Promoting, digitization to enhance operational efficiency, accountability and transparency

India ramah hian cooperative societies hi kum zabi 20-na lai daih aṭang tawh khan kalpui a lo ni tawh a. Kum 1904 aṭangin mumal zawkin dan leh dun hnuaiah tun thlengin mei mit loin a kal chho ta zel a ni. India rama cooperative movement hian hun khirh tak tak paltlang pawh a ngah tawh hle a, sawrkar laipuiin Revival Package hmanga a chhawmdawl leh din thar ngai hial khawpa dinhmun chhiaa din hun pawh a lo nei tawh ṭhin a ni.

Mizoramah chuan cooperative society hi Assam sawrkar hnuaia kan awm lai aṭang khan kan lo hmelhriat chho ṭan ve a. Cooperative movement kan tuipui chhoh tak tak hi chu union territory kan nih hnu kum 1972 bawr chho vel aṭang khan niin a lang. Mizoramah hian cooperative society hi 1200 chuang register tawh an ni a, chutih rualin ṭha taka function hi chu kan tam lo viauin a lang. India ram pum anga thlir pawn cooperative society ṭha taka lo function tawh ṭhin, dinhmun ngialnghet taka ding tawh nia langte pawh hi hun rei lo te chhunga rawih lam pan leh ta mai, member-te hnena leiba nei chunga liquidate ngai hial an tam hle a ni. Hei hi chhan hrang hrang tam tak a awm thei ang a, a chhan tlang lawn ber nia lang chu financial management thiam tawk loh vangte leh khawvel hmasawnnain a ken tel technology hmasawnna kan society-a kan seng luh thiam tawk loh vangte a ni.

Cooperative society, a bik takin credit society-te hi member-te tana awlsam zawka an mamawh pawisa puktir tur an ni. An member kut hnathawktute’n an mamawh hun taka tui lakna tur te, a hmun siamna tur te, a thlawhna hlawhfa man te, thlai chi man turte thlenga an mamawh hun zelah an mamawh ang zat zela an puk theih nana member-te’n an din cooperative society a ni. Heng cooperative society-te hi Mizoramah chuan cooperative society ṭha ber berte an ni hlawm. Chutihrualin, tun hnaiah ngawt pawh tluchhe ta thut thut hriat tur an awm ta fo mai.

PACS-te tana account vawn dan tura duan Common Accounting System (CAS) kan tih mai hi kum 2010-ah khan Central sawrkar leh NABARD ṭang kawp chuan a duang chhuak a ni. Single Accounting System veka account lo vawn ṭhin chu Double Accounting System-ah rawn thlakin, society-in activity hrang hrang a kalpui aṭanga a dinhmun chiang taka a hriat theih te, auditor-te tana audit a awlsam zawk nante leh sum che vel lang tlang zawka vawn a nih theihna turtein a ni.

Common Accounting System (CAS) hi ṭhain, felfai viau mah se, manual veka vawn a nih a vangin lehkhabu hrang hrangah ziah luh a ngai a, a hautakin hun a heh hle a, tihsual leh belh/paih sual tam tak a awm fo ṭhin reng a ni. Society ṭhenkhata thawktu kan rawih tam zawk tan phei chuan zir tur leh thiam tur a tam em avangin an duh leh tum reng vang ni loin kim lo leh dikhlel a lo awm phah ta ṭhin a ni. Tin, cooperative aociety auditor-te tan pawh chiang taka CAS an hriat ve a lo ngai a, audited balance sheet dik leh felfai thlap buatsaih a lo har phah ta ṭhin a ni.

Kuthnathawktu society member-te’n nasa leh zual zawka society hmanga an dinhmun an chawisan ve theih nan te, society pawhin kawng hrang hranga hma a lak ve theih nante leh sawrkar laipui hmalakna pawimawh em em mai pakhat ‘Atmanirbhar Bharat Abhiyan’ a nasa taka cooperative society-te hi hmanruaa hman an nih theih nan 29th June 2022 khan ‘Centrally Sponsored Project for Computerisation of Primary Agriculture Credit Societies’ chu GOI-in kum 5 chhung 2022-23 to 2026-27 atan a approve a ni.

He project hnuaia PACS computerized-te chuan national level PACS software vendor-te’n an ruahman ang Software hmang vekin data an vawng tawh dawn. He project hian India rama PACS 63,000 cover tura ngaih a ni a, budget-ah pawh vaibelchhe 2516 dah a ni nghe nghe. PACS pakhat computerize-na tur atan hian Rs 3.91 lakhs zel ruahman a ni.

He project-in a tum leh innghahnate chu:

1. Kut hnathawktu a te ber thlenga banking service-in a thlen ve theih nan.

2. Society chuan kawng hrang hrangin member-te mamawhna zawn zela hma a lak theih nan.

3. Dik zawk leh inang tlang veka accounting vawn a nih theih nan.

4. Lang tlang tak leh awmze nei zawka invawn fel theih nan.

5. Core banking solution a la nih ve theih nan.

6. Society kaltlanga financial service hrang hrang tih a nih ve theih nan.

7. Profit tam zawk neih theih nan.

A tir lama kan sawi tawh angina, a bik takin Mizoram chhunga cooperative society-te hian kan mamawh em em mai chu sum leh pai che vel a nihna tur ang taka ziah felfai mai bakah, member-te pawn kan society dinhmun dik tak hriat chian tum hi kan mawhphurhna a ni tih kan hriat a ṭul. Dawr siam cooperative society- te ngat phei hi chu stock ziah fel hi a buangbarin a hautak em em mai a, kan bungraw neih a kim em tih te, sumdawnna aṭang hian hlawkna kan nei em tih te thlenga report kimchang tak kan neih hi a ṭul a ni. Heng zawng zawng hi digitized kan nih chuan awlsam têin, engtik lai pawhin kan hre thei dawn a ni. Thawktute rin lutuk avangte leh society hruaitute leh member zinga thiam dang awm ve loh avangtein account vawn fel tawk loh a awm nasa ṭhin hle. Heng zawng zawngte pawh hi computerised kan nih chuan nasa zawkin kan pumpelh thei dawn a ni.

Conclusion

Thil engkim hian ṭhatna leh ṭhat lohna a lo nei ve zel a. Computerization pawh hi society tam tak tan chuan ban phak loh leh cho phak loha en mai a awl hle ang. Amaherawhchu, mi ruala ke kan pên ve duh a nih si chuan loh theih loha kan zuan luh a ṭul ve hun a la awm ngei ngei dawn. Chumi tur chuan lo inpuahchah lawk i la, kan society member-ah pawh ṭhalai zawkte tan pawha hun leh hmun kan hawn thiam a ṭul hle ang. Cooperative society member i nih avang khan i chhungkuaah hlawkna leh hmasawnna a thleng nge, i hun leh tha i khawhral zawk tih hi inzawt fo ṭhin la; i hun i lo khawhral zawk a nih chuan chu cooperative society hmasawnna tur chuan i rilru leh ngaihtuahna a tharin han seng leh chhin teh.

- H. Remsangpuia, Mizoram Cooperative Apex Bank Ltd.