Lirtheia chuangte leh kea kalte tan
Khawtlang ramten internet an hman hnuah Mizoramah motor a lut ve chauh a, a la rei loh ngaihtuahin lirthei erawh a pungchang hle, hmasawnna a ni kan ti thei ang.
Kan Zawlkhaw-puiah hian Mizoram mipui zatve aia tam mah kan chen avangin khawpui a chep em em a ni. Khawpui lailiah bazar pui ber a awm miau avangin veng hrang hrang aṭangin Aizawl khawpui laili kan pan khawm a, a laiah kan inpel suau suau mai a nih hi. Kan ram leilungin a zir tawk loh vang te pawh a ni ang a, kan kawngpui te a zim si a, kea kal leh motor-a chuangte pawh chhuk lem loin kan inbe mawlh mawlh thei zel mai.
Motor-a chuangte tana hriat tur
Motor kan chuan hian kan bukla mite chauh kan ngaihsak tur a ni lo, pawm lama kawngpui sir vela kea kalte kan ngaihpawimawh a ṭul. Motor chhung aṭanga bawlhhlawh paih mai te, chil chhak mai te hi thil awlsam tak ni mahse tih miah loh tur. Kan bawlhlawh paih avang khan midang tan harsatna kan siam thei a, kan chil chhak khan kawnga kalte kha a fuh hlauh chuan a pawi dawn em asin.
Hmanni chu Sumo pakhat, a hnung lam aṭanga en pawha kawng chhe tak aṭanga khawpui rawn chuang chhuak tih hriat tak mai ka tlan pel a. Sumo zawn ka thlen chiah chuan motor chhunga chuang zinga mi chuan kawngkateah chuan chil a rawn chhak puat a, kan in nang tawk kher mai. Dina hauh hrep mai ka nap a, nimahsela ka hnungah mi tam tak an rawn tlan ve avangin han din mai a remchang lo. Midang pawhin hetiang chi hi sawi tur kan hre nualin ka ring.
Bus chhung aṭanga sahda hmuam lai han paih chhuah mai te, tuibur/ khaini hmuam hnu chhak ching tam tak an awm a, tih loh tawp tur a ni. A bikin Aizawl khawpui a chep avangin kan zavaia kan fimkhur tlan a ngai a, pawi kan khawih tam hmaa sim hlauh chi tak a ni.
Kea kalte
Thangkura-ten fiam-thua an sawi, 'motor hi kawng sirah kal sela, mihringte hi kawngpui laiah kal ve tawh ang u' an tih, zawm niawm taka kawngsir pan
ṭha duh miah lo kan la awm nual. Horn peka la
ṭhinrim zawk zamah lah an bo lo. Kea kalte hian lirthei che vel kan tibuai ve thei tho tih kan hriat a ngai, kawngpui zim taka titi duh vang emawa kal rual reng a rem lo. Kawngpuia tlan lirthei ngaichang renga kan kal a ngaih chang a tam hle.
Footpath-ah kan kal a nih pawhin kawnga lithei tlan kan ngaihchan thiam a ngai a, footpath awm lohnaah kan fimkhur zual a ngai. Engti kawng mahin lirthei kan insuttir emaw kan intih-palh tir tur a ni lo, khawl chu chhe mahse a siam ṭhat theih a, a thlak theih bawk. I taksa peng kha chu thlak chi a ni ve lo, pakhat pawh hman tlak loha a awm chuan kum khuain a pawi tawh ang.
Kan zavaia kan him tlan nan lirtheia chuangte leh kea kalte kan fimkhur tlan a ngai a ni.
- Matea Pa