Dampa bial inthlan lailawk, ràl aṭanga thlirna

Dampa bial inthlan lailawk chu zawh a ni ta a. Ka rilrua thu awm chi hrang, ṭan bik nei lo, Mizoram hmangaihna leh kan ram dinhmun mek aṭanga ka lo ral thlir ve dante.

Sawrkar lai ZPM an ṭang hle mai a, an sawrkar mek laia inthlan lailawka heti tak maia an ṭang hi eng vang nge ni ang le. An ṭang ulh deuh nge ni ECI hialin thuchhuah an rawn siam rup rup mai. A chhan ni thei in chhui hmasa phawt teh ang.

Pakhatnaah chuan, an sawrkar a ṭhat tawk loh vang a ni thei. Sawrkarna an chelh lai mek a ni a, he bial MLA hi lo chang lo pawh ni se, an sawrkar a nghing dawn chuang lo. Mahse, chak ngei ngei an duh chhan chu an sawrkar kal mek hi a chak tawk lo va, mipui rin an hlawh zo tawh lo va, inthlan lailawka an chak loh leh phei chuan an tan mangchhia man tluka thil hrehawm a ni ngei dawnin an hria a. Chuvang chuan mawi leh mawi lo pawh dawn lovin thapui an thawh niin a lang.

A pahnihna chu, candidate an neih ṭhat tawk loh vang niin a lang. Candidate an puan aṭangin anmahni lam aṭangin boruak chhia an nei inzawm chho zawt zawt mai kha an tan chuan pawi tak a ni. An party Candidate ngei a nih thu te thuchhuah siamin an han sawi leh rih thul. Candidate an siam fuh lo a tih theih a, an siam fuh, an ṭan ho nasat phah pawh a tih theih awm e. Ral aṭanga lo thlir tu tan chuan Candidate talbuai ber ang pawhin a ngaih theih a, chumi chhan tum chuan theihtawp takmeuh an chhuah ni te pawhin a lang e.

Tun inthlan lailawk hi Sawrkar lai tan chuan darthlalang ṭha tak a ni. An insiamṭhat loh chuan a tuar thei. Nikum lawkah mipui rin an hlawh vangin hneh takin Sawrkarna an siam a. Tuna an dinhmun hi ti hi a nih si chuan an insiamṭhat ve chu a ngai a nih hmel. Mipuiin kan nin em em CM lal lurh ṭhin te, mipui ngaihdan mausam a, Party duh dan lal tir tlat ang chi tho kha an kalpui zel a nih chuan mipui bawkin an la buk leh dawn si.

Mipuiin an laka an beisei ang leh an rin anga awm tur hian hun an la nei. An Sawrkar chhung hian an inthlakdanglam chuan, an lo tihsual tawhna lak aṭangin an lakah mipui an lungawi leh thei. (Mipui hian anmahni an duh vang ngawr ngawr ni lovin, anni ni lo hi duhthlan tur an neih an en a, an thlanawm bik zawk chuan loh vangin an lakah rinna an nghat thei. Hei hi tun Sawrkar vanneihna a nia, an hmang thiam lo a nih erawh chuan a chawr chhuak leh tawh kher lo thei bawk. MK)

Tunlai khawvel changkang tawha kan Campaign dan a la mawl hle. Khawi Party pawh hian mipui min ngai mawl lutuk hi anmahni mawl teng tung vang niin a lang. A zahthlak zawk mahin ka hria. He thil awm chhan ber chu Party tina a hruaitu lawk te hi an upain, an hmanlai mi deuh vek a, ṭhangthar khawvel an man pha meuh hlawm lo. "Ṭhangthar te khawvel a ni" tiin an sawi dup dup a. Mahse, an Party chhunga ṭhangthar te erawh nem hniam tum ngar ngar, kei ka ni in ti vek, Social Media pawh khawih thiam mumal lo. Youtube en thiam deuh ngawr ngawr te kaihhruai deuh vek an nia. Khua hi a var mawlh lo. IG leh Instagram hre hrang chuang lo te ngaihdan kha a lal ber zel rih chuan kan ropui viau lovang.

Mipui lam pawh koh kal dul dul kan la awlsam mah mah. Heng Political Party te hi an thiltih aṭangin i teh zel ang u. "Tuman ram an hmangaih tak tak lo" ti liam ngawt lovin, ram hmangaih tu an vawrh chhuah zel theihna turin aw i chhuah i la. An ther hlo mai mai it hian i phe sek tawh lovang u. Rintlak loh te chunga rinna nghat lo ngam hian awm tum i la, an tel lova in chawm thei turin ṭan i la ang u. Mipui hi ṭangrual tlat teh ang u khai.

Oppo lamin hun ṭhaa ngaia an insiamṭhat a hun khawp mai. Ke pali vawr dawta keuh tlu tu hi keuh tluk leh tumin ṭan han la teh u khai. Tuna in awmdan, Sawrkar lai sawisel ngawr ngawr ni lo hian nangmahniah thil thar hmuh tur mipui min chhawp teh u. Chung zinga pawimawh hmasa chu hruaitu thar an ni. In hruaitu ngai te hian he ram tan engmah tih tur an hriat tawh loh vanga hetia awm hi in nia. Lo Sawrkar leh pawh ni u la, anmahniah engmah beisei tur an awm tawh lo. An ngaihtuahna an hmang zo tawh. Mipuiin an duh tawh lo.

Tuna Sawrkar lai te aia in ṭhat zawkna tur hmuh tur a awm loh chuan mipui tan inngaihzawn awm mawlh lo. Sawrkar sawisel vak vak hi mipui hipna ni lovin, mipui ngei hlawhna a ni zawk thei. Hmanni lawka in awm dan leh in thiltih kha an la theihnghilh bik si lo. Insiamṭha mawlh teh u. Insiamṭha kan tih hian, hmanni lawka thil titu te khan 'kan ti tawh lovang' rawn ti ngawt suh se. La ti ve lo te kha hmun kian ngam turin ka ngen a che u. In thei lo a nih chuan, mipuiin an ring thei ta lo che u a nih pawhin in mawh a ni leh mai.

Dik tak chuan, tun ang hun, khawvel changkang tawh leh ṭhalai fel leh ṭha, mithiam kan ngah tawh lai a, tar pui pui, ram tana tih tur ti zo tawh. Ngaihtuahna thar hmang leh tur chuang awm tawh lo in rawn theh chhuak hlawm hi chu a zia lo chu ka ti ve deuh. Ṭhalai theh chhuak chhun Party lah, sawi ngai lovin kan hria. He ram hi siamṭhat in lo tum lem lo ni berin ka hria. Hetiang tur a ni lo. In hmanlai ngaihdan kha in ban thei lo a nih pawhin Party aṭang tal hian bang ngam lul teh u. Chu chu he ram hian a ṭhatpui ang a, nang leh i chhungte pawhin in chhawr zawk ang tih hi chiang takin ka hmu vein ka hria.

- Madawnga Khiangte, Rulchawm