Eng tin nge ruihhlo kan do ang

YMA Inkhawmpui Lian vawi 75-na, October 21 – 23, 2025 chhunga Sakawrdaia neih zawh takah khan kum 2025 – 2027 YMA Kumpuan atan ‘Ruihhlo Do’ an puang a nih kha. Ruihhlo hi kan ram leh hnam hmelma, ṭhalai tam tak nunna suattu, chhungkua ti kehchhe tu, khawtlang ti nuam lo tu a nih avangin na taka kan do hi a ṭul a. He ruihhlo do Kumpuanah hian mitinin kan theih ang angin kan ram leh hnam i chhan teh ang u.

YMA Inkhawmpui Lianah khan kumpuan atan ‘Ram leh hnam humhalh’ tih leh ‘Ruihhlo do’ tih buk a ni a. Sawihonaah mi 10 an ding a, pakuain ‘Ruihhlo do’ an thlawp a, pakhatin ‘Ram leh hnam humhalh’ a thlawp thu a sawi a. Khami ṭum khan ka ding ve a, mahse, tuna ka sawi tum zawng zawng hi sawi a rem loh avangin tlemte chauh ka sawi a ni.

CYMA Hall-ah Central Coordination Committee (CCC) an ṭhu khawm dawn hnai niin ka hria a. Inkhawmpui Lian leh Rorel Inkhawm zawha CCC ṭhu khawm hian rorel bawhzui dan tur an sawiho leh ṭhin a. CCC-ah hian branch tin aṭangin mi pakhat chauh palai an nih avangin kan branch aṭangin ka palai ve pha si lo a, chuvang chuan, chanchinbu kaltlang hian ‘Ruihhlo do’ kumpuan bawhzui dan turah rawtna ka’n siam ve teh ang.

Ruihhlo do tih hian mi tam tak rilruah chuan khawchhak aṭanga lo lut ruihhlo man tura YMA chet chhuah a ni mai thei a. Hei hi thil ṭha tak ni mah se, ruihhlo man aia ruihhlo do dan ṭha zawk leh ṭha ber nia ka hriat chu–ruihhlo ngai tih tlem (demand reduction) a ni.

Ruihhlo hi eng anga tam pawh man ila, ruihhlo ngai an awm chhung chuan a rêm dawn lo a. Chuvang chuan, demand reduction hi YMA-in kan kalpui ṭhat chuan ruihhlo hi kan do hneh dawn a. YMA chauh ni lo, kohhran leh sorkar pawhin demand reduction lamah hian nasa zawka hma a lak chuan ruihhlo hi a tlem ngei ang.

Demand reduction bakah hian a chunga sawi ang hian, ruihhlo man (supply reduction) hi kalpui a ngai a. Mahse, hetah hian YMA-te fimkhur taka kan kal a ngai. Ruihhlo hi mi nazawng man tur a ni lo a, danah a man theitu tur tarlan a ni a. Chutih rual chuan, a man theitute’n an man lo hriatpui (witness)-ah mi tinin sorkar mi leh sate kan pui tur a ni.

Ruihhlo tawlh ṭhinte hi ram leh hnam hmelma an ni a. Heng mite hi man a, dan anga hremna kan pek dawn chuan ruihhlo hi dan ang taka man a, court-in thiam loh a chantirna turin mipui kan pawimawh a ni.

A man thei tura danin a ruatte hian tualchhung mite hriatpui leh hmuhpuia an man a ngai a; chu bakah, thubuai chu court-a rel a nih hunah an man laia hriatpuitute kan inlan ṭhat a ngai.

YMA branch leh group te’n ruihhlo kan donaah hian mahni thua ruihhlo man ve ngawt lovin, ruihhlo tawlhru kan hmuhte che sawn thei lo tura kan hualbeh a, a man thei tura danin a sawite koh a, chu’ng mite mantir tur a ni. An man lai hmuhpui a, chu kan hmuhpui leh hriatpuina chu court-in min koh huna kan sawi hian ruihhlo tawlhte thiam loh kan chantir ang a, an phu tawk hremna an hmuh theihna tura kan tih tur a ni.

Hei hi CYMA pawhin YMA branch leh group te kan hrilhhriat ṭhat a pawimawh hle a ni. Chuti lo a, mahni thua kan man ve ngawt hian court-ah a tawlhrutute’n thiam loh an chang lo thei a ni. Ruihhlo man a pawimawh rualin a tawlh ṭhinte thiam loh an chan hi a pawimawh tih kan hriat reng a ṭha.

Veng tin leh khaw tinah Police leh Excise & Narcotics Department (END) mite an awm si lo a, a va buaithlak awm ve tih zawhna a awm nghal ang. Mahse, danah a man theitu tura ruat sorkar mite’n an man si loh chuan ram leh hnam hmelma ruihhlo tawlh ṭhinte’n thiam loh an chang lo palh ang tih a hlauhawm si a. Chuvang chuan, kan veng leh khuaah Police, END mite an awm kher loh pawhin heng mite hi an lo thlen hma kan lo nghah a ngai a, chu chu YMA-te pawhin kan inhuam a ngai.

Tin, ruihhlo man kawngah lâr khelh loh a pawimawh. CYMA hnuaiah ruihhlo do pawl an awm ṭhin a, Police leh END mite nen thawkhoin ruihhlo tam tak an man ṭhin a, an hnathawh leh inpekna a chhuanawm tak zet a ni. Sorkar hian Police leh END mite a thuam chak ve reng chung hian sorkar pachhe tak, Home Department leh END-ah hna ruak eng emaw zat nei sorkar engtik lai pawha hrawn kan nih avangin he ruihhlo kan do kawngah hian YMA-te kan teirei peih a ngai.

Kumin April 24 zing khan Saitual district-a Ṭamdil kawngah CYMA hnuaia ruihhlo do pawlte’n heroin kg 4.821 an man tih khami nia CYMA thuchhuahah kan hmu a; mahse, thuchhuah ka hmuh khan ka lawm rualin ka rilru a nâ. Khami ṭum khan YMA-te khan engvangin nge Saitual District Police emaw, Saitual District END staff-te emaw an pun loh le tih ka rilruah a lang nghal. Kha ruihhlo leh a tawlhrutute kha Aizawlah an lo phur thla a, CYMA Hall kawtah Home Minister leh END Minister hmuh laiin END Anti-Narcotics staff-te an mantir ta a nih kha.

He thubuai hi court-ah an an ngaihtuah mekin ka ring a, a tawlhrutute khan na taka hrem theih an nih ka ring lo ve ringawt. END staff-te min hrilh dan phei chuan, “CYMA Hall kawtah kan lo awm a, an lo thleng a, an han meeting leh te te a. Chumi hnuah Home Minister leh kan Minister te an lo thleng a, an meeting-pui leh a. Chumi hnuah kan man (official arrest/seize) thei chauh kha a ni a. A zia lo tak tak a ni,” an ti.

Ruihhlo kan do turah hian YMA-te hi mahnia thuneihna inpe lovin, dan hmangin do ila, thuneitute tichak leh an thachhang kan dâwl thiam loh chuan khawvel hmuhah ruihhlo do hi kan mualphopui ang tih a hlauhawm.

Mi tin hian smart phone kan hûm tawh a, thlalak kan awlsam tluk zetin thehdarh kan chak si a. Chuvang chuan, YMA-te’n ruihhlo kan do turah hian kan fimkhur a, dan ang thlapa kan kal loh chuan kan mualpho ang tih a hlauhawm. Hei hi CYMA pawhin hria se, group leh branch te min zirtir nasa rawh se.

Ka sawi leh duh pakhat, CYMA hian sorkarah bawhzui se ka tih chu, court-a thuhretu inlana court-in TA/DA a pek chungchang hi a ni. Court awmnaah chuan DA chauh an pe a, court awm lohna khua aṭanga kal chu an awmna hlat dan azirin maxicab chuan man thlengin an pe ṭhin. Tun hma chuan court-a an inlan zawh hian TA/DA hi a sum faiin an pe mai a, tunah erawh chuan Aizawl District bikah hian bank account hrilh a, account-a thun mai turin an ti ṭhin niin court-a inlan ṭhinte leh Police/END staff-te’n min hrilh a. An account-ah hian an DA hi a lut tak tak lo niin an sawi a. Chu bakah, hetianga tih hian thuhretua ṭang tur a tihtlem phah niin Police/END staff-te’n min hrilh bawk.

TA/DA inpek chungchangah hian CYMA hian sorkarah a hma anga kalpui leh tura an nawr a ngai. YMA branch-te pawh hemi kawngah hian kan inhuam deuh a ngaiin ka hria. Kan branch huam chhungah Police/END-in ruihhlo an mana hriatpuitu (witness) kan nih a, court-a inlan a ngaih hunah patlingin a hna kalsanin nilengin court-ah hun a hmang dawn a. Chutah tak chuan branch-te hian witness-a ṭang court-a inlante hi court-in DA a pek ang zat hi pe ve ang u. Hei hi Electric Veng VDP-te’n an member, court-a witness-a ṭang an tih dan a ni a; thil ṭha tak, intihhmuh chi tak niin ka hria.

Thil tam tak sawi tur la awm mah se, tun atan chuan duhtawk phawt ila. Ruihhlo laka kan ram leh hnam a dam zel theih nan YMA-te’n dan palzût loin ṭhahnemngai takin ruihhlo i do ang u.

- F Lalliansanga