Aizawl traffic ti jam-tu bus
Aizawl khawpui traffic ti jam-tu pakhat chu bus, engtik lai pawha tlan vel phal vang hi a ni. City bus te, sorkar department bus te, hospital bus te, school bus te, college bus te, university bus te, sipai bus-te leh police bus-te hi khawpui chhungah an vei vel ve reng a. Heng bus lian, an karkalak zau zawng HMV/truck te nen inang reng hi khawpui chhung kawng tâwtah an inhnawh ve reng a, hei hian traffic jam a siam nasa hle a ni.
Light vehicle/LMV (motor tê chi)-te chu kawng zim lai deuhah pawh an inpel zung zung thei a, an inpelh lai pawhin hmun tam zawkah chuan an inkarah two wheeler an la kal leng zel a. Bus pahnih an intawh chuan insiamrem fe a ngai zel ṭhin a, two wheeler zawng zawngin kan nghak ṭhup ṭhin. LMV tlan lai te chu engtik lai pawhin two wheeler tan awlsam takin tlan pelh mai theih an ni a, bus tlan pelh dawn erawh chuan rei tak zui hnua remchang zawn fe hnuah tlan pelh theih chauh an ni.
Chaltlang chho leh Durtlang chhoa bus tlan khu vut vut mai han chhawm chhoh chang phei chuan pollution test hi LMV leh HMV ah chauh hian phut se, two wheeler te hi chuan eng tham kan khu chhuah lo vang a, tih mai a awl ṭhin!
Khawpui chhunga bus karkalak zau chi hote hi zawi zawiin bus tê chi (eg. Force Traveller bus)-a thlak ni se, motor vâng lam hlai chi ho reng reng hi chu bus an nih pawhin truck-te nen hrut rualin khawpui luh theih hun timing-ah hian rin lut tel ve se kan ziaawm deuh ngei ang. Kum 2/1 chhunga bus zawng zawng thlak duak theih a ni dawn lo va, zawi zawiin, city bus, school bus, college bus, etc. lei thar tur apiangin bus karkalak zim chi chauh lei tawh se, kum 15/20 velah chuan kan thlak fel thei mai awm asin!
Keini aia khawpui kawngpui nei zau Bangkok leh Manila ah te pawh khian bus tê chi an uar khawp zu nia!
- R.K.Nithanga