Zoram rethei reng hi tu mawh nge?

Kan Chief Minister-in Vanapa Hall-ah September 30-a NEDP a tlangzarh ṭuma a thusawiah khan, “Tun dinhmunah ei leh barah thla thum tla tur bak kan thar chhuak lova... thlai leh thei that duhna rama kan hnianghnar lo hi mipui mimirte chauh mawhpuh theih a ni lo ang a, a kaihhnawih Department ten mawh an phur em tih ngaihtuah a ngai” tih thu a sawi hi a va pawimawh em. Hetianga CM-in ram kal siam tura ngaihtuah leh zirchian ṭul a rawn tarlan hi ram hmangaihtu leh ngaihtuahna hmang thiamte cho chhuah nan, Zoram retheihnaa mawhphurtu ni thei pawimawh zual tlem ngaihtuah ho dawn ila.

Mipui hi mawhphurtu an ni em?: Hun kal tawhah leh tun thleng hian ram mipuite hian sorkar aṭangin kum 30 chuang ṭanpuina sum kan dawng a. Kum 2008 vel aṭang phei kha chuan kum 8 vel chhungin cheng vaibelchhe 2600 chuang NLUP sum mipui hnenah sem a ni a; mahse ram mipuite retheih manganna chu a zualzawpui vaihlenhlo ang chauh a ni reng mai hi ‘a sum dawng ṭeuhtu mipui mawh’ a lian berah mi tam tak chuan an ngai ang a, a dikna chin a thui hle awm e.

Kan CM-in “Kut tling lova sum lakluh hi ram ṭhan mawh bawk a ni” a tih chu Zoram mipuite hian a dikna kan lantirin keimahni siam chawp retheihna thlentirtu kan ni ngei a ni lawm ni? Inthlan dawnah kuttling lovin kan vote hlu tak (keimahni ngei) kan hralh a, sum therhlo kan la (dawng) a; NLUP sum pawh kut tlinglo bawka dawngin dik lo taka hmang ta zawk kan ni deuh vek mai. Bible-a kan hmuh Akana chuan rallak sum te chu “ka awt ta em a, ka la ta mai a ni” a tih ang deuh khan NLUP hi kan awt em a, kuttlinglo deuh vekin kan lain kan hmang hlawm a ni. Ei leh bara kan hnianghnar theih nana sawma pakhat Pathian hnena pek ṭul (Bible-in a sawi) thu chu sirah hnawl ta daih kan tam zawk hle awm a nia!

“A te ber aṭanga a lian ber thleng pawhin

Mitin duhamnain an khat si a,

Zawlneite leh Puithiamte meuh pawh

Mitin hlemhle takin an che a ni” (Jer. 6:13)

tia Zawlneiin a sawi, Israel fate an sual bawlhhlawh dan leh chumi avanga Pathianin hrem ngei a tumte ang mai kha Mizoram mipui mimir tam ber hi kan niin a lang. Kan sim loh chuan he keimahni siamchawp retheihna khur ata hi kan chhuah theih beisei a harsa a ni. Chuvangin, ei leh bara kan hnianghnar lohnaah hian mipuite hian mawh kan phur nasa em em a ni lawm ni?

Department hotute (bureaucrats, etc.) mawh a ni em?: Kan CM chuan “...Department-ten mawh an phur em tih hi ngaihtuah a ngai,” a ti. Ni e, mi thil chik mi leh tawnhriat ngah tam tak chuan Mizoram ṭhanmawh bawk lian ber chu Department hotute, sorkar sum leh mipui chan tur hna leh sumte hlemhle (corrupt) taka mahni inhai vur nana hmangtute hi an niin an sawi ṭhin. Zawngrengtea serthlum veng an sawi ṭhin - Serthlum huana a rah ṭha ṭha chu amah chuan a ei zo zel a, a huan neitupa chhungkaw tan chuan serthlum rah chhiate chauh hnutchhiah a ni ṭhin. Hetiang deuh chiah hian Development Department hnuaia ram hmasawnna tur hna pawimawh tak tak enkawltu Officer (bureaucrats, engineer, etc.) te zingah hian sorkar sum leh paite chu anmahni puala duham taka a theih chin china ham duak duak ṭhin an tam em a lo ni. Zawlnei Isaia’n,

“Nangniho hi in ni, grep huan ei zotu chu,

Mi retheite laka sum lak chu in inahte a awm;

Engtizia nge ka mite chu in nem sawr a,

Retheite hmai chu in rawt sawm ni?”

(4:14, 15)

a tih leh “Dan chimawm tak siam a, thupek khirh tak ngaihtuah chuaktute, retheite that vena tur dawng tlattute (10:1, 2) tia a sawite hi kan rama Sorkar Department hotu nihna a sawinaah ngai ila a dik hle awm e. Department lian deuh P.W.D, Electric, Ph.E. etc. a hotu lian tam tak corrupt nasat hlawm turzia hi... Tun hnaia NLUP sum cheng vaibelchhe sang tel enkawltu hotute pawh hi an him (tih dik) bik loh dante kan la hriat belh zel dawn niin a lang. Sangha chi supply chungchang te, vawk note leh bawngpui supply te, etc. cheng vaibelchhe za tel/ sang chuang sen a nih hnu pawha kan la hnianghnar lo zel hi mipui mimir ai chuan Department lam mawh a lian zawk mai lo maw?

Amaherawhchu, officer liante pawh hian an pute (roreltu/ Minister) thu leh remtihna lo chuan sorkar sum lian deuh chin chu an khawih che mai ngai bik lova; chutihrual erawh chuan anmahni inhaivur dan kawng remchang erawh an siam thiam ṭhin hle a, Zawlnei Mika’n-

“Thil ṭha lo tih nan an kut chu a themthiam a, hotuten phut an nei a, roreltuten thamna an ngiat a, mi lian (bureaucrats) ten an duhsam sual an hrilh a, an thurual tlang a” (7:3) tia a sawi ang hian kan Department hotute hian an duhsam chu remhre tak leh vervek takin an tipuitling thei ṭhin a. Ram mipui tana chan ve tur fumfe a awm ta ṭhin lo a, ei leh barah kan hnianghnar loh phah leh nge nge ṭhin a ni lawm ni?

Sorkar programme thar, NEDP-ah hian Department hrang hrangte enkawl turin project chi 25 emaw, cheng vaibelchhe 250 hmanna tur siam a ni awm a. NLUP hmanga mipui hnena sum fai sem ṭhin baka hna ṭul dang thawh tumna program chu tlachawp deuhvin sorkar officer lian fel leh remhre takte siamtir a, Department ten an enkawl nghal tur ni hlawmin a lang a. Hetiang a nih takah chuan a kaihhnawih Department hotute (Zawngrengtea te ho?!) chuan an hna (serthlum huan ven) enkawl dan tur chu engtiang tak ni hlawm ang maw? Zawlnei Isaia’n ‘Nangniho hi a ni grep huan ei zotute chu’ a tih ang bawk an nih tawh loh beisei phawt ila! A nih loh chuan mipui rumna leh beidawnna a belhchhah nasa hle dawn si a.

Ram hruaitute mawh a awm ve em?: Kan Zoram retheihnaa mipuite mawhphurhna lenzia leh Department Officer-te hlemhlet vanga kan tawrh nasatzia kan sawi ta nual a. Kan roreltute mawhphurhna a lenzia kan zir tel (ngaihtuah) ngei erawh a pawimawh. Mithiam leh thu ziaktu tam ber chuan ram tlukchhiatnaah hian ram hruaitute chu mawhphurtu (a chhan) lian ber an nih thu an sawi deuh vek a. Keini Kristian rama inchhal phei hi chuan ‘tehna dik lo thei lo’ kan tih Bible-ah chuan “Dik taka lal in ro a rel chuan ram a ding chhuak a, thamna ngawt a ngaihtuah chuan ram a tluchhe ṭhin” tih te, “Mi dik an lalin mi an hlim a, mi sualin ro an relin mi an rum ṭhin” tihte kan hmu (TF. 29:2, 3); “...tlukna awm tirtu chung chu a pik e” (Mt. 18:7) tih thu Isua ngei pawh khan a sawi a ni.

Mizoramah hian kan sorkar (Party) hrawn tawh leh hrawn mekte reng reng hmasawnna kawng ṭha zawh tura hmathlir (vision) nei leh zuartu kan la nei lo. Inthlannaa tlin theih nana sum leh therhlo tawktarh policy te, mi rethei vote lei zel policy bawlhhlawh ber ber zuartu ram hruaitute chu kan ram retheihnaa a mawhphurtu ber an ni ngei lawm ni? Zawlnei Amosa chuan, “...tangkaruaa mi rethei lei a, mi tlachhamte chu pheikhawk bun khata lei a... Hemi avang hian ram chu a khurin a chhunga awm apiangte chu an lungngai dawn lo vem ni?” (8:6-8) tia a sawi kha Mizoramah pawh hian a thleng dik a ni mai lo maw?

Tin, Lal Solomona fapa Rehoboama’n lalna a chan khan, upaho remruatpuina pawm lovin, a bula awm ṭhin ama rualpui tlangvalho remruatpui angin mipuite nghawngkawl rit tibelhchhah tur zawngin a lal leh thuneihna a kengkawh a; chu rorelna chu Israel ram chuan a tlukchhiat nasat phah hle tih kan hria. Keini Mizorama kan hruaitu neih ṭhin leh neih mekte pawh hi, lal Rehoboama ang deuh hian ram dinchhuahna tur tak buaipui hrep ai chuan an bul hnaia awm sorkar hnathawk (fiscal & civil administration lam thawktu bureaucrats, engineer etc.) ten an thiam leh duh dana economic policy/ program-te tlachawp taka an siamsak te chu ‘policy/ program ṭha ber’ tiin an kengkawh nghal tawp zel a ni ber a. Chutianga inthlahdah leh nuamsa taka lalna leh thuneihna hmang ṭhin hruaitu kan neih chhung chuan Zoram hi a ding chhuak dawnin a lang lo.

S.Korea ram hruaitute chuan, an unau N.Korean te nen inremna kawng zawn a ṭul hle chungin, “Development first, reunification later’ tiin ram hmasawnna chu thupui berah an nei a, kum rei lote chhungin (30/40) khawvel ram hmasawn leh changkang ber zingah an tel thei a ni. Keini Zoram ve hi chu ram ralmuang ber state a kum 30 eleuh kan awm hnu pawhin India rama State rethei ber zinga chhiar kan lo ni reng mai! Kan ram hruaitute ber hi ram retheihnaa a mawhphurtu ber an nih hi kan hriat chian tlan a ṭul a ni.

Engpawhnise, kan ram hruaitute hian ram hmasawn nana hmathlir (vision) ṭha tak nei a (lalna leh thuneihna chang a mahni inhaivur tum ni ngawt lovin), an thil tum (ideals) chu tihlawhtling ngei tura an duan sa ang thlapa thawk tura Department-te leh mipuite an thawhtir hunah chauh ‘Zoram tan kawl a eng’ ve thei dawn a ni.

- H. Lalhmachhuana, Zobawm