Mizoram Mizo leh Mizoram pawn lam Mizo
Nang leh kei hian he Mizo national hi political party avanga sawi bawrhban kan phal tur a ni lo.
Mizoram leh a chhunga cheng Mizote hian ram hmasawn beisei vang te, ram rorelna tha kan beisei avangte hian ram roreltu nih inchuh nan political party hrang hrang kan din a, kan kalpui chho mek. State sorkara thuneitu, roreltu nih hi Mizo mipuite hian kan thiam lo chho ta zel a. Political party inbeih tawnna avangin Mizo hnam tana pawi tur kan ham tel fo ta mai!
Ram roreltu tur MLA hi kan buaipui ringawt thin a. Political party policy thilah chiah inbei ila, ram hmasawnna tur chauh hi kalpui mai ila. Mizo hnam tana thil pawi thei hmer tel zawnga ram rorelna hi kalpui loh tawp tur a ni.
Naga unaute kal dan ka hmuh kha ka riruah a cham reng mai. Khatih laia an CM khan Naga hnam tana thil pawi tur a khawih ngam lo. "He hnam UNC dawhkan thu lo chuan CM i nih vang ringawtin eng mah i ti tur a ni lo," an ti tlat. Political party rorelna aiin hnam an dah chungnung zawk.
Mizoramah hian Mizo Union, PC, Congress, MNF leh tunah ZPM te kan hrawn chho ta a. Ram mipui rilruah Mizo hnam dah chungnunna lam aia political party dah chungnunna lam hawi zelin hma kan la ngam ta hi a pawi hle. Rorelna chelhtute hian huaisar taka Mizo mipui an pal chho ta bawrh bawrh ngam ta phei hi chu thil ṭha lo tak a ni.
Mizo hnam (Mizo national) kan hmuh dan pawh hi kan thlak a ngai. Mizo hnam hmahruaitu hminga political party kan neih chhun MNF pawh hian Mizo hnam tan hma hruai ngam ngei se la. Sorkarah rorelna an chelh kher loh lai pawhin Mizo hnam tan hma hruai ngam rawh se.
A chhan chu Mizoram party dang hote ang mai maia khawsa ve ngawt turin Mizoram pawn lama Mizo hnahthlak khawsate hian an ring phal lo. An din chhan leh Mizo hnam keng thei bertuah an ngai tlat. A ṭul phawt chuan silai lek thei mai an nihna leh hmarchhak helpawl hotu an lo nih tawhna khan a la keng tel zel a. Mizoram pawn lama buaina an tawh chang pawha an harsatna buaipui thei ber tur leh an buaina hmuna chengte pawhin an lo ngaih pawimawh ber chu MNF hming hi a ni zel. Congress (I) party member te, PC member te, BJP member-te leh ZPM member-te ai chuan Mizoram state pawn lam mite chuan MNF member-te hi chu an ngaihdan a dang daih zel.
MNF support-na emaw, he political party member fakna lam hi kan sawi reng reng lo; Mizo hnam kalphung kan sawi a ni zawk. Mizo national hming kan sawi rik avangin MNF hi kan sawi reng reng lo. Mizo hnam hi political party aṭanga inhmangaihsiak chi a ni lo va, MLA General Election boruak avanga leklam fo chi a ni lo.
Mizorama kan political party-te leklam ber ‘kut hnathawktu’ hming nena Mizo hnam kan hmer tel chhen pawh hi sim a hun. Ram roreltute chuan ram hmasawnna tur leh state sorkar department-te nena hmasawnna tur ngaihtuah mai hi a tawk. Mizo hnam chunga kei ber emaw tia Mizo hnam tana NGO kan neihte palh bawrh bawrh chunga kal ṭhin kan awm a nih phei chuan a la pawi dawn khawp mai.
- F. Vanlalpeka,
IMCS, Aizawl
PH : 8837056218