ZORAM ṬANG FAN FAN

Kan ram political lian pathumte’n rorelna fawng an vuan kim ta.

Mipuite hnêna an thutiam hlen ta erawh an la awm lo. Sorkhar hmasate hmalakna chhunzawm sak duh lah an la ding hek lo. NLUP mirethei dik takte in a thleng phak lo va, nuai thum lah sem a ni hek lo. Tuna sorkhar kan hrawn mekte lahin eng loan loan emaw ni a kalpui mek a, hei pawh a nei nung sa bawk lo chuan an chhawrin an hmu hek lo.

Huiham, kan ram neih chhun rorelna fawng vuantute’n sawp chein, ei chhiat tum eng ang che mah se, i chhunga cheng Zofate tan, aw, Zoram ṭang fan fan rawh aw. Kuthnathawktute hmakhaw ngai vektu sorkhar a ding zel a, thu chu tisaah a chang thei si lo. Leilung fa thinlai hi a dam mawlh lo a ni e. Aw, Zoram, ngati nge nangmah hmangaihtu dik tak hi i hrin chhuah theih loh le?

Jeremia 8:20-22 “Buh seng hun a liam ta, nipui a tawp ta, chhandamin kan la awm lo. Ka mite ka fanu natnaah chuan ka na ve si, ka sûn a, thlaphânnain mi vuan ta. Gilead-ah thinghnai damdawi a awm lawm ni le? Chutah chuan tidamtu a awm na nge? Engati nge ka mite, ka fanu a hrisel theih loh?”

Zoram mipui kan dam lo va, a ni, kan thlaphang tak zet. Khél lova thlasik a lo her chhuak ṭhin angin, mahni thawh rim rah, hralhna tûr hre lovin patling kan rûm a nih hi. Kan ram hi nauchhiatna ram mai em ni? Sawisel bo sorkhar hi a piang ngai dawn lo va, mahni kea din tum, mi sang tam tak kan awm. Theihtawpin lo, huan, rama thlaite kan siam a, a hralhna market budget session-a a ṭha thei ang bera sawi a ni ṭhin, mahse, thu chu tisaah a chang thei si lo.

Kan thlai thar chhuahte hi kan rama hralh vek sen a ni lo va, eitu mipui kan la tlem si. Tunah pawh kan kum khat thawh rah kan seng ve a, hma lam hun hlim takin kan thlir a, behlawi kg-ah Rs 20 chauh a ni a, hluihlawn ngawt dawn ila, a uiawm ve bawk si a. Thlai thar dahṭhatnate kha kan nei em le? State danga hralh theih ni ve se heti takin a man a tlawm lo tûr. Kan ni khat hlawh hi a va ho si em, kan thlir tlawk tlawk mai zawng a nih hi.

Ka pa khan koki chhuanin khawlai min lenpui em ka hre lo; hmeithai, nu derdêp tak chawi len ve mai ka ni; eng dinhmun ṭha mah kan chang pha ve ngai lo. Ka nihnate avang hian ṭhenrual zingah pawh ka tawmim a, ka thaw ve phawr phâwr ngai hek lo. Mi zinga awm aiin ram lama mahnia khawsak mai hi nuam ka ti zawk reng a nih hi maw. Ka tun hma nun khan ka nunah thu a la sawi reng a, harsatnaa tah hriam, mangannain a ensan ngai loh leh a zui reng ka ni a, hringnun buaina hi ka tân a mikhual ngai hek lo. Chutiang karah chuan lêng mah ila, innghahna pakhat chiah ka nei, chu chu Lalpa Pathian ngei hi a ni. He leiah hian ropui taka chhinchhiah tûr hming leh chanchin ka nei lo. Nimahsela, ni tin leh zan tin, phek tin ka ziahte hian ka hmaah chatuân kawngkhar chuan min nghak reng si.

Rorelna dik leh thutiama ding nghet mi chauh hi Zoram hian a mamawh e; he thutiam ram, a taka hlen chhuah si lohna rama hian. Aw, Zoram ṭang fan fan.

- Zothansanga, Chhiahtlang Kawnveng, 9612333536