Pu Thangtea & Pu Tlanga thlak chhan hriat a chakawm

MNF chuan sorkarna an chan aṭanga kum khat pawh a pumhlum hmain an Vice President pahnih an paih a, hei hi inthlak dan pangngaia inthlak aiin a paiha in paih a an avangin mi titi khawchang dawn khawmte leh zeldin thubawl hmangin i han ching phul dawn chhin ang hmiang. 

Dr R Lalthangliana hi MNF thluak bur anga sawi a ni ṭhin a, a nih chiah loh pawhin MNF tluak bur anga sawi tak hi ‘mi ṭhenkhatin’ an ngaimawh chhan a nih hmel tlat. Mi thiam a ni a, doctorate degree nei phak a nih bakah kohhran lamah pawh mi langsar tak a ni. 

Politics-ah record a neih ṭhat bawk avangin nakin lawka MNF President ni ngei tura chhung lam leh pawn lam mite rin dan a ni. Political party reng reng hi kan thlir chuan party President meuh hi chu an thlak an thlak lova, Pu Thangtea pawh hi tuna MNF President nghal tut tut tura rin ni lo mahse nakinah chuan President ni ngei tura ngaih a ni. 

Party tana mi hnawksak ni si lo, party tana mi ṭang­kai leh thawh hlawk em em mai OB aṭanga an paih (chawlhtir tih hmang mahse an paih a ni chiang) hlawm tawp mai hi an party tana an ṭhatpui chhanna tur awm hriatthiam a har tlat. SEDP duangtu an ni a, a duangtu a nih kher loh pawhin Pu Thangtea hi SEDP activist tih tur khawpa inthlan dawna zin kuala SEDP au puitu kha a ni a, chu SEDP pawh an la sem hmain ani chu MNF Vice President aṭanga paih a ni ta. 

Lunglei lam mi, Baptist Kohhran Upa leh Baptist lam pawhin sorkar lama, “Kan hmel lanna ber,” an tih theih tur ber Vice President aṭanga an paih chhan hi hriat a harsa. “Sorkarah a hun pum hmang thei turin party lama a nihna kan chhawk zangkhai,” ti dawn ta se Chief Minister Pu Zoramthanga chu MNF President a ni thova, Pu Tawnluia pawhin Deputy Chief Minister leh Senior Vice President hna a chelh kawp theih laia Pu Thangtea mi thiam, Lunglei chhuanvawr, Baptist hotu lian leh mi chak tel lova MNF rorel khawl a kal tur hi a uiawm a ni. Party hian decision lian tham chu OB level-ah a chingfel ṭhin a, chutah chuan Pu Thangtea chu an rawn ve tawh lovang, a tel tawh lova, rawn ngai lo tur zingah an dah tawh. 

Pu Tlanghmingthanga hi Hnam Run ṭhutchilha zahawm taka Hnam Run enkawl turin candidate pawh a ni duh lo, an tih kha a ni ve si a, tunah chuan Pu Tlanga chu ama insawi dan takah ‘Primary Member’ a ni hlawm ta tawp a. Ex Minister leh Ex Vice President a nihna hi amaha chhuan tur chu a ni ta mai a, Vice President aṭanga an paih tirha a thusawite kha ka lo hmu ve a, a lainatawmin a barakhaih hle tih a chiang a ni.

MNF-in Vice President leh Treasurer thar an nei a, chu chu Pu Lalthlengliana leh Pu K Vanlalauva an ni a, party lama mi senior leh vangvat kai ve ve an ni. MNF ruhkawl an ni a, OB post an inbeisei ngai loh thu an sawite kha kan lo hmu a, MNF OB nih hi an inbeisei loh bakah an la inring ngai lovang. 

MNF OB an nih a ṭul tak danah hian Pu Thangtea leh Pu Tlanga dah bo tum hrim hrimna boruak a lo awm ta em ni? He zawhna hi a chhunga chengten chiang deuhvin rawn hrilhfiah thei se, hetia ‘insiamrem’ hi party tana ṭha tur pawh a ni thei a, chu pawh chu rawn sawifiah ve zui se a lawm­awm dawn a ni. 

- K. Lalremruata