DONATION

Kum 20 dawn lai chu a liam tawh ang, Africa ramah khuan ṭam nasa takin a tla a, mi tam tak ei tur neih loh vangin an thi a. A thi lote pawh ruh hlir hi an ni ringawt mai, an khawngaihthlak hle.

Tichuan, sapho beng a thleng ta a, sap zaithiam rualte chuan vehbur khawn nan khawvela concert ropui ber, a tluk awm thei tawh lo tur, ‘Live Aid concert’ an buatsaih a. Khawvela zaithiam lar ber ber tena, “We are the world, we are the children..,” tih hla a ruala an han sa kha chu kan rilru a hneh hle a nih kha. Hetiang ang pui pui harsatna hi chu a thleng tawh em lo ang a, mihring tung chho zelah hian vanduaina tawk, mi mangang, kan duh vang pawh ni bik lo hi, anchhe dawng khawvela kan awm avangin kan awm lo thei ṭhin lo. Heng mite hian hrehawm tak leh khawhar takin min lo thlir reng a ni.

Thisen hi kan taksa khawl hrang hranga mamawh zawng zawng sem kual ṭhintu a ni a, a pawimawh hle a ni. Kan thisen a lo tlem/ chhuah nasat chuan a dang kan nei leh vat te a nih loh chuan kan nunna atan a hlauhawm thei hle a, thih hmabak kan ni deuh mai ṭhin. Miin thisen a tlakchham chuan a in enkawl thuai a ngai, kan taksa tan thil ṭha lo tak a thlen thei a ni. Miin accident vang emaw zai pui (major operation) a tawk a nih chuan a taksa aṭanga thisen chhuak ngaiawh tir leh turin thisen unit tam tak a mawmawh ṭhin.

Mi hrisel ṭha pang-ngai chuan thisen hi a pe deuh reng thei a ni. Doctor-te phei chuan thisen pek ngai miah loh ai chuan pek zeuh zeuh reng hi a ṭha zawk an ti hial a ni. Thisen kan han pek hian nunna hlu tak mawlte in kan chhan him a lo ni reng a ni. Thisen hi nunna a ni a, kan han pek phei hi chuan midangte, chak lo zawk leh ma-mawhtute tan nunna a lo ni reng ṭhin a ni.

Mi thil phal ten mi harsa leh mamawh zawkte tan an sum leh pai an han theh chhuak ṭhin te hi chu a ropui ṭhin ngawt mai. Thilpek pe tur hian hausak kher pawh a ngai lo a, bungrua-ṭhutthleng, dawhkan, almirah, tunlaiah phei chuan, refrigerator, washing machine, water filter, water cooler, barrel etc te hmang pawhin thilpek kan pe thei a ni. Hengte hi mi harsa zawkte tan chuan a man te a to ṭhin hle a, lei tur chuan sum khawl fe a ngai ṭhin.

Ka sawi duh ber chu, thilthlawnpek hna hi kan pi pute aṭang tawha kan Mizo zia pakhat a ni. Mizo, ṭhian chhan thih ngamte zingah hian a lo mikhual lo hle a ni. Thilpek pe tur hian neih le lu kher a ngai lova, kan neih ang ang a mamawhtute hnena lawm taka pek mai hi a pawimawh ber.

Pathian hian heng mi te berte chunga in tih hi ka chunga ti in ni, a ti tlat. Kan Kristianna nen pawh a inzawm nghet tlat a ni. Tunah Kristiante hun pui Krismas te a hnai chho ta a, lawm taka thilpek pe thei turin ṭan i la sauh sauh ang u.

- Lalchhandama Colney