Hahdam nan

Han inchhut neuh neuh ta ila, mihringte hi chuan harsatna, buaina chi hrang hrang kan nei ṭhin. A ṭhen a lian tham deuh a, a ṭhente chu ho ve mai mai angte pawh a ni thei hlawm. Hetia kan hriat theih maiah chuan dik lo taka thil ti ṭhin, ruihhlo zuar, zu zuar, thamna la ṭhin, eiru ṭhin ang chi ho hi chu an nun hahdam vak lo turah dah sa ila. Nunphung pangngaia nungteah hian heng thil dik lo ti ṭhinte ang bawk hian harsatna eng eng emaw a awm ve ṭhin tho a ni. Mahse, hengte hi chu thil pangngai, mi tin tena kan tawn ve ṭhin a ni. A hlimawm ringawt, nuam ringawt ang chi chuan a awm hleih theih loh, kan tan pawh a ṭha lo zawk. Mi dinhmun hrethiam tak tak tur chuan a taka mahni ngeiin han tawn hian a chiang. Chuvang chu a ni ang Isua pawh kha bawnginah a lo pian ve ni. Hriselna ṭha tak kan neih loh te hian a hahthlak, a hrehawm duh, kan rilru leh taksa a hrisel ṭhat chuan kan dam, kan hlim, nun a nuam. A nih leh engtin nge harsatna, buaina karah hian nun nuam, hahdam taka kan awm theih ang le?

Harsatna, buaina kan tawh tam tak hi chu keimahni insiam chawp, kan fimkhur loh vang, peih loh vang te a ni ve duh khawp mai. Chhungkaw nu berin natna khirh tak a vei a, sum tam tak kan khawh ral, kan thawh chhuah ve zawng kan hmang zo, kan hmabak chu retheih a ni ta mai. Mahse, kan sum leh paite chu ṭul takah kan hmang a, ṭangkai takin kan hmang a ni. Kan buaina tur ber chu pawisate kha TV, washing machine lei nante kan hmang thei ta lo, pawi kan ti vawng vawng mai thei. Chu chu kan buaina ber chu a va ni awm ve. Nia, sum chu a uihawm ngawt mai. Mahse, mihringte hi chu kan duham zel a, kan duh belh zel tho, duhtawk kan ngah thei chuang lo. Sum leh pai kan zawng a, kan inchhêk ther thur a, mahse, kan hahdam thei chuang lo. Kan tum ber chu thlamuang leh hahdam taka awm diai diai, mahse, kan hmu thei tak tak chuang lo. Rethei leh hausa pawh kan inang reng tho mai. Eng nge kan buaina ber chu, ngun takin i ngaihtuah tlang teh ang.

Kan buaina chinfel nan, hahdam theih nan chuan engtin nge kan tih ang le. Car neih ve chu ka duh a, ka nei ve ta mai a. Mahse, hah a dam thei chuang lo, a dang, a aia ṭha ka duh leh zel. Lâm thiam tak nih ka duh a, mahse, a dang ka duh belh zel tho. Lehkhathiam tak nih ka duh a, a dang ka duh belh zel tho mai. Chin tâwk kan nei meuh lo, kan duh belh zel. Hmasawnna nen hi chuan a inang chiah lo; hmasawnna hi chu hma lam pan hret hret zel hi a nih phung zawk a ni.

Duh tawk kan neih loh vang hian kan hahdam thei lo, eng ngati nge kan duh belh zel mai le. A dang hi neih tawh loh tur kan tihna pawh a ni chuang lo a, mahse, mihring hian lungawina chu engtin nge kan neih theih ang. Kan chan hi in chhût let teh ang. Vawiinah i car chu mi ta hlui i lei ni mah se, khatiang nei pha miah lo kha an tam lutuk; nang chuan i nei a ni tih han chhut teh le.

Bible zirtirna aṭanga thil langsar ve tak pakhat chu – tuh rah seng hi ti ila a dik viauin ka ring. Pathian chu engkim ti thei a ni a, ani hi chuan a kalh zawng pawhin a nihtir thei tho ngei ang. Mahse, Pathian pawh hian khuarel (nature) kalh zawng hian thil a ti ngai meuh lo tih chu kan hre hlawmin ka ring. Miin a huanah dragon fruit hmun a siam chuan chu bawk chu a seng dawn, grape a seng dawn lo.

Chutiang bawk chuan vawiina kan thil tih hi a ṭha emaw, ṭha lo emaw, nakinah ka la hmu let leh dawn. Ka taima lo a nih chuan chu mi rah chu ka la seng leh dawn. Zu in mi ka nih chuan chu mi ngei chu, eiru ṭhin ka nih chuan, thamna la ṭhin ka nih chuan, chu mi ngei chu. Hriselna lam ngai pawimawh vak lo, meizial, tuibur, sahdah ti mi ka nih chuan a rah ka la seng leh dawn. Nuam taka khawsa, a tui tui ei ṭun ṭun, exer la ngai bawk si lo, hahdam taka awm ṭhin i nih chuan chumi rah chu i la seng ve dawn. I duh emaw, duh lo emaw, khuarel/Pathian thu a ni tlat mai.

Siamtu hian a lo siam thiam cheih cheih khawp mai. Hmeichhia chu mipa duh zawng tak tura siam, chutiang bawkin mipa pawh. Rawltharin a hmeichhe duh zawng an thlang chat a, hmelṭha tak, nalh thei bawk si, a lungawina zân chu. Tleirawl/rawlthar inngaihzawn hun lai hi a nuamin a thianghlim ber ang em aw. A ṭha tih ber an kawp chat a, a ṭha ber dawttu ni lo, a lung tiawi bertu chu. Chuti ni lo se chu a ṭha ber dawttu, dawt lehtu te chu ni se, phûr loin a hah ru ve riau ṭhin ang. Hei hi a hlimpui ber tur, duh ber chu a ni; a nih loh chuan hahpui em em thung dawn. A duh ber chuan a hlimna, lungawina chu a thlen a, chu chu a ni mihringte zawn ṭhin chu. Duh berte nena han ṭhut dun vang vang mai hi chu, a dang a awm thei tawh chuang lo.

Aw le, kan hahdam theih nan engtin nge kan tih ang? Harsatna, buaina te a lo thleng fo mai ṭhin si. Tihdam aiin inven a ṭha zawk tih te kan hria ang. A tawp berah chuan kan chan ṭheuh zel hi en ṭhin ila, han bûk ta ila, tlawmna nen. Tichuan, kan fel duak duak mai lo maw? Kan rilru, thlarau, taksa, heta ṭang hi chuan a hahdam theih tawh i beisei tlat ang.

- Lalchhandama Colney, Ph–9862982321