Dan bawhchhetu kohhran upa CM

Dampa bialah by-election neih a ni a, vote thlak zawh a ni ta. Dampa bial inthlan kaihhnawiha lar tak pakhat chu, Election Commission of India-in Election Model Code of Conduct bawhchhetu kan CM Pu Lalduhoma a rawn khak leh a rawn zilh kha a ni. A zahthlak haih haih khawp mai.

Tun hmain CM leh Minister zingah inthlan kaihhnawih dan bawhchhia an awm tawh ṭhin em ka hre chiang hauh lo. Tuna kan CM hi chuan a bawhchhia a ni. CM-in MCC a bawhchhia tih hi helai Mizoramah chuan awmna party azirin ngaihdan a inang lo thei ang. MCC a bawhchhia a ni tih tichiangtu ber chu ECI thutlukna hi a ni lo thei lo. ECI chuan CM Pu Lalduhoma’n MCC a bawhchhia a ti tlat!

Kan CM Pu Lalduhoma hi CM satliah a ni lo, state danga CM-te ang a ni lo a, Mizorama CM lo ni tawhte ang a ni lo. State danga CM-te chu a tam ber Kristian ni lo, Pathian nung hre lo, Isua zuitu ni lo an ni a; Mizorama CM lo ni tawhte pawh Kristian ni mah se, kohhran upa an ni ve lo. Tuna kan CM erawh chu kohhran upa a ni tlat.

CM zinga dan ngai pawimawh ber tur, che felfai ber tur, kohhran upa ber hi inthlan kaihhnawih dan bawhchhetua a ṭang hi a zialo tak zet a, a mualphothlak. Mualpho-ah a inngai em tih erawh ka hre lo! Tun hnuah chuan lo fimkhur mawlh tawh teh se.

- Lalramsanga