HEALTH CARE SCHEME HMAN THEIH SE

Hmanni chu kan ṭhenawm pa nikhaw hre lovin a awm thut mai a. Hmanhmawh takin Civil Hospital Casualty-ah a zana zanin kan tlan pui a. Casualty doctor chuan ICU-a awm a ngaih thu leh Civil Hospital ICU a khah vek thu min lo hrilh a. Private damdawiin ICU kan zawn sak ang che u an ti a. Duh thlan tur nei ta lo chu loh theih lohin Ebenezer Hospital ICU-ah kan in phur liam ta a. 

Vanneihthlak takin kan damlo chuan hma a sawn zel a. Amaherawhchu, awm man bill a lo chhuak a, anni ei chawp zawng ve mai tan chuan a tam duh hle a ni awm e. An mangang em em mai a. Kei chuan sawrkarin Health Care Scheme a siam te kha in zawm ve lo em ni? ka ti a. An ni chuan zawm e, Rs 1000/- in kan zawm ve alawm tiin an zawmna lehkha te chu min hmuh a. 

An mangan em avangin leh an baihvaih em avangin damdawiin hotute chu ka biak sak a. Damdawiin thu neitute chuan Health Care Scheme chu private hospital-ah te hman a la theih loh thu te, sawrkarin rate an siam zawm tura an tih chu hospital tan a ṭhat tawk loh thu te, Synod Hospital meuh pawhin an zawm duh rih loh rate a nih thu min lo hrilh a. 

Ka ngaihdan chuan Health Care Scheme an puanzar lai hian hman theih vek tura ringin mipuiten kan neih chhun ngawih ngawih Rs 1000/- laiin kan zawm ve a. Kan zawm lai chuan kan dam tur leh dam loh tur pawh kan hre bik lova. Amaherawhchu, damlohna kan han tawk ta cheng a, luhna tur awm ang angah kan invawm lut rawih a, a bill theih leh theih loh lam pawh kan ngaihtuah hman lo. Dam kan duh a ni tawp mai. 

Sawrkar hian mi rethei damlote hi a khawngaih chuan khawi damdawiinah pawh awm se an bill hi a phal tur a ni lo em ni? Damdawiinah hian keimahni ang bawk hi mi tam tak Health Care Scheme nei si, bill thei si lo an awm ṭeuh mai, an khawngaih thlak hlawm tak zet a ni. 

Damlo te an mang­ang e... ṭanpui an ngai e! Health Care ngai pawimawh sawrkar hian heng mi mangangte hi care se, khawi hospital-ah pawh awm se, ngaih­sak mawlh teh se! 

- VL Chhangte