.Keihawla Sailo Sermon (Pathian thu awih)' tih kha lo en mai ula.

Mizo ringtu hmasate khan piangthar tih te, thlarau thianghlim tihte sawi loin, ‘Pathian thuawih’ an ti mai zawk ṭhin a, Pathian thu an awih em em a ni. Tunlai nun phung nen chuan an inang lo vik vek hle. Keini chuan Pathian hming hi a narânin kan sawi ṭhin a, i sim hmiah teh ang u.

Pathian thuin min zirtir dan a hnuaia mite hi nunpui thei ila a va duhawm em!

1. Matthaia 7:21 – 'Lalpa, Lalpa' mi ti nazawng chu vanramah an lut lo vang a; ka pa vana mi duhzawng titu erawh chu an lut ang (Isuan a sawi).

2. Timothea 2:19–Lalpa hming lam apiang chuan sual kalsan rawh se.

3. Exodus 20:7–Lalpa i Pathian hming chu i lam mai mai tur a ni lo; Lalpa chuan a hming lam mai mai chu thiam loh chantir lovin a chhuah dawn si lo va.

4. Deuteronomy 5:11–Lalpa i Pathian hming chu i lam mai mai tur a ni lo. Lalpa chuan a hming lam mai maitu chu thiam loh chantir lovin a chhuah dawn si lo va.

3-na leh 4-na hi a inang reng a, 1-na leh 2-nain an tum a thuhmun deuh reng. 1-na, 2-na, 3-na leh 4-na te hian an sawi tum a thuhmun vek a ni.

Keini ho hian Pathian hming leh Lalpa tih hi kan ṭawngkam chhuakah kan lam ri ring hle mai a. Lalpa leh Pathian hming lam zingtute hian Pathian thu kan awih em? Sual kan kalsan em? Kan kalsan si loh chuan Pathian thu kan awih lo tihna a ni thei mai lo maw? Pathian thu hi sawi mai lova awih tu kan ni dawn lawm ni.

Ringtute kan nihna angina programme pawimawh tak tak, a huhova kan tih dawn apiangin hunserh neiin, kan ṭawngṭai ṭhin hi a zahawm a, uar zual zel tur kan ni. Chutiang taka ṭanna kan neih chuan kan rorelna leh kan thil tih hona te chu a puithuin a zahawm duh ṭhin. Ringtute nun dan atan a mawi a, uar zel tur kan ni.

Amaherawhchu, MLA-te rorel inkhawmna hi chu bawplawka inhnialna tur zawng an ang lu deuh lo maw? Pathian ringtute nunphung a tan chuan a zahthlak lu deuh ṭhin lo maw?

Rorel tura Assembly House-a ṭhukhawm turte hian Pathian hnena inhlanna nei thei ve se chuan ringtute an nihzia a lang ngei ang le. Mahse, chu chu India danin a phal si lo. India ram dan chu tidanglam chuang loin Assembly House-ah ngei hian assembly ṭan hma darkar chanve velah a duh apiang tan kan kohhran hruaitute hian ni tin minute 10 emaw lek tal hunserh neihsak thei se a va duhawm em. An rorelna a hmuingil ṭhin deuhin a rinawm. Assembly ṭan hma na nâ nâ chuan hunserh neih chu India ram dan pawhin a dang bik dawn em ni? Lalpa hming lamin sual kalsanna kawng a inhawng thei ngeiin a rinawm.

Chutiang chuan Lalpa hming lam fo ṭhinte hian Pathian thu awih dan i zir ang u. A hming lam fo si a, sual kalsan si lote hi chu Pathian thu awih lote kan ni. Chuti lo chuan, van lalfaka uire ni si kan lo ni dawn a ni.

Pathian thu i awih ang u. Israel lalte zinga ngaihsan awm ber Lal Davida khan a Lalpa faka lam kha a thlarau nun chaw tui ber a nih kha maw le!

- Dr. Keihawla Sailo