HOME DEPARTMENT

Sawrkar hi mipuite ta, mipuite siam a ni a; sawrkarin eng nge a tih tih hi a siamtu mipui te’n an hriat hi an chanvo a ni. ZPM-in sawrkarna a chan aṭangin kum khat leh thla riatna a kal mek a; sawrkarna a chan hnuah hian eng nge a tih, engtiang chiahin nge hna a thawh tih te a theih ang angin, department hrang hrangte a tahtawlin tarlan kan tum dawn a ni. October 28, 2025 (Thawhlehni) khan Revenue Department chungchang te, November ni 6, 2025 khan Power & Electricity Department changchang te kan tarlang tawh a. Tun ṭumah hi chuan Home Department hmalakna pawimawh zual tak tak chauh kan tarlang ve thung dawn a ni.

Home Department hian hma an la nasa tawh hle a. Mizoram Police Service (MPS) pariat, ASI (Ministerial) sawmhnih leh constable 259 lak thar an ni tawh a. Tunah hian Sub-Inspector (Unarmed Branch) 25 lakna tur MPSC-in a kalpui mek bawk.

Ruihhlo tam tham tak man a ni tawh a, ruihhlo man tawh zawng zawng hi tualchhung (local market) rate-in cheng vaibelchhe 318.19hu a ni a. Hemi kaihhnawihah hian case 517 ziah luh a ni a, mi 573 man an ni bawk. Ralthuam eng emaw zat man a ni tawh a, ralthuam man zawng zawng chu 54 a ni a, silai mu 28,005 man tel a ni. Hemi kaihhnawihah hian case 46 ziah luh a ni a, mi 59 man an ni. Heng mi man zingah hian foreigner 10 an tel.

Kuhva rah kg 19,78,338 man a ni tawh a, hei hi market-ah Rs 35,02,53,150 man hu vel a ni. Kuhva tawlhruk kaihhnawihah hian case pakhat ziah luh a ni a, mi 231 man an ni tawh. Case ziah luh loh ho zawng zawng hi Customs Preventive Force leh a district neitu Deputy Commissioner te hnenah hlan chhawn zel a ni.

Expansion and Modernisation of Fire Services in the States Scheme hnuaiah 15th Finance Commission aṭangin grant-in-aid cheng vaibelchhe 40 hmuh a ni. Sum dawn tur hi central sawrkarin 90% a tum dawn a, first instalment 30% hmuh tawh a ni. He scheme hnuai aṭang hian kâng ṭhelhna bungrua leh fixed asset chi hrang hrang hmangin Fire Department thuam chak mek a ni. In sa turte’n Fire NOC an lak ṭhin chu September 1, 2024 aṭang khan online hmanga dil theiha kalpui a ni bawk.

Aizawla Central Jail leh district jail dang pasarih sak ṭhatna turin cheng vaibelchhe 55 SASCI aṭanga hmuh a ni a, hei hi PWD-ah hlan chhawn a ni.

Subject Committee, Mizoram Legislative Assembly-in January 2025-a Central Jail an tlawh ṭuma an rawt hrang hrangte chu tihhlawhtlin zel a ni a. Heng zingah hian laboratory technician pakhat leh staff nurse pahnih rawih tharte chu chhinchhiah tlak zual an ni.

Home Guard volunteer-te ration April 2023 aṭanga tihtawp tawh chu July 2024 aṭang khan chhunzawm leh a ni a, thla tin Rs 850 ṭheuh pek leh an ni. Home Guard volunteer-te hi bank, DC Office, godown leh hmun hrang hrang 85-ah duty tir an ni a, ṭangkai taka hman an ni.

Forensic Science Laboratory (FSL) case hrang hrang 2,055-ah sample 15,662 endik tawh a ni a. Hei mai bakah hian misual man leh thiam loh chantir te fingerprint 10,265 chhinchhiah a ni. Forensic Science Laboratory (FSL)-a thawk tur hian LDC pahnih, Forensic Assistant pathum leh group D pahnih lak thar an ni bawk. Mizoram FSL hi India ramah Integrated Criminal Justice System (ICJS) hmang tluantling hmasa ber a ni a; engkim hi paper tel hauh lovin digital file-a kalpui vek a ni.

Ministry of Home Affairs (MHA) sum pek hmangin mobile forensic vehicle 10 lei thar a ni a, 100% central funding a ni.

- Eddy Zosangliana Colney, General Secretary (GAD), ZPM Gen.Hqrs, Aizawl