Kawng siam hun a inṭan ta
Mizoramin hma a sawn leh sawn tehna pawimawh tak pakhat chu kawng hi a ni a, hmasawnna tura pawimawh berte zinga mi pawh kawng a ni. State dang nena kan inpawhna kawng a ṭha lo a, khawpui chhung kawng a ṭha tawk lo a, khua leh khua kawng a ṭha tawk lo.
Sorkarin kawng siam ṭhat theih loh chhan pakhatah ruahsur nasa a puh a, tunah chuan ruah a han ta. Chhuan lam siam a hun tawh lo a, kawng siam hun a inṭanah a ngaih theih.
November 8, Inrinni Vanglaini chhuakah CYMA president thar R. Lalngheta'n Sairang–Vairengte kawng an enfiah tur thu a sawi a, nem taka zuk kal an tum loh thu a sawi bawk. R. Lalngheta hian CYMA president a nihna angin tun hmain thawm a lo nei lian tawh ṭhin a, tuna an hmalakna hi Mizo mipuiin an thlawp khawp ang le.
CYMA president hian, "Kan ram a ni a, khuti khawp khuan kawng a chhia a, nunna chán hialte pawh an awm bakah lirtheite pawhin an chhiat phah nasa tawh. Hetia company-te'n an duh ang tawka sum siam nana min rawn hmang ringawt hi chu a fel lo kan ti," tiin a sawi a, Mizoram tana kawng siam ve tlak loa an hmu a nih phei chuan 'min ṭin san rawh u' tih hial maite pawh a ṭhat tur thu a sawi hial.
November 10, Thawhṭanni Vanglaini chhuakah CYMA-in an sawi ang ngeiin Inrinnia Vairengte leh Sairang inkar national highway kawng dinhmun an enfiah thu chhiar tur a awm leh a, a lawmawm hle. CYMA hian contractor-te an hnahthawh hun chhunga ṭha tak leh lunghawi thlak taka zo tura an hrilh bakah, "In hnathawh dan hi kan en zui zel dawn," tiin an chah a, an hnahthawh hian a ṭha lamah hmasawnna a awm ngei a beiseiawm hle.
CYMA hian an sa seh tawh chu thlah tawh lo se, sorkar lamin ṭan han la bawk se, Mizoram ei leh bar lakna kawng ber hi ṭha se a pawimawh hle. Kawng chhe nghawng hi a lian a, bungruain kalkawngah hun a thang rei ringawt lo a, lirtheiin a tuar a, thil man a san phah bawk. Hei chu mi nawlpui hriat a nih avangin sawi thui a ngai lo a, kawng ṭha tak nei ila tih hi Mizo mipui zawng zawng duh dan a ni.
Kawng hi a ṭha thei lo a nih chuan hmalatu hran an awm loh avangin Mizo mipuite tana rohlu CYMA hian zir chiang se, mawhphurtu hi hling ngei se, a phu tawk hremna nei ngei se tih hi mi nawlpui duhdan a ni ang.
Chutihrualin kawng siam kawngah sorkarin hma a la ṭan tih a hriat a, Aizawl hmun pawimawhte siam ṭan a ni a, siam chhunzawm zel se a duhawm hle. World Bank Road lam kawng pawh tlan hrehawm khawpin a chhia a, kawng pawimawh a nih avangin siam zinga tel ngei turah a ngaih theih. Sorkar lai ṭhat leh ṭhat loh hi tehna hrang hrang a awm dawn a, a tehfung pakhat tur chu kawng a ni. An sorkar tirh lamah bukin an awm a, tling zo lo mah se insiamṭhatna hun an nei a, an hun a in ṭan e.
- Lalhruaipuia